№ 156 2015-жылдын 4-октябрындагы Кыргыз Республикасынын Жогорку Кеңешинин депутаттарын шайлоо боюнча келип түшкөн даттанууларды жана арыздарды карап чыгуу боюнча жыйынтыктоочу маалымат жөнүндө

Добуш берүү күнүнөн тартып бүгүнкү күнгө чейин Кыргыз Республикасынын Шайлоо жана референдум өткөрүү боюнча борбордук комиссиясына 53 арыз, даттануу жана кайрылуу келип түштү.

Шайлоо мыйзамдарынын бузулушуна карай арыздар жана даттануулар төмөндөгүдөй укук бузуулардын түрлөрүнө топтоштурулду: добуш берүүчү жайдан тышкары добуш берүү мүмкүнчүлүгү тууралуу арыздарда колдор коюлган эмес; саясий партиялардын байкоочуларын каттоодон баш тартылган; шайлоочулардын шайлоочулар тизмесинен чыкпай калышы; шайлоо участкаларында үгүт иштерин жүргүзүү; шайлоо участкаларына шайлоочуларды ташып келүү; добуштарды сатып алуу; идентификациялоодо техникалык каражаттардын бузулушунун айынан шайлоочуларга добуш берүүгө уруксат бербөө жана идентификациядан кийин чектерди бербей коюу.

Бардык материалдар Кыргыз Республикасынын Шайлоо жана референдум өткөрүү боюнча борбордук комиссиясынын жыйынына билдирилген, ар бирөөсү боюнча каралып чыккан, чечимдер кабыл алынган.

Кыргыз Республикасынын Шайлоо жана референдум өткөрүү боюнча борбордук комиссиясы тарабынан 21 арыз, даттануу жана кайрылуу боюнча жооптордун негиздемелеринин тексти бекитилген, 9 арыз Кыргыз Республикасынын Өкмөтүнө караштуу Мамлекеттик каттоо кызматына кароо үчүн өткөрүлүп берилди, ар бир арызга жана даттанууга добуш берүү жолу менен калган 23 арыз жана даттанууну канааттандыруудан баш тартуу чечими кабыл алынды.

Шайлоону өткөрүүнүн жүрүшүнөн тышкары шайлоо комиссиялары жана шайлоо процессине катышкандардан укук коргоо органдарына 9 материал далилдөө үчүн териштирүүгө жөнөтүлдү. Бул материалдар боюнча кылмыш ишин козгоодон баш тартылган. Укук коргоо органдарынын ыкчам алдын алуу иш-чаралары боюнча 22 факты каралган, алардын ичинен 4 арыз боюнча кылмыш иши козголгон, бирок алардын жыйынтыктары шайлоонун натыйжаларына эч кандай таасирин тийгизбейт.

“Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамынын 35-37, 43-45-беренелеринин негизинде, “Кыргыз Республикасынын шайлоо референдум өткөрүү боюнча шайлоо комиссиялары жөнүндө” Кыргыз Республикасынын Мыйзамынын 6, 7, 18-беренелерин жетекчиликке алып, Кыргыз Республикасынын Шайлоо жана референдум өткөрүү боюнча борбордук комиссиясы 

ЧЕЧИМ КЫЛАТ: 

1. Кыргыз Республикасынын Жогорку Кеңешинин депутаттарын шайлоону даярдоо жана өткөрүү мезгилинде шайлоочулардын жана башка шайлоого катышкандардын арыздарын жана даттанууларын карап чыгуу боюнча Жумушчу топтун маалыматы кабыл алынсын.
2. Бул чечим Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.
3. Аталган чечимдин аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын аппарат жетекчиси П.П.Баженовго жүктөлсүн. 

 

ТӨРАГА                                                                     Т. АБДРАИМОВ 

 

Бишкек ш., 15-октябрь 2015-жыл

№ 156