Башкы
Жаңылыктар
Жаңылыктар
КР БШКнын аппаратынын кызматкерлери үчүн жемкорлуктун алдын алуу жаатында семинар өткөрүлүүдө
КР БШКнын аппаратынын кызматкерлери үчүн жемкорлуктун алдын алуу жаатында семинарлар өткөрүлүп жатат. Семинардын негизги максаты, жемкорлукка каршы күрөшүү боюнча иш-чараларды уюштурууга жооптуу болгондорду милдеттүү түрдө окутуу жана жемкорлуктун алдын алуу жана ага каршы күрөшүү боюнча иш-чараларды иштеп чыгууда катышуучуларды системалуу түрдө маалымат менен камсыз кылуу болуп саналат.
2018-жылдын 4-майында КР БШК аппаратынын кызматкерлерине “Жемкорлук түшүнүгү” тууралуу семинар өткөрүлгөн.
Анда төмөнкү маселелер каралган:
1. Байыркы замандан бери эле жемкорлук менен күрөшүү тууралуу тарыхый материалдар;
2. Көркөм материалдар. Улуу ойчулдардын жемкорлук тууралуу ойлору, ырлары, тамсилдери, учкул сөздөрү, накыл кептери, афоризмдери, макал-лакаптары. Бул мисалдар дагы жемкорлукту так жана туура аныктоодо жардам берип келет.
3. Жемкорлук тууралуу социалдык видеокөргөзмөлөр көрсөтүлүп, ал семинардын катышуучулары тараптан талкууланды.
4. Жемкорлуктун түрлөрү жана анын жолдору менен түшүнүктөрүнүн аныктамалары, себептери айтылды.
5. КР БШК аппаратынын кызматкерлери күнүмдүк турмушта кезиккен жемкорлуктун түрлөрүн аныктоо боюнча ат салышты.
2018-жылдын 9-июлунда “Жемкорлуктун алдын алуу” деген аталышта КР БШКнын аппараты үчүн экинчи семинар өткөрүлдү. КР БШКнын жемкорлуктун алдын алуу боюнча атайын өкүлү Ч.С. Исмаилова семинарда төмөнкүлөрдү айтты:
1. Европа өлкөлөрүнүн жаңы баскычтагы жемкорлукка каршы күрөшүү жөнүндө мисалдары;
- жемкорлуктун алдын алуу жана ага каршы аракеттенүү жаатындагы эл аралык кызматташуунун маанилүү мааниси;
- паракорчулукту жок кылууда натыйжалуу чараларды жана кабыл алынган эл аралык документтерди иштеп чыгуу;
2. “Жемкорлук деген эмне?”-деген аталыштагы социалдык изилдөө жүргүзгөн эл аралык институттардын жыйынтыгын көрүү;
3. Мындан тышкары, БШК аппаратынын кызматкерлери Кыргыз Республикасынын жемкорлукка каршы күрөшүү боюнча ченемдик укуктук базасына киргизилген жемкорлуктун механизмдери, түрлөрү менен таанышты;
4. КРнын жемкорлук боюнча Кылмыш-жаза кодексиндеги акыркы өзгөртүүлөр, толуктоолор тууралуу маалымат берилди;
5. "Жемкорлукка негиз болчулар эмне?"-деген темада тренинг өткөрүлдү;
6. Кыргыз Республикасынын укук коргоо органдары тарабынан жемкорлукка шектелип кармалган КРнын мамлекеттик кызматкерлеринин видеотасмалары көрсөтүлүп, талкууланды.
КР БШК аппаратынын маалымат бөлүмү
Кененирээк билүү >>
Чолпон-Ата шаарында Кыргыз Улуттук университети менен Боршайком биргеликте Конрад Аденауэр атындагы фонддун каржылоосу менен Жаш лидерлер үчүн жайкы мектеп уюштуруп берди
6-июлдан 9-июлга чейин Чолпон-Ата шаарында Кыргыз Улуттук университети менен Боршайком биргеликте Конрад Аденауэр атындагы фонддун каржылоосу менен Жаш лидерлер үчүн жайкы мектеп уюштурулду.
Жаш лидерлер үчүн жайкы мектеп - бул Кыргыз Республикасынын жогорку окуу жайларынын студенттери үчүн семинарларды жана тренингдерди өткөрүүгө өбөлгө түзө турган билим берүү программасы. Жайкы мектептин артыкчылыктуу милдети - мамлекеттин жаштар саясатынын багытын аныктап, шайлоо жараянына жаштарды кошуу менен өнүктүрүү. Бул долбоордун негизги максаты, жаш лидерлердин кесиптик жана лидерлик сапаттарын көтөрүп, жеке жөндөмдүүлүгүн арттыруу жана алардын эмгек жолунун башталышына көмөк көрсөтүү болуп саналат.
Бул долбоор жарандык билим берүүнүн алкагында БШК менен ЖОЖ биргеликте уюштурган биринчи долбоору болуп саналат. Жайкы мектептин катышуучулары лидерге тиешелүү уникалдуу тажрыйба жана билим менен камсыздалат деген ишеним чон.
