Жаңылыктар

2013-жылдын 26-майына дайындалган Кыргыз Республикасынын жергиликтүү кеңештеринин депутаттарын шайлоону даярдоонун жана өткөрүүнүн  сметасы 15 475 400 (он беш миллион төрт жүз жетимиш беш миң төрт жүз) сом суммасында бекитилди. Мындай чечим Кыргыз Республикасынын шайлоо жана референдум өткөрүү боюнча Борбордук комиссиясынын кезектеги жыйынында кабыл алынды жана БШКнын аппаратынын финансылык жана материалдык-техникалык камсыздоо башкармалыгына каржылоону бекитилген сметага ылайык жүргүзүү тапшырылды. Бул жөнүндө Борбордук шайлоо комиссиясынын басма сөз кызматы билдирди. Мурда кабарлагандай  мамлекет башчысынын 2013 жылдын 11жана 15 апрелинде кол койгон  “Кыргыз Республикасынын жергиликтүү кеңештерин таркатуу жана Кыргыз Республикасынын жергиликтүү кеңештерине  мөөнөтүнөн мурда шайлоо күнүн дайындоо жөнүндөгү» жана  «Кыргыз Республикасынын Жалал-Абад, Ош, Баткен, Ысык-Көл жана Чүй облустарынын жергиликтүү кеңештеринин депутаттарын кайталап шайлоону дайындоо жөнүндөгү» Жарлыктарынын негизинде ушул жылдын 26- майында  жергиликтүү кенештеге шайлоолор өткөрүлөт.                           Кыргыз Республикасынын  Борбордук шайлоо комиссиясынын басма сөз кызматы   

2013-жылдын 15-апрелинде, Кыргыз Республикасынын Президенти Алмазбек Атамбаев «Кыргыз Республикасынын Жалал-Абад, Ош, Баткен, Ысык-Көл жана Чүй облустарынын жергиликтүү кеңештеринин депутаттарын кайталап шайлоону дайындоо жөнүндө» Жарлыкка кол койду. Жарлыкка ылайык, Кыргыз Республикасынын Конституциясынын 64-беренесинин 1-бөлүгүнүн 2-пунктуна, «Жергиликтүү кеңештердин депутаттарын шайлоо жөнүндө» Кыргыз Республикасынын Мыйзамынын 39-58-беренелерине ылайык, токтом кылынат: Кыргыз Республикасынын Шайлоо жана референдум өткөрүү боюнча борбордук комиссиясынын сунушу кабыл алынсын жана Кыргыз Республикасынын Жалал-Абад облусунун Сузак районундагы Ак-Булак шайлоо округу боюнча Кызыл-Туу айылдык кеңешине, Ош облусунун Араван районундагы Токтогул шайлоо округу боюнча С.Юсупов атындагы айылдык кеңешке, Кара-Суу районундагы Учар шайлоо округу боюнча Төлөйкөн айылдык кеңешине жана Мамажанов  шайлоо округу боюнча Жоош айылдык кеңешине, Кара-Кулжа районундагы Биймырзев шайлоо округу боюнча Кара-Кулжа айылдык кеңешине, Баткен облусунун Кадамжай районундагы Совет айылдык кеңешине, Ысык-Көл облусунун Ысык-Көл районундагы Кара-Ой шайлоо округу боюнча Кара-Ой айылдык кеңешине, Ак-Суу районундагы Бөрү-Баш шайлоо округу боюнча Бөрү-Баш айылдык кеңешине, Жети-Өгүз районундагы Батыш жана Жалгыз-Өрүк  шайлоо округу боюнча Кызыл-Суу айылдык кеңешине, Чүй облусунун  Сокулук районундагы  №2,3,4 шайлоо округдары боюнча Новопавловка айылдык кеңешине жана №1,3 шайлоо округдары боюнча Орок айылдык кеңешине, Москва районундагы №1 шайлоо округу боюнча Александровка айылдык кеңешине, Жайыл районундагы №1 шайлоо округу боюнча  Красновосточный айылдык кеңешине, Аламүдүн районундагы №2 шайлоо округу боюнча Таш-Мойнок айылдык кеңешине  кайталап шайлоолор 2013-жылдын 26-майына, жекшембиге  дайындалсын. Кыргыз Республикасынын Шайлоо жана референдум өткөрүү боюнча борбордук комиссиясы жогоруда аталган жергиликтүү өз алдынча башкаруунун өкүлчүлүктүү органдарына шайлоону өткөрүүнү Кыргыз Республикасынын мыйзамдарына ылайык уюштурсун. Кыргыз Республикасынын Өкмөтү: - шайлоону өткөрүү үчүн зарыл финансылык каражаттарды Кыргыз Республикасынын Шайлоо жана референдум өткөрүү боюнча борбордук комиссиясынын чыгымдарынын сметасына ылайык бөлсүн; - шайлоого даярдык жана өткөрүү мезгилинде мыйзамдуулукту, жарандардын укуктарын жана эркиндиктерин камсыз кылуу, коомдук тартипти сактоо боюнча чараларды көрсүн. Жергиликтүү мамлекеттик администрациялардын башчылары жана жергиликтүү өз алдынча башкаруу органдары тийиштүү шайлоо комиссияларына шайлоого даярдык көрүүдө жана өткөрүүдө шайлоочулардын тизмелерин иреттештирүү, тактоо, түзүү, уюштуруучулук жана материалдык-техникалык маселелерди чечүүдө көмөк көрсөтсүн.  Бул Жарлыктын аткарылышын контролдоо Кыргыз Республикасынын Президентинин Аппаратынын мамлекеттик жана аймактык башкаруу жана кадрдык иш бөлүмүнө жүктөлдү.  Бул Жарлык расмий жарыяланган күндөн тартып күчүнө кирет.  

