Кыргыз Республикасынын Шайлоо жана референдум өткөрүү боюнча борбордук комиссиясына “Ата-Журт” мекенчил партиясы” саясий партиясынын Жалал-Абад шаардык бөлүмүнүн ыйгарым укуктуу өкүлү Т.Казакбаевден (мындан ары- ыйгарым укуктуу өкүл Т. Казакбаев) 2017-жылдын 1-июнунда арыз (кир. № 01-14/771) келип түшкөн.
Ыйгарым укуктуу өкүл Т.Казакбаев өзүнүн арызында идентификациядан өткөн шайлоочулардын саны менен добуш берген шайлоочулардын санынын ортосундагы айырмачылыктарына көрсөткөн. Мамлекеттик каттоо кызматынын (мындан ары-МКК) чегине ылайык, №2098 шайлоо участкасында идентификациядан өткөн шайлоочулардын саны 1171 түзөт, ал эми автоматтык эсептөө урнанын чегине ылайык добуш берген шайлоочулардын саны 1174 түздү.
Ыйгарым укуктуу өкүл Т.Казакбаев идентификациядан өтпөй калган 3 адамдын ордуна шайлоо бюллетендер жөн эле салынган деп эсептейт жана ушуга байланыштуу Жалал-Абад аймактык шайлоо комиссиясынын 2017-жылдын 30-майындагы № 20/17 протоколун (чечимин), №2098 шайлоо участогу боюнча 2017-жылдын 28-майындагы шайлоонун натыйжалары жөнүндө протоколун жокко чыгарууну жана №2098 шайлоо участогундагы добуш берүүнүн жыйынтыктарын жараксыз деп табууну өтүнөт.
КР БШКнын жергиликтүү кеңештердин депутаттарын шайлоону өткөрүүдө шайлоочулардын жана шайлоо процессинин башка катышуучуларынын арыздарын жана даттанууларын кароо боюнча Жумушчу тобунун чечими менен Т.Казакбаевдин даттануусу канаатандыруусуз калтырылды, Кыргыз Республикасынын Өкмөтүнө караштуу Мамлекеттик каттоо кызматынын жоопкерчилигин кароо сунушталган.
Кызыкдар тараптардын жүйөлөрүн угуп, ошондой эле бардык көрсөтүлгөн материалдарды иликтеп чыгып, Кыргыз Республикасынын Шайлоо жана референдум өткөрүү боюнча борбордук комиссиясы төмөнкүдөй жыйынтыкка келет.
“Жергиликтүү кеңештердин депутаттарын шайлоо жөнүндө” Кыргыз Республикасынын Мыйзамынын 38-беренесинин 6-бөлүгүнө ылайык, Шайлоо участкасында добуш берүүнүн, добуштарды эсептөөнүн, добуш берүүнүн жыйынтыктары жөнүндө протоколду түзүүнүн тартибин бузуу менен байланышкан, ар бир талапкер, талапкерлердин тизмеси алган добуштардын санын ишенимдүү аныктоого мүмкүндүк бербеген жоболорду бузуулар шайлоочулардын добуш берүүсүнүн жыйынтыктарын ишенимдүү белгилөөгө мүмкүндүк бербеген эреже бузуулар деп түшүнүлөт.
“Жергиликтүү кеңештердин депутаттарын шайлоо жөнүндө” Кыргыз Республикасынын Мыйзамынын 41-беренесинин 5-бөлүгүнө ылайык, шайлоочулар, талапкерлер, саясий партиялар, коммерциялык эмес уюмдар, алардын өкүлдөрү жана байкоочулар мамлекеттик жана башка органдардын, алардын кызмат адамдарынын, шайлоо процессинин башка катышуучуларынын чечимдерине жана (же) аракеттерине (аракетсиздигине) арыз же даттануу менен кайрыла алат. Арыз, даттануу жүйөлүү болуп жана алар негизденген далилдер менен бирге берилүүгө тийиш.
“Жергиликтүү кеңештердин депутаттарын шайлоо жөнүндө” Кыргыз Республикасынын Мыйзамынын 36-беренесинин 7-бөлүгүнүн 5 абзацына ылайык, добуш берүү үчүн ящиктерден алып чыгылган шайлоо бюллетендеринин саны шайлоо участогунда шайлоочуларга берилген бюллетендердин санына дал келүүсү же болбосо андан аз болууга тийиш.
МККнын өкүлү Ж.Жапарова тарабынан шайлоочуларды индентификациялоодо эсептөө машина техникалык катачылык кетиргендиги жөнүндө түшүндүрмө берилген факты, ошондой эле МКК идентификациялоодо жана чек берүүдө чыккан каталарды жоюу боюнча чараларды көрүп жаткан жагдайлар эске алынды.
Ушундан улам, №2098 шайлоо участогу боюнча шайлоо участогунда турган добуш берүү үчүн үкөктөрдөн алынган шайлоо бюллетендеринин саны так аныкталган, ал шайлоочуларга берилген бюллетендердин саны менен дал келди, ошондой эле МККнын чектерин кол менен эсептегенде идентификациядан өткөн шайлоочулардын саны добуш берген шайлоочулардын саны менен дал келди, жогоруда баяндалгандарды эске алып Борбордук шайлоо комиссиясы даттанууну канааттандыруу үчүн негиздерди тапкан жок.
Жогоруда баяндалгандардын негизинде, “Кыргыз Республикасынын шайлоо жана референдум өткөрүү боюнча шайлоо комиссиялары жөнүндө” Кыргыз Республикасынын Мыйзамынын 3,7,18-беренелерин, “Жергиликтүү кеңештердин депутаттарын шайлоо жөнүндө” Кыргыз Республикасынын Мыйзамынын 36-беренесинин 7-бөлүгүнүн 5-абзацын, 38-беренесинин 6-бөлүгүн, 41-беренесинин 5-бөлүгүн жетекчиликке алып, Кыргыз Республикасынын Шайлоо жана референдум өткөрүү боюнча борбордук комиссиясы
ЧЕЧИМ КЫЛАТ:
1. “Ата-Журт” мекенчил партиясы” саясий партиясынын Жалал-Абад шаардык бөлүмүнүн ыйгарым укуктуу өкүлү Т.Казакбаевдин Жалал-Абад аймактык шайлоо комиссиясынын 2017-жылдын 30-майындагы № 20/17 протоколун (чечимин), 2017-жылдын 28-майындагы №2098 шайлоо участогу боюнча шайлоонун натыйжалары жөнүндө протоколун жокко чыгаруу, №2098 шайлоо участогундагы добуш берүүнүн жыйынтыктарын жараксыз деп табуу жөнүндө арызын канаттандыруудан баш тартылсын.
2. Бул чечим Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.
3. Бул чечимдин аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын мүчөсү, шайлоочулардын жана шайлоо процессинин башка катышуучуларынын арыздарын жана даттанууларын кароо боюнча Жумушчу топтун жетекчиси А.Асаналиевге жүктөлсүн
ТӨРАГА Н.ШАЙЛДАБЕКОВА
Бишкек ш., 2017-жылдын 5-июну
№ 24