- КР БШКнын төрагасы Н.Шайлдабекова “КРдагы шайлоо тармагындагы реформалар”;
-Тажикстан Республикасынын Илимдер Академиясынын Тарых институтунун директорунун орун басары, доктор Абдулло Гафуров “Тажикстанга көп партиялуу системаны түзүү”;
- Б.Гафуров атындагы Худжанд мамлекеттик университетинин Тажик элинин тарыхы кафедрасынын жетекчиси, доктор, профессор Вахоб Набиев “Жаңы баскычтагы Тажикстан Республикасынын жаштар саясаты”;
- «Эгль» коомдук бирикмесинен Чолпон Омурканова “Жаштар жана шайлоолор”;
- “Пикир” аймактык эксперттер клубунун теңтөрагасы Бакыт Бекетаев, “Кыргызстандын жаңы тарыхындагы демократия, шайлоолор жана коррупция” - деген аталышта жайкы мектепке баяндамачылар катары иш алып барып, билдирүүлөрүн окуп беришти.
Кошумча, катышуучуларга жарандардын шайлоо укугу жаатында интерактивдүү тренингдер уюштурулуп, КР БШКнын кызматкерлери АЭҮ кантип колдонулат, пайдалануу эрежелерин, алар кандай тартипте иштээрин көрсөтүп беришти.
Жайкы мектептин модератору БШКнын мүчөсү, КУУнун саясий-укуктук изилдөө лабораториясынын жетекчиси, доктор, профессор К.Осмоналиев болду.
КР БШК аппаратынын маалыматтык бөлүмү
Кененирээк билүү >>
2018-жылдын 5-июлунда “Кыргыз Республикасынын шайлоо системасын реформалоо аркылуу демократияны чыңдоо” Программасы боюнча Байкоочу Комитеттин отуруму болуп өттү
2018-жылдын 5-июлунда, Кыргыз Республикасы менен Европа Кошунунун ортосунда 2016-жылы кол коюлган Келишимдин алкагында ишке ашырылып жаткан “Кыргыз Республикасынын шайлоо системасын реформалоо аркылуу демократияны чыңдоо” Программасы боюнча Байкоочу Комитеттин отуруму болуп өттү. Отурумга Байкоочу Комитеттин мүчөлөрү, Европа Кеңешинин Венециялык комиссиясынын жана БӨУ өкүлдөрү, ошондой эле баалоо миссиясынын көз карандысыз эксперттери катышты. Байкоочу Комитеттин курамына БШКнын, Европа Кошунунун, Президенттин Аппаратынын, тышкы иштер, финансы, экономика министрликтеринин, Мамкаттоонун жана жарандык коомдун өкүлдөрү кирет.
Отурумдун жүрүшүндө БШКнын төрагасы Н.К.Шайлдабекова “Шайлоо системасын реформалоо аркылуу демократияны чыңдоо - DCI-ASIE/2015/038-149 секторду реформалоо боюнча грант” Программасын ишке ашыруунун жүрүшү боюнча маалымат берди. Программанын Финансылык Келишиминин алкагында аткарылган индикаторлор боюнча маалымат берилди. Биринчи индикатор боюнча белгиленгендей, жарандардын шайлоо процессине болгон ишеним деңгээли артты, бул Гэллап Институтунун усулдары боюнча өткөрүлгөн Кыргызстандын калкын сурамжылоонун жыйынтыктары боюнча бааланды. 2015-жылдагы парламенттик, жана 2017-жылдагы президенттик шайлоолордон кийин ЮСАИДдеги өнөктөштөрдүн көмөктөшүүсү менен жарандарды жалпы улуттук сурамжылоолор жүргүзүлгөн. Бул аталган келишимдин талабы болгон, жана ал формасы жана мазмуну боюнча аткарылды.
2017-жылда 2016-жыл менен салыштырмалуу биометрикалык каттоодон өтүү боюнча жарандардын активдүүлүгү эки эседен ашуун өстү. 2017-жылдын 15-октябрына карата 3 137 595 жаран биометрикалык каттоодон өттү (2017-жылдын 1-январына карата биометрикалык каттоодон өткөн жарандардын саны 2 902 899 адамды түзгөн).
2016-жыл менен салыштырганда жарандардын биометрикалык каттоодон өтүү боюнча активдүүлүгү жогорулады – 2017-жылда өз маалыматтарын 234 696 жаран каттатты.
Буга өлкө башчысын шайлоого катышууга ниеттен тышкары, ошондой эле 2017-жылдын май айынан баштап 2017-жылдагы үлгүдөгү паспорттордун – электрондук идентификациялык карталардын ошол убакта жарандарга акысыз негизде берилүүсү, ошондой эле маалыматтарды топтоо пункттарынын кеңейтилүүсү жана маалыматтарды топтоо боюнча мобилдик топтордун пайда болуусу түрткү болду.
2017-жылдын 15-октябрына карата биометрикалык маалымат тапшырган 3 137 595 адамдын 3 025 770 шайлоочулардын тизмесине киргизилди, бул биометрикалык маалымат тапшыргандардын жалпы санынын 96,44% түзөт.
Биометрикалык маалымат тапшыргандардын калган 111 825 (3,56%) жашы 18ге жете электер болгон.
Шайлоочулардын тизмесин түзүүнүн бүткүл мезгилинде тизмеден 44 612 адам чыгарылып, анын 41 291 каза болгондуктан, жана 3 321 адам жарандыктан чыккандыктан тизмеден чыгарылды.
