Каримова Гулсара Оморбековнаны № 12 көп мандаттуу шайлоо округу боюнча Кыргыз Республикасынын Жогорку Кеңешинин депутаттыгына талапкер кылып каттоодон баш тартуу жөнүндө

2025-жылдын 7-октябрында Кыргыз Республикасынын Шайлоо жана референдум өткөрүү боюнча борбордук комиссиясына Каримова Гулсара Оморбековнадан № 12 көп мандаттуу шайлоо округу боюнча Кыргыз Республикасынын Жогорку Кеңешинин депутаттыгына талапкер кылып өзүн өзү-көрсөтүү тартибинде шайлоого катышуу ниети жөнүндө арыз келип түшкөн.

Кыргыз Республикасынын Шайлоо жана референдум өткөрүү боюнча борбордук комиссиясынын 2025-жылдын 26-сентябрындагы №78 токтому бекитилген №6¹ формага ылайык Диний ишмерлер үчүн чектөөлөрдү сактоо жөнүндө декларацияда Каримова Гулсара Оморбековна “Өзүн диний ишмер эмесмин” деп билдирген.

Ошондой эле Кыргыз Республикасынын Президентине караштуу Дин иштери жана этностор аралык мамилелер боюнча улуттук агенттиктин 2025-жылдын 11-октябрындагы КПҮ № 43 маалымкатына ылайык, Каримова Гулсара Оморбековна “Келечек Умма” диний уюмун түзүү боюнча демилгечилердин 2022-жылдын 1-майындагы өткөн чогулушунун № 1 протоколунун негизинде аталган диний уюмдун директору болуп дайындалган. Ошондой эле, Каримова Гулсара Оморбековна 2024-жылга карата берген отчету боюнча “Келечек Умма” диний уюмунун жетекчиси катары көрсөтүлгөн. Мындан сырткары, Каримова Гулсара Оморбековна “Сыддык Мухаммед Балту” диний окуу борборунун директору кызматын 2023-жылдан 2025-жылга чейин аркалап келген. “Сыддык Мухаммед Балту” диний окуу борбору 2023-жылдын 13-июнунда Кыргыз Республикасынын Президентине караштуу Дин иштери жана этностор аралык мамилелер боюнча улуттук агенттиктин каттоосунан № 0838-ДОЖ номери менен өткөн. Аталган диний окуу борбору өзүнүн ишмердүүлүгүн Жалал-Абад облусунун аймагында жүргүзүп келет.

Талапкерлер, саясий партиялар тарабынан берилген шайлоо документтерин кабыл алуу жана текшерүү боюнча жумушчу топ (мындан ары – Жумушчу топ) Каримова Гулсара Оморбековнанын Кыргыз Республикасынын Жогорку Кеңешинин депутаттыгына талапкерлерге коюлуучу мыйзамдардын талаптарына ылайык келбестигин аныктап, анын депутаттыгыкка талапкер кылып каттоодон баш тартуу жөнүндө сунуш берген.

2025-жылдын 28-октябрында болуп өткөн Жумушчу топтун отурумунда Каримова Гулсара Оморбековнанын ыйгарым укуктуу өкүлү катышкан.

“Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамнынын 3-беренесинин 4-бөлүгүнө ылайык Президенттин кызмат ордуна, Жогорку Кеңештин депутаттыгына шайланууга төмөнкү адамдар укуксуз: диний ишмерлер өздөрүнүн диний ишин токтоткондон кийин 5 жыл ичинде.

Жумушчу топтун № 12 көп мандаттуу шайлоо округу боюнча Каримова Гулсара Оморбековнанын Кыргыз Республикасынын Жогорку Кеңешинин депутаттыгына талапкер катары каттоосун жокко чыгаруу жөнүндө корутундусунун негизинде, “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамынын 3-беренесинин 4-бөлүгүнүн 1-пунктун жетекчиликке алып, “Кыргыз Республикасынын Шайлоо жана референдум өткөрүү боюнча борбордук комиссиясы жөнүндө” Кыргыз Республикасынын конституциялык Мыйзамынын 3, 4, 8-беренелерине ылайык, Кыргыз Республикасынын Шайлоо жана референдум өткөрүү боюнча борбордук комиссиясы чечим кылат:

1. Каримова Гулсара Оморбековнаны № 12 көп мандаттуу шайлоо округу боюнча Кыргыз Республикасынын Жогорку Кеңешинин депутаттыгына талапкер кылып каттоодон баш тартылсын.
2. Бул чечим “Эркин-Тоо” мамлекеттик расмий гезитине жана Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.
3. Бул чечимдин аткарылышын контролдоо Кыргыз Республикасынын Жогорку Кеңешинин депутаттарын шайлоодо талапкерлер, саясий партиялар тарабынан берилген шайлоо документтерин кабыл алуу жана текшерүү боюнча жумушчу топтун жетекчиси А.С. Жупуевага жүктөлсүн.

        Төрага                                                                                                                                                        Т. Шайназаров

Бишкек ш., 2025-ж. 28-октябры

№625