Бүгүн 16- апрелде Ноокат районундагы Көк-Жар жана Он Эки-Бел айылдык аймактарында жергиликтүү өз алдынча башкаруусунун аткаруу органдарынын башчыларын – айыл өкмөттөрүнүн башчыларын шайлоо өткөрүлөт. Тиешелүү аймактык шайлоо комиссиясына шайлоону Кыргыз Республикасынын мыйзамдарына ылайык өткөрүү тапшырылды. Бул жөнүндө Республиканын Борбордук шайлоо комиссиясынын басма сөз кызматы билдирди.                              Кыргыз Республикасынын Борбордук шайлоо комисcиясынын басма сөз кызматы

Бүгүн 15- апрелде, республиканын 12 айылдык аймактарында айыл өкмөт башчыларын шайлоо өтөт. Жергиликтүү өз алдынча башкаруусунун аткаруу органдарынын башчыларын шайлоо, Жайыл районундагы Сары-Булак Чүй районундагы Искра, Жумгал районундагы Жаңы-Арык,  Лейлек районундагы Жаңы-Жер, Кадамжай районундагы Чаувай, Ак-Турпак, Алай районундагы Гүлчө, Чоң-Алай районундагы Жекенди, Ноокат районундагы Кара-Таш,Кеңеш,  Өзгөн районунудагы Дон-Булак, Чаткал районунудагы Терек- Сай айылдык аймактарында өткөрүлөт. Тиешелүү аймактык шайлоо комиссияларына шайлоону Кыргыз республикасынын мыйзамдарына ылайык өткөрүү тапшырылды.                                      Борбордук шайлоо комиссиясынын басма сөз кызматы

Ушул жылдын 10 апрелине белгиленген Ош областынын Кара- Суу районундагы Кара-Суу шаарынын башчысын шайлоо бул кызматка талапкер болуп  катталган Уран Буркановдун шайлоого катышуудан баш тартуу жөнүндөгү арызынын негизинде өткөн жок деп табылды. Бул жөнүндө Борбордук шайлоо комиссиясынын басма сөз кызматы билдирди. Кыргыз Республикасынын Шайлоо жана референдум өткөрүү боюнча борбордук комиссиясынын 2013-жылдын 1-мартындагы № 26 токтому менен Ош облусунун Кара-Суу районундагы Кара-Суу шаарынын мэрин шайлоо 2013-жылдын 14-мартына дайындалган, бирок шаардын мэринин кызмат ордуна талапкер жоктугуна байланыштуу шайлоо болбой калган. Борбордук шайлоо комисиясынын басма сөз кызматы