Тизмеге киргизилген (3 025 770) шайлоочулар менен 18 жаштагы жана андан улуу жарактуу паспорту бар жарандардын (3 768 275) санынын айырмасы 742 505 адамды түзөт.
КБМРдин негизинде шайлоочулардын тизмесин түзүү колдогу тизмелерди тактоонун жана жаңыдан топтолгон биометрикалык маалыматтардын негизинде жүргүзүлдү.
Жарандарга маалымат берүү жана маалыматтарды тактоо үчүн, шайлоочулардын тизмелерин (КБМРден автоматтык жүктөө) БШК менен МККнын биргелешкен “tizme.kg” порталына жайгаштыруу чечими кабыл алынган. Ошентип, шайлоочулардын тизмелери такай актуалдаштыруу режиминде участкалар, райондор, шаарлар жана республика боюнча берилген. Ошол эле учурда, маалыматтарды талдоо үчүн статистика, кайра байланышуу функциясы жана шайлоо дарегинин өзгөргөндүгүнө байланыштуу шайлоочунун орун которуу тарыхын чагылдыруу жайгаштырылган.
Даттанууларды берүү механизминин жеткиликтүүлүгү, даттанууларды берүү механизминин айкындыгы, коомдук отчеттор аркылуу айкындык жогорулады. Европа Кеңешинин Венеция комиссиясы менен кызматташууда Шайлоо талаштарын карап чыгуу тартиби жөнүндө Жобо иштелип чыкты, даттануулардын электрондук Реестри киргизилди, даттанууларды берүү каналдары анын ичинде электрондук жол менен, кеңейтилди, даттануулардын келип түшүүсүн, алар боюнча БШК кабыл алган чечимдер, ошондой эле, БШКнын кабыл алган чечимдерине даттануу болгон учурда соттун чечимдерин онлайн-чагылдыруу жана жаңылоо ишке ашырылды. 2017-жылдагы Президенттик шайлоонун жүрүшүндөгү даттануулар боюнча аналитикалык отчет түзүлүп, жарыяланды. ЕКнун КРдагы Өкүлчүлүгү бул индикатордун ишке ашырылуусуна баалоо жүргүзүп, 2017-жылдын декабрында анын аткарылгандыгын тааныды.
Азыркы учурда, Кыргыз Республикасынын бардык аймактарында өткөрүлгөн кеңири коомдук талкуулардын негизинде Кыргыз Республикасынын Президентинин алдындагы Шайлоо мыйзамдарын өркүндөтүү боюнча Жумушчу топ Шайлоо системасын мындан ары реформалоо Стратегиясын жана аны ишке ашыруу боюнча иш-аракеттер планын иштеп чыкты.
19-июнда өткөн кезектеги жыйынында Жумушчу топ Стратегиянын долбоорун бир добуштан жактырды. Отурум КР Президентинин Аппаратынын жетекчисинин биринчи орун басары Досалы Эсеналиевдин төрагалыгы астында БШКнын жана “Жарандык платформа” КФнун жетекчилиги, Жумушчу топтун толук курамынын катышуусу менен өттү.
26-июнда, Бишкек шаарында 2018-2020-жылдарга Кыргыз Республикасынын шайлоо мыйзамдарын өркүндөтүү Стратегиясынын долбоорунун акыркы версиясы коомдук талкууга коюлду.
Талдоонун жана өткөрүлгөн коомдук талкуулардын жыйынтыгы боюнча шайлоо укугун жана процессин өркүндөтүүнүн негизги максаттары жана багыттары иштелип чыкты.
Стратегия боюнча иштер төмөндөгүдөй бүткөрүлүүсү керек:
- Шайлоо мыйзамдарын өркүндөтүү Стратегиясын Кыргыз Республикасынын туруктуу өнүгүү боюнча улуттук кеңешинин кароосуна киргизүү жана бекитүү.
- Стратегиянын алкагында мыйзамдарга өзгөртүүлөрдү киргизүү боюнча сунуштарды Жогорку Кеңешке киргизүү.
Жогорку Кеңеш тарабынан мыйзам долбоорлорунун пакетин 2019-жылдын күзүнөн кечиктирбестен, же 2020-жылдагы шайлоолордон бир жыл мурда кабыл алуусу (график боюнча долбоорлор 2018-жылдын июнунан, андан кийин негизги пакет 2018-жылдын июлунда, Партиялар жөнүндө жаңы Мыйзамдын долбоору – 2018-жылдын июнунда киргизилет),
БШК жана мамлекеттик органдар тарабынан шайлоо процессин жана комиссиялар системасын, жарандык билим берүү уюмдарын оптимизациялоо боюнча чараларды көрүү.
Тышкы обзордук миссиянын көз карандысыз эксперти Паоло Раффоненин отчету угулуп, көңүлгө алынды. Паоло Раффоне белгиленген индикаторлордун азыркы этапта ишке ашырылуусу боюнча көз карашын билдирди. Көз карандысыз эксперттин отчету отурумда талкууланып, Байкоочу Комитеттин бир катар мүчөлөрү баалоо миссиясынын жыйынтыктары менен макул эместигин билдиришти.
