ЧЕЧИМ № 26 Ысык-Көл облусунун Ак-Суу районундагы Челпек айылдык кеңешине депутаттарды шайлоо боюнча даттанууларды карап чыгуу жөнүндө

2012-жылдын 30-ноябрында Кыргыз Республикасынын Шайлоо жана референдум өткөрүү боюнча борбордук комиссиясына Ысык-Көл облусунун Ак-Суу районундагы Челпек айылдык кеңешине Таш-Кыя жана Бурма-Суу көп мандаттуу шайлоо округдары боюнча депутаттыкка талапкер А.Азаевадан жана Р.Мамалжановдон кайрылуулар келип түштү, анда алар №3135, №3137 шайлоо участкалары боюнча шайлоочулардын добуштарын кайталап саноону өтүнгөн.

Сунуш кылынган материалдардан 2012-жылдын 25-ноябрында №3135, №3137 шайлоо участкаларында добуштарды эсептөө жана добуш берүүнүн жыйынтыктарын белгилөө процессинде укук бузуулар орун алгандыгы, ошондой эле участкалык шайлоо комиссияларынын мүчөлөрү шайлоо бюллетендерин эсептөө процессинде катышып олтурган адамдарга добуш берүүнүн жыйынтыктары жөнүндө протоколдордун күбөлөндүрүлгөн көчүрмөлөрүн бербегендиги жөнүндө 2012-жылдын 26-ноябрындагы акт белгиленген. Көрсөтүлгөн актылардын участкалык комиссияларда жана аймактык шайлоо комиссиясында катталган белгиси жок.

Ак-Суу аймактык шайлоо комиссиясынын 2012-жылдын 28-ноябрындагы чечими менен Челпек айылдык кеңешине Таш-Кыя жана Бурма-Суу көп мандаттуу шайлоо округдары боюнча депутаттыкка талапкерлер Р.Мамалжановго, А.Азаевага, У.Ахметовго, А.Элиевге, Р.Муканбетовго, М.Иманахуновго, Р.Ракымбердиевге шайлоо бюллетендерин кайталап саноону жүргүзүүдөн баш тартылган.

Ак-Суу аймактык шайлоо комиссиясынын 2012-жылдын 28-ноябрындагы чечими менен Ысык-Көл облусунун Ак-Суу районундагы Челпек айылдык кеңешинин депутаттарын шайлоонун натыйжалары аныкталган.

«Жергиликтүү кеңештердин депутаттарын шайлоо жөнүндө» Кыргыз Республикасынын Мыйзамынын 37-беренесинин 6-бөлүгүн, «Кыргыз Республикасынын шайлоо жана референдум өткөрүү боюнча шайлоо комиссиялары жөнүндө» Кыргыз Республикасынын Мыйзамынын 6-беренесин, 7-беренесинин 1-бөлүгүндөгү 1, 2, 26-пункттарды, 2-бөлүгүндөгү 5-пунктту жетекчиликке алып, Кыргыз Республикасынын Шайлоо жана референдум өткөрүү боюнча борбордук комиссиясы,

ЧЕЧТИ:

1. Челпек айылдык кеңешине Таш-Кыя жана Бурма-Суу көп мандаттуу шайлоо округдары боюнча депутаттыкка талапкерлер Р.Мамалжановго, А.Азаевага, У.Ахметовго, А.Элиевге, Р.Муканбетовго, М.Иманахуновго, Р.Ракымбердиевге шайлоо бюллетендерин кайталап саноону жүргүзүүдөн баш тартуу жөнүндө Ак-Суу аймактык шайлоо комиссиясынын 2012-жылдын 28-ноябрындагы чечими жокко чыгарылсын.

2. Ысык-Көл облусунун Ак-Суу аймактык шайлоо комиссиясы Кыргыз Республикасынын Шайлоо жана референдум өткөрүү боюнча борбордук комиссиясынын мүчөсүнүн катышуусунда №3135, №3137 шайлоо участкаларында шайлоочулардын добуштарын кайталап санасын.

3. Бул чечимдин көчүрмөсү Ак-Суу аймактык шайлоо комиссиясына жөнөтүлсүн жана арыз ээлерине берилсин.

4. Бул чечим Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жайгаштырылсын.

5. Бул чечимдин аткарылышына контролдук кылуу милдети Кыргыз Республикасынын Шайлоо жана референдум өткөрүү боюнча борбордук комиссиясынын төрагасынын орун басары А.Т.Шайымкуловага жүктөлсүн.

 

ТӨРАГА                                                           Т.АБДРАИМОВ

            Бишкек ш., 2012-жылдын 6-декабры