Бүгүн, 2013-жылдын 11-апрелинде, Кыргыз Республикасынын Президенти Алмазбек Атамбаев«Кыргыз Республикасынын жергиликтүү кеңештерин таркатуу жана Кыргыз Республикасынын жергиликтүү кеңештерине  мөөнөтүнөн мурда шайлоо күнүн дайындоо жөнүндө» Жарлыкка кол койду. Жарлыкка ылайык, жергиликтүү өз алдынча башкаруунун аткаруу  органдарынын башчылары шайланбагандыгына байланыштуу, Кыргыз Республикасынын Конституциясынын 64-беренесинин 1-бөлүгүнүн  2-пунктун, «Жергиликтүү өз алдынча башкаруу жөнүндө» Кыргыз Республикасынын Мыйзамынын 43-беренесинин 5-бөлүгүн,  49-беренесинин 6-бөлүгүн жана «Жергиликтүү кеңештердин депутаттарын шайлоо жөнүндө» Кыргыз Республикасынын Мыйзамынын  48-беренесинин 2-бөлүгүн жетекчиликке алып, токтом кылынат: Кыргыз Республикасынын Шайлоо жана референдум өткөрүү боюнча борбордук комиссиясынын сунушу кабыл алынсын жана Кыргыз Республикасынын Жалал-Абад облусунун Майлуу-Суу, Көк-Жаңгак, Ош облусунун Ноокат шаарларынын жергиликтүү кеңештери, Чүй облусунун Жайыл районундагы Полтавка, Кемин районундагы Көк-Ойрок, Жалал-Абад облусунун Аксы районундагы Кара-Жыгач, Ысык-Көл облусунун Тоң районундагы Улахол, Ысык-Көл районундагы Бостери, Ош облусунун Кара-Суу районундагы Ак-Таш айылдык кеңештери таркатылсын. Жогоруда аталган жергиликтүү кеңештерге мөөнөтүнөн мурда шайлоо 2013-жылдын 26-майына, жекшембиге дайындалды. Кыргыз Республикасынын Шайлоо жана референдум өткөрүү боюнча борбордук комиссиясы жергиликтүү өз алдынча башкаруу органдарынын жогоруда аталган өкүлчүлүктүү органдарына мөөнөтүнөн мурда шайлоону өткөрүүнү Кыргыз Республикасынын мыйзамына ылайык уюштурсун.     Кыргыз Республикасынын Өкмөтү : - мөөнөтүнөн мурда шайлоону өткөрүү үчүн зарыл финансылык каражаттарды Кыргыз Республикасынын Шайлоо жана референдум өткөрүү боюнча борбордук комиссиясынын чыгымдарынын сметасына ылайык бөлсүн; - мөөнөтүнөн мурда шайлоону даярдоо жана өткөрүү мезгилинде мыйзамдуулукту, жарандардын укуктарын жана эркиндиктерин камсыз кылуу, коомдук тартипти сактоо боюнча чараларды көрсүн. Жергиликтүү өз алдынча башкаруунун аткаруу органдарынын башчылары жогоруда аталган кеңештердин карамагына таандык документтердин, материалдардын, ошондой эле материалдык-техникалык баалуулуктардын сакталышын камсыз кылуу боюнча   чараларды көрсүн.  Бул Жарлыктын аткарылышын контролдоо Кыргыз Республикасынын Президентинин Аппаратынын мамлекеттик жана аймактык башкаруу жана кадрдык иш бөлүмүнө жүктөлдү.  Жарлык расмий жарыяланган күндөн тартып күчүнө кирет.   Кыргыз Республикасынын Борбордук шайлоо комиссиясынын басма сөз кызматы  

Бүгүн 2013-жылдын 10-апрелинде Нарын облусунун Нарын районундагы Чет-Нура айыл өкмөтүнүн жана Жалал-Абад облусунын Тогуз-Торо районундагы Тогуз-Торо айыл өкмөтүнүн башчыларын кайра шайлоо болот. КР БШКнын басма сөз кызматы билдиргендей, Борбордук шайлоо комиссиясынын токтому менен Чет-Нура айыл өкмөтүнүн башчысын шайлоо 2013-жылдын 20-мартына, ал эми Тогуз-Торо айыл өкмөтүнүн башчысын шайлоо 12-февралына дайындалган. Бирок жогоруда көрсөтүлгөн айылдык кеңештердин депутаттары айыл өкмөттөрүнүн башчыларын шайлабагандыгына байланыштуу шайлоо өткөн эмес. Тиешелүү аймактык шайлоо комиссияларына шайлоону мыйзамдардын талаптарына ылайык уюштуруу жана өткөрүү милдети тапшырылган. Кыргыз Республикасынын Борбордук шайлоо комиссиясынын басма сөз кызматы

Ысык-Көл облусунун шаарынын мэрин жана төрт айыл өкмөтүнүн башчыларын шайлоо 2013-жылдын 25-апрелине дайындалды. Ошондой эле шайлоону өткөрүү графиги бекитилди. Тиешелүү аймактык шайлоо комиссияларына шайлоону республиканын мыйзамдарына ылайык өткөрүүнү уюштуруу тапшырылган. Алсак, Караколдон тышкары жергиликтүү өз алдынча башкаруунун аткаруу органдарынын – Сокулук районунун Төш-Булак жана Саз айыл өкмөттөрүнүн, Чүй районунун Кегети айыл өкмөтүнүн, Жумгал районунун Миң-Куш айыл өкмөтүнүн башчылары шайланат. Кыргыз Республикасынын Борбордук шайлоо комиссиясынын басма сөз кызматы  