Байкоочу Комитеттин мүчөлөрү Кыргыз Республикасы менен Европа Кошунунун Келишимдин алкагында тиешелүү деңгээлде бирге аракеттешүүнү улантуу сунуштады.
КР БШКнын аппаратынын маалымат бөлүмү
Кененирээк билүү >>
2018-жылдын 5-июлунда Токтогул шаарынын мэри, Кара-Жыгач жана Көк-Арт айыл өкмөттөрүнүн башчылары шайланды
2018-жылдын 5-июлунда Токтогул шаарынын мэри, Жалал-Абад облусунун Аксы районунун Кара-Жыгач жана Жалал-Абад облусунун Сузак районунун Көк-Арт айыл өкмөттөрүнүн башчылары шайланды
Натыйжада:
- Токтогул шаарынын мэри болуп 12 добуш алган Болгонбеков Болот Турдуевич «Энергетиктердин» фракциясынан шайланды. Башчылык орунга 2 талапкер ат салышкан. Токтогул шаардык кеңешинде бардыгы болуп 21 депутат бар, алардын 21 тең катышты;
- Жалал-Абад облусунун Аксы районундагы Кара-Жыгач айыл өкмөтүнүн башчысы болуп, 13 добуш алган Момунбеков Турдалы Кочкорбаевич шайланды. Кара-Жыгач айылдык кеңешинде 21 депутат болуп, бардык 21 тең катышты. Айыл өкмөтүнүн башчылыгына 4 талапкер ат салышты;
- Жалал-Абад облусунун Сузак районундагы Көк-Арт айыл өкмөтүнүн башчысы болуп 15 добуш алган Кулматов Эделбек Маматкулович шайланды. Бардыгы болуп, Көк-Арт айылдык кеңешинде 21 депутат бар, бардык 21 тең катышты. Айыл өкмөтүнүн башчылыгына 8 талапкер катталган.
КР БШКнын аппаратынын маалымат бөлүмү
Кененирээк билүү >>
КР БШК жергиликтүү кеңештердин кээ бир депутаттарынын ыйгарым укуктарын мөөнөтүнөн мурда токтотту
2018-жылдын 4-июлунда КР БШК жергиликтүү кеңештердин кээ бир депутаттарынын ыйгарым укуктарын мөөнөтүнөн мурда токтотуу жана бош калган депутаттык мандаттарды шайланган депутаттардан кийин турган депутаттыкка талапкерлерге өткөрүп берүү жөнүндөгү Ысык-Көл, Жалал-Абад, Сокулук жана Манас АШКнын чечимдерин бекитти.
Ошентип:
-Ысык-Көл облусунун Ысык-Көл районундагы Темир айылдык кеңешиндеги депутат Байгазаков Бактыбек Токтосунович депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, мандат шайланган депутаттан кийинки талапкерге – Белек Карасартович Сатыбалдиевке берилди;
- Жалал-Абад облусунун Жалал-Абад шаардык кеңешиндеги депутат Тагаев Мураталы Абдыкарович (Деп.фракция “Ата-Журт”) депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, мандат шайланган депутаттан кийинки талапкерге –Заттарбек Абдыкаарович Боронбаевге (Деп.фракция “Ата-Журт”) берилди;
-Чүй облусунун Сокулук районундагы Сокулук айылдык кеңешиндеги депутат айылдык кеңешиндеги депутат Сыдыков Бакытбек Дамирбекович депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, мандат шайланган депутаттан кийинки талапкерге - Акбермет Райымбековна Абаскановага берилди;
- Чүй облусунун Сокулук районундагы Гавриловка айылдык кеңешиндеги депутат Мамакеев Мирлан Айткулович өз каалоосу менен депутаттык ыйгарым укуктарын мөөнөтүнөн мурда токтотту, мандат кийинки талапкер –Нурсултан Турарбекович Бейшебаевге өткөрүлүп берилди;
- Талас облусунун Манас районундагы Кайынды айылдык кеңешиндеги депутат Байгазаков Бактыбек Токтосунович депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, мандат шайланган депутаттан кийинки талапкерге –Рамис Талипович Курманбековго берилди;
КР БШКнын аппаратынын маалымат бөлүмү
Кененирээк билүү >>
Чүй облусунун Кемин районунун Алмалуу айыл өкмөтүнүн башчысынын шайлоосу дайындалды
2018-жылдын 4-июлунда КР Борбордук шайлоо комиссиясы Чүй облусунун Кемин районунун Алмалуу айыл өкмөтүнүн башчысынын шайлоосун дайындады.
Чүй облусунун Кемин райондук мамлекеттик администрациясынын башчысы – акиминин 2018-жылдын 25-июнундагы № 160 буйругу менен Алмалуу айыл өкмөтүнүн башчысы Абдинасиров Элдияр Капарбекович, өзү берген арызынын негизинде ээлеген кызматынан бошотулган.
КР БШКнын токтомуна ылайык, Чүй облусунун Кемин районунун Алмалуу айыл өкмөтүнүн башчысын шайлоо 2018-жылдын 18-июлуна саат 9-00дөн 12-00гө чейин дайындалды.
Шайлоону Кыргыз Республикасынын мыйзамдарына ылайык уюштуруп, өткөрүү Кемин АШКсына тапшырылды.
