2015-жылдын 4-октябрындагы Кыргыз Республикасынын Жогорку Кеңешинин депутаттарын шайлоонун жыйынтыгы боюнча Кыргыз Республикасынын Шайлоо жана референдум өткөрүү боюнча борбордук комиссиясына 2015-жылдын 9-октябрында “Бүтүн Кыргызстан Эмгек” саясий партиясынын ыйгарым укуктуу өкүлү А. Рысбаевадан Ош шаарындагы №5299, №5317 шайлоо участокторундагы добуш берүүнүн жыйынтыгы боюнча Ош шаардык аймактык шайлоо комиссиясынын чечимин жокко чыгаруу боюнча кайрылуусу келип түшкөн. Себеби, А. Рысбаева жогорудагы 2 шайлоо участкаларындагы добуш берүүнүн жыйынтыгын кайра эсептөөнү суранган. Бирок Ош аймактык шайлоо комиссиясы кайра эсептөөдөн баш тарткан.
“Бүтүн Кыргызстан Эмгек” саясий партиясынын Араван районундагы мүчөсү И. С. Хакимовдон №5358 “Тепе-Коргон”, №5359 “Кесов”, №5481 “Беш Кабырга” шайлоо участокторундагы добуш берүүнүн жыйынтыгын кайра эсептөө боюнча арыз түшкөн. Араван аймактык шайлоо комиссиясы карап, добуштарды кайра эсептөөгө негиз жок деген чечим чыгарышкан.
Буга кошумча, Кыргыз Республикасынын Шайлоо жана референдум өткөрүү боюнча борбордук комиссиясына 2015-жылдын 7-октябрында “Бүтүн Кыргызстан Эмгек” саясий партиясынын тең төрагасы А. К. Мадумаровдон айрым шайлоо участкаларындагы добуш берүүнүн жыйынтыгы боюнча добуштарды кайра эсептөө боюнча кайрылуу келип түшкөн. Бүгүнкү күнгө Ош облусунун Кара-Суу, Ноокат аймактык шайлоо комиссияларынан добуш берүүнүн жыйынтыктары боюнча протоколдордун түп нускалары келип түшө элек. Бул райондордон добуш берүүнүн жыйынтыктары боюнча протоколдордун түп нускалары келип түшкөндөн кийин каралат.
“Кыргыз Республикасынын шайлоо жана ререндум өткөрүү боюнча шайлоо комиссиялары жөнүндө” Кыргыз Республикасынын Мыйзамынын 6, 7, 18-беренелерин жетекчиликке алып, Кыргыз Республикасынын Шайлоо жана референдум өткөрүү боюнча борбордук комиссиясы
ЧЕЧИМ КЫЛАТ:
1. “Бүтүн Кыргызстан Эмгек” саясий партиясынын ыйгарым укуктуу өкүлү А. Рысбаеванын арызы канааттандырылсын.
Ош шаарындагы №5299, №5317 шайлоо участокторунда добуш берүүнүн жыйынтыктары кайра эсептелсин.
2. “Бүтүн Кыргызстан Эмгек” саясий партиясынын Араван районундагы мүчөсү И. С. Хакимовдун кайрылуусу канааттандырылсын.
Ош облусунун Араван районундагы №5358 “Тепе-Коргон”, №5359 “Кесов”, №5481 “Беш Кабырга”шайлоо участокторундагы добуш берүүнүн жыйынтыгы кайра эсептелсин.
3. Ош облусунун Өзгөн районунун Куршаб айыл аймагындагы №5050, №5051, №5052, №5053 шайлоо участокторундагы добуш берүүнүн жыйынтыгы кайра эсептелсин.
4. Бул чечим Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жайгаштырылсын.
5. Аталган чечимдин аткарылышын контролдоо Кыргыз Республикасынын Шайлоо жана рефендум өткөрүү боюнча борбордук комиссиясынын аппарат жетекчиси П.П. Баженовго жүктөлсүн.
ТӨРАГА Т. АБДРАИМОВ
Бишкек ш., 12-октябрь 2015-жыл
№ 145