Маалымат катары: “Жергиликтүү өз алдынча башкаруу жөнүндө" Кыргыз Республикасынын Мыйзамынын 48-беренесине ылайык жогорку билими жана мамлекеттик же болбосо муниципалдык кызматта 2 жылдан кем эмес иш стажы, же болбосо билим берүүнүн, саламаттык сактоонун мамлекеттик мекемелеринде же уюмдардын, мекемелердин жана жеке менчик чарбакер субъекттердин жетекчилик кызматтарында 3 жылдан кем эмес иш стажы бар аракетке жөндөмдүү Кыргыз Республикасынын жараны айыл өкмөтүнүн башчысы боло алат. Кылмыш жасагандыгы үчүн мыйзамдарда белгиленген тартипте алып салынбаган же жоюлбаган соттуулугу бар Кыргыз Республикасынын жараны айыл өкмөтүнө башчы болушу мүмкүн эмес.
КР БШК аппаратынын маалымат бөлүмү
Кененирээк билүү >>
Ош шаарынын мэринин шайлоосу дайындалды
Кыргыз Республикасынын Ош шаарынын мэринин шайлоосу дайындалды
2018-жылдын 4-июлунда КР БШКнын токтомуна ылайык, Кыргыз Республикасынын Ош шаарынын мэрин шайлоо 2018-жылдын 18-июлуна саат 9-00дөн 12-00гө дайындалды.
Шайлоону Кыргыз Республикасынын мыйзамдарына ылайык уюштуруп, өткөрүү Ош АШКна тапшырылды.
Кыргыз Республикасынын Премьер-министринин 2018-жылдын3-июлундагы № 450 буйругу менен Ош шаарынын мэри Кадырбаев Айтмамат Тентибаевич, өзү берген арызынын негизинде, ээлеген кызматынан бошотулган.
Маалымат үчүн: “Ош шаарынын статусу жөнүндө” Кыргыз Республикасынын Мыйзамынын 22-беренесине ылайык Жогорку билими жана мамлекеттик, муниципалдык кызматта же мамлекеттик билим берүү, саламаттык сактоо мекемелеринде же уюмдарда, мекемелерде жана жеке менчик чарба жүргүзүүчү субъекттерде жетекчилик кызматтарда 5 жылдан кем эмес иш стажы бар, мамлекеттик тилди эркин билген Кыргыз Республикасынын жараны шаардын мэри боло алат. Кылмыш жасаганы үчүн соттуулугу бар, анысы мыйзамда белгиленген тартипте жоюлбаган же алып салынбаган, соттолгондугу жоюлганына же алып салынганына карабастан мамлекеттик бийликке каршы кылмыш жасаганы үчүн соттуулугу бар, ошондой эле чет мамлекеттин жарандыгына ээ Кыргыз Республикасынын жараны шаардын мэри боло албайт."
КР БШК аппаратынын маалыматтык бөлүмү
Кененирээк билүү >>
Жогорку Кеңештин депутаты Б.И. Сулеймановдун жарандыгы жөнүндө ММКларга жарыяланган маалымат боюнча
ММКларда, интернетте, социалдык тармактарда жарыяланып жаткан КР ЖКнын депутаты Б.И.Сулеймановдун Казакстан Республикасынын жарандыгы тууралуу 2013-жылдын 19-апрелиндеги документтердин копиялары боюнча КР БШК төмөнкүлөрдү билдирет:
2014-жылдын февралында “Асаба” улуттук кайра жаралуу партиясынан Жогорку Кеңештин депутаты Б.И. Сулейманов Казакстан Республикасынын жараны деген маалыматтарга таянып, анын депутаттык мандатын кайтарып алуу тууралуу арыз КР БШКга түшкөн.
Бул маселе 2014-жылдын 20-февралында КР БШКнын отурумунда каралып, болгон фактыларды карап чыгып, маалыматтарды толуктоо ирээтинде атайын органдарга жарандыгын тактоо үчүн тастыктама жиберип, ошонун жыйынтыгы менен чечим кабыл алуу каралган.
2014-жылдын 25-февралында КР БШК тарабынан Кыргыз Республикасынын жана Казакстан Республикасынын тийиштүү органдарына Б.И. Сулеймановдун жарандыгын тактоо ирээтинде тастыктама жөнөтүлгөн (КРӨ МКК, КР ТИМ, Казакстан Республикасынын БШКсы, Казакстан Республикасынын ИИМге караштуу миграция полициясы).
2014-жылдын 28-февралында Казакстан Республикасынын БШКсынын жана Казакстан Республикасынын ИИМге караштуу миграция полициясы тарабынан түшкөн маалыматында, 1963-жылдын 4-майында туулган Сулейманов Бахадыр Искакович Кыргыз Республикасынын жарандыгын алгандыгына байланыштуу Казакстан Республикасынын Мыйзамынын 3-бөлүгүнүн 21-жана 30-беренелерине ылайык Казакстан Республикасынын жарандыгын 2010-жылдын 13-августунда жоготкондугу тууралуу миграция полициясынын Жамбыл облустук ички иштер департаментинин №29 чечими кабыл алынган деп белгиленген.
Ошондой эле, 2001-жылдын 25-декабрында Б.И.Сулеймановдун наамына берилген Казакстан Республикасынын №0166641574 өздүк күбөлүгү жана 2006-жылдын 25-декабрында берилген №165654 Казакстан Республикасынын паспорту жарандыктан чыкканына байланыштуу жараксыз документтердин тизмесине киргизилип, күчүн жоготкон.
КР БШКнын маалыматтык камсыздоо бөлүмү
Кененирээк билүү >>
Талас облусунун Талас районунун Долон айыл өкмөтүнүн башчысын шайлоосу дайындалды
2018-жылдын 27-июнунда КР Борбордук шайлоо комиссиясы Талас облусунун Талас районунун Долон айыл өкмөтүнүн башчысын шайлоонусун дайындады.
Талас облусунун Талас райондук мамлекеттик администрациясынын башчысы – акиминин 2018-жылдын 12-июнундагы № 112 буйругу менен Долон айыл өкмөтүнүн башчысы Т.Жоробеков, өзү берген арызынын негизинде, ээлеген кызматынан бошотулган.
КР БШКнын токтомуна ылайык, Талас облусунун Талас районунун Долон айыл өкмөтүнүн башчысын шайлоо 2018-жылдын 16-июлуна саат 9-00дөн 12-00гө чейин дайындалды.
Шайлоону Кыргыз Республикасынын мыйзамдарына ылайык уюштуруп, өткөрүү Талас АШКсына тапшырылды.
Маалымат катары: “Жергиликтүү өз алдынча башкаруу жөнүндө" Кыргыз Республикасынын Мыйзамынын 48-беренесине ылайык жогорку билими жана мамлекеттик же болбосо муниципалдык кызматта 2 жылдан кем эмес иш стажы, же болбосо билим берүүнүн, саламаттык сактоонун мамлекеттик мекемелеринде же уюмдардын, мекемелердин жана жеке менчик чарбакер субъекттердин жетекчилик кызматтарында 3 жылдан кем эмес иш стажы бар аракетке жөндөмдүү Кыргыз Республикасынын жараны айыл өкмөтүнүн башчысы боло алат. Кылмыш жасагандыгы үчүн мыйзамдарда белгиленген тартипте алып салынбаган же жоюлбаган соттуулугу бар Кыргыз Республикасынын жараны айыл өкмөтүнө башчы болушу мүмкүн эмес.
КР БШК аппаратынын маалымат бөлүмү
Кененирээк билүү >>
Кыргыз Республикасынын Жогорку Кеңешинин депутатынын бош калган мандаты О. Алыбаевге өткөрүлүп берилди
Бүгүн, 2018-жылдын 27-июнунда каза болгондугуна байланыштуу Жогорку Кеңештин депутаты Кадыкеев Нурланбек Кадыкеевичтин ыйгарым укуктары мөөнөтүнөн мурда токтотулду.
Бош калган мандат “Кыргызстан” саясий партиясынан катталган талапкерлердин тизмеси боюнча кезекте турган Алыбаев Орозбек Артельевичке өткөрүлүп берилди. Ага Кыргыз Республикасынын Жогорку Кеңешинин депутатынын күбөлүгү жана төш белгиси берилди.
КР БШК аппаратынын маалымат бөлүмү
Кененирээк билүү >>
Кыргыз Республикасынын Жогорку Кеңешинин депутатынын бош калган мандаты Ж. Исаевге өткөрүлүп берилди
Бүгүн, 2018-жылдын 27-июнунда “Электр станциялары” ААКнын башкы директорунун биринчи орун басары болуп дайындалуусуна байланыштуу, “Кыргызстан” парламенттик фракциясынан Жогорку Кеңештин депутаты Сарсейитов Исланбек Зайырбековичтин ыйгарым укуктары мөөнөтүнөн мурда токтотулду.
Бош калган мандат “Кыргызстан” саясий партиясынан катталган талапкерлердин тизмеси боюнча кезекте турган Исаев Жаныбек Базаркуловичке өткөрүлүп берилди. Ага Кыргыз Республикасынын Жогорку Кеңешинин депутатынын күбөлүгү жана төш белгиси берилди.
КР БШК аппаратынын маалымат бөлүмү
Кененирээк билүү >>
Кыргыз Республикасынын айрым жергиликтүү өз алдынча башкаруусунун аткаруу органдарынын башчыларын шайлоодогу добуш берүүнүн жыйынтыгы жана натыйжасы жөнүндөгү протоколдору бекитилди
2018-жылдын 27-июнунда КРнын БШКсы 2018-жылдын 20, 22-июнунда өткөрүлгөн Нарын облусунун Ат-Башы районунун Казыбек, Кочкор районунун Ак-Кыя, Чүй облусунун Аламүдүн районунун Таш-Дөбө айыл өкмөттөрүнүн башчыларын шайлоодогу добуш берүүнүн жыйынтыктары жана шайлоонун натыйжалары тууралуу протоколдорун бекитти.
Протоколдордун негизинде:
-Казыбек айыл өкмөтүнүн башчысын шайлоо өттү деп таанылып, Докоев Руслан Усенович айыл өкмөтүнүн башчысы болуп шайланды;
-Ак-Кыя айыл өкмөтүнүн башчысын шайлоо өттү деп таанылып, Турдубеков Тилек Рысбекович айыл өкмөтүнүн башчысы болуп шайланды;
- Таш-Дөбө айыл өкмөтүнүн башчысын шайлоо өттү деп таанылып, Бейшеналиев Бакыт Курманбекович айыл өкмөтүнүн башчысы болуп шайланды.
Шайланган айыл өкмөт башчыларына белгиленген үлгүдөгү күбөлүк берүү Ат-Башы, Кочкор жана Аламүдүн аймактык шайлоо комиссиясына тапшырылды.
КР БШК аппаратынын маалыматтык бөлүмү
Кененирээк билүү >>
КР БШК жергиликтүү кеңештердин кээ бир депутаттарынын ыйгарым укуктарын мөөнөтүнөн мурда токтотту
2018-жылдын 27-июнунда КР БШК жергиликтүү кеңештердин кээ бир депутаттарынын ыйгарым укуктарын мөөнөтүнөн мурда токтотуу жана бош калган депутаттык мандаттарды шайланган депутаттардан кийин турган депутаттыкка талапкерлерге өткөрүп берүү жөнүндөгү Ысык-Көл, Чоң-Алай жана Сокулук АШКнын чечимдерин бекитти.
Ошентип:
-Ысык-Көл облусунун Ысык-Көл районундагы Ананьево айылдык кеңешиндеги депутат Кубат уулу Таалайбектин депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, мандат шайланган депутаттан кийинки талапкерге –С. Бакаевге өткөрүп берилди;
-Ош облусунун Чоӊ-Алай районундагы Кашка-Суу айылдык кеңешиндеги депутат А. Кудайбергенованын депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, мандат шайланган депутаттан кийинки талапкерге – Б. Карыбековго өткөрүп берилди;
-Чүй облусунун Сокулук районундагы Крупская айылдык кеңешиндеги депутат А. Джакупованын КР аймагынан тышкары көчүп кеткенине байланыштуу ыйгарым укуктары токтотулуп, мандат шайланган депутаттан кийинки талапкерге – А. Абдрахмановго өткөрүп берилди;
КР БШКнын аппаратынын маалымат бөлүмү
Кененирээк билүү >>
-
-
Кененирээк билүү >>
Түркиядагы кезексиз парламенттик жана президенттик шайлоолордо добуштардын 99% эсептелди
Шанхай Кызматташтык Уюмунун (ШКУ) Катчылыгынын жана Түрк тилдүү Мамлекеттердин Кызматташтык Кеңешинин (ТМКК) чакыруусу боюнча КР БШКнын делегациясы 2018-жылдын 24-июнунда болуп өткөн кезексиз парламенттик жана президенттик шайлоолордо добуш берүүнүн жүрүшүнө байкоо жүргүзүүгө катышты.
ШКУнун Миссиясынын курамына КР БШКнын төрагасынын орун басары А.Бекматов жана Ош облусундагы Кара-Суу АШКнын атайын өкүлү Ж.Джоробаев, Түрк тилдүү мамлекеттердин кызматташтык Кеңешинин Миссиясынын курамына КР БШКнын төрагасынын орун басары А.Эшимов, КР БШКнын Аппарат башчысы М.Коңурбаев кирди.
БШКнын делегациясынын шайлоолорго эл аралык байкоо жүргүзүү программасынын алкагында Түркиянын Жогорку шайлоо кеңешинин төрагасы Сади Гювен менен жолугушуу, шайлоо алдындагы чогулушка катышуу, Анкара, Стамбул жана Анталия шаарларындагы бир катар участкалардагы шайлоо процессине байкоо жүргүзүү жана байкоо жүргүзүү миссиясынын жыйынтыктарын чыгаруу боюнча пресс-конференциясына катышуулар болду.
КР БШКнын төрагасынын орун басары А.Бекматов Түрк Республикасындагы кезексиз Президенттик жана Парламенттик шайлоолорду даярдоонун жана өткөрүүнүн жүрүшүнө байкоо жүргүзүүнүн жыйынтыктары боюнча ШКУнун байкоочулар Миссиясынын пресс-конференциясына катышып, шайлоолор мыйзамдарга ылайык өткөндүгүн, шайлоолорду уюштуруу жогорку деңгээлде болгондугун белгиледи. Ал шайлоочулардын активдүүлүгүн, шайлоолордун ачык жана айкындыгын камсыз кылуу, технологиялык инновацияларды киргизүү боюнча Түркиянын БШКнын план ченемдүү жана ырааттуу иштерин өзгөчө белгиледи. Бардык деңгээлдеги шайлоо комиссиялардын мүчөлөрүнүн иши кесипкөйлүк деңгээлде экендиги белгиленди.
Жекшемби күнкү кезексиз президенттик жана парламенттик шайлоолордогу шайлоо бюллетенине Эрдогандын (Адилеттик жана өнүгүү башкаруучу партиясынан), Мухаррем Индженин (негизги оппозициялык Элдик-республикалык партиядан), Селахеттин Демирташтын (күрддөргө жакын Элдердин демократиялык партиясынан), Мераль Акшенердин (Жакшы партиядан), Темель Карамоллаоглунун (Бакыт партиясынан) жана Догу Перинчектин (“Мекен” партиясынан) фамилиялары киргизилген.
Президенттик шайлоолордогу добуш берүүнүн натыйжалары боюнча 99,16% добуштар эсептелип, маалыматтар боюнча азыркы президент Реджеп Эрдоган – 52,55% менен жеңди. Анын жакынкы атаандашы Мухаррем Инджеде 30,67%.
Добуштардын 99,10% эсептелген парламенттик шайлоолордо, мандаттар төмөндөгүдөй бөлүштүрүлдү: Адилеттик жана өнүгүү партиясы – АКР – 42,49% жана 293 орун.
Улутчулдук кыймыл Партиясы – МНР – 11,19% жана 50 орун. Жалпы жонунан “Элдик альянс” 342 парламенттик орун алат. Республикалык элдик партияда – СНР – 22,7% жана 146 орун. “Жакшы партияда” (жаш улутчулдар) – 44 орун. “Фелисити” партиясы – SP болгону 1,4% добуш алып, бир да мандатка жеткен жок. Күрддөргө жакын Элдик демократиялык партия (HDP) 11,2% добуш алып, парламентте 67 орун алат.
Түркиянын бир палаталуу парламентинде 600 орун бар.
КР БШКнын Аппаратынын маалымат бөлүмү
Кененирээк билүү >>
БШКнын төрагасы Н.Шайлдабекованын Кыргыз Республикасынын мамлекеттик жана муниципалдык кызматкерлеринин күнү менен куттуктоосу
Урматтуу Кыргыз Республикасынын мамлекеттик жана муниципалдык кызматкерлери!
Урматтуу Кыргыз Республикасынын Шайлоо жана референдум өткөрүү боюнча борбордук комиссиясынын аппаратынын кызматкерлери, атайын өкүлдөрү жана системалык администраторлору!
Кыргыз Республикасынын Шайлоо жана референдум өткөрүү боюнча борбордук комиссиясынын атынан жана жеке өзүмдүн атымдан Сиздерди кесиптик майрам – Кыргыз Республикасынын Мамлекеттик жана муниципалдык кызматкерлеринин күнү менен куттуктоого уруксат этиңиздер.
Мамлекеттик кызматчы болуу – бул жигер, күн сайын ак ниеттүү, сапаттуу эмгекти, өз учурунда туура чечимдерди жана чечкиндүү аракеттерди көрүүнү, жоопкерчиликтин жогорку деңгээлин, жарандык жана кесипкөйлүк эстүүлүктү талап кылган ардактуу жана жооптуу милдет.
Учурдан пайдаланып, Кыргызстанда демократиялуу, ачык-айкын жана атаандаштык шайлоолорду уюштурууга жана өткөрүүгө, шайлоо системасын реформалоону ишке ашырууга кошкон салымыңыздар үчүн Сиздерге ыраазычылык билдирем. Сиздердин кесипкөй жана жоопкечиликтүү мамилеңиздерсиз, өлкөбүздүн туруктуу жана ийгиликтүү өнүгүүсү үчүн шайлоо процессинин маанилүүлүгүн Сиздердин жана жалпы командабыздын жогорку түшүнүүңүздөрсүз, ар бириңиздердин күн сайын тер төгүп аракеттенүүңүздөрсүз биздин өлкөбүз сыймыктанчу бул жетишкендиктерге жетишүү мүмкүн эмес болчу!
Биздин алдыбызда шайлоо укуктарын жана шайлоолорду уюштуруу тажрыйбасын өркүндөтүү боюнча жаңы өлкөн милдеттер турат. Жарандардын шайлоолорго толук кандуу катышуусун жана алардын өз эркин азат билдирүүсүн камсыздоо, ишенимди бекемдөө үчүн мүмкүн болгондун баарын биргеликте жасоо менен өлкөбүздөгү тынчтыкка жана биримдикке түрткү беребиз деп ишенемин!
Сиздерге чын дилимден чың ден соолук, бейпилдик, ынтымак, үй-бүлөлүк бакубаттуулук, Кыргызстан калкына кызмат кылуу жагындагы асыл иштериңизде жана өзүңүздөрдүн кесиптик чеберчиликти арттырууда ийгиликтерди каалайм!
Урматтоом менен,
КР БШКнын төрагасы Н.Шайлдабекова
Кененирээк билүү >>
Акыркы жаңылыктар
19.11.2026
КР БШКсы түшүндүрмө берет: «Түндүк» аркылуу кол тамгаларды чогултуу кызматы добуш берүү системасы болуп саналбайт жана чогултулган кол тамгалардын саны шайлоонун жыйынтыгына таасир этпейт
18.11.2026
Кыргызстанда шайлоо системасы жалпы республикалык тестирлөөдөн өтүүдө
17.11.2026
КР БШКсы Rise Up Kyrgyzstan жаштар демилгелүү тобу менен кызматташуу жөнүндө меморандумга кол койду
13.11.2026
Кыргыз Республикасынын Президентинин кызмат ордуна талапкерлерди көрсөтүү мөөнөтү аяктады
12.11.2026
КР БШКсы Президенттин кызмат ордуна талапкерлердин ыйгарым укуктуу өкүлдөрүн каттады
12.11.2026
КР БШКсы жергиликтүү кеңештердин бир катар депутаттарынын ыйгарым укуктарын мөөнөтүнөн мурда токтотту