Бүгүн 2013-жылдын 10-апрелинде Ош облусунун Кара-Суу районундагы Кара-Суу шаарынын мэрин шайлоо болот. КР БШКнын басма сөз кызматы билдиргендей, мурда шайлоо 2013-жылдын 14-мартына дайындалган, бирок шаардын мэринин кызмат ордуна талапкер жок болгондугуна байланыштуу шайлоо өткөн эмес. Кара-Суу аймактык шайлоо комиссиясына шайлоону Кыргыз Республикасынын мыйзамдарына ылайык уюштуруу жана өткөрүү тапшырылган. Кыргыз Республикасынын Борбордук шайлоо комиссиясынын басма сөз кызматы 

01-04-2013 10:55 БШК «Ата-Журт» фракциясынын мүчөлөрү Садыр Жапаровдун, Камчыбек Ташиевдин жана Талант Мамытовдун депутаттык мандаттары жагынан чечимди шаардык апелляциялык соттун чечиминен кийин гана кабыл алат. Бул жөнүндө 1-апрелде АКИpress агенттигине КР БШКнын мүчөсү Ишенбай Кадырбеков билдирди. «Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө» Мыйзамда кандай учурда депутат өз мандатынан ажыратылышы мүмкүн экендиги айтылган. Эгерде апелляциялык сот парламентарийлерди түрмөгө камоого өкүм чыгарса, БШК депутаттык мандаттардан ажыратуу жөнүндө чечим кабыл алат», - деп айтты ал. КР Конституциясына ылайык, Жогорку Кеңештин депутаттарынын ыйгарым укуктары төмөнкүдөй учурларда мөөнөтүнөн мурда токтотулат: 1) ал депутаттык ыйгарым укуктарын токтоткондугу же фракциядан чыккандыгы жөнүндө жазуу жүзүндө арыз бергенде; 2) жарандыктан чыкканда же болбосо башка жарандыкты алганда; 3) башка ишке которулганда же депутаттык ыйгарым укуктарды аткаруу менен айкалышпаган ишин таштабаганда; 4) шайлоолор жараксыз деп табылганда; 5) туруктуу жашоо үчүн Кыргыз Республикасынын чегинен чыгып кеткенде; депутат сот тарабынан иштөөгө жөндөмсүз деп таанылганда; 6) ага карата соттун күнөө коюу өкүмү мыйзамдуу күчүнө киргенде.   Кыргыз Республикасынын Борбордук шайлоо комиссиясынын басма сөз кызматы 

Кыргыз Республикасынын Шайлоо жана референдум өткөрүү боюнча борбордук комиссиясынын токтому менен Ош облусунун Кара-Суу районунун Кара-Суу шаарынын мэрин шайлоо датасы жаңы талапкерлерди көрсөтүү менен 2013-жылдын 10-апрелине которулду. Буга чейин шайлоо шаардын мэри кызматына талапкерлер жок болгондугуна байланыштуу өтпөй калган. Кара-суу аймактык шайлоо комиссиясына шайлоону мыйзамдарга ылайык даярдоо жана өткөрүү милдети тапшырылган.  Кыргыз Республикасынын Борбордук шайлоо комиссиясынын басма сөз кызматы

2013-жылдын 28-март. Нарын облусунун Нарын районунун Чет-Нура айыл өкмөтүнүн, Жалал-Абад облусунун Тогуз-Торо районунун Тогуз-Торо айыл өкмөтүнүн жергиликтүү өз алдынча башкаруусунун аткаруу органдарынын башчыларын кайра шайлоо 10-апрелге дайындалды. Бул чечим Кыргыз Республикасынын Шайлоо жана референдум өткөрүү боюнча борбордук комиссиясынын кезектеги жыйналышында кабыл алынды Тактап кетсек, Чет-Нура айыл өкмөтүнүн башчысын шайлоо 2013-жылдын 20-мартына, ал эми Тогуз-Торо айыл өкмөтүнүн башчысын – 12-февралына дайындалган. Бирок, жогоруда аталган айылдык кеңештеринин депутаттары тарабынан айыл өкмөт башчылары шайланбай калгандыктан, ал жерлерде шайлоо болбой калган. Тиешелүү аймактык шайлоо комиссияларына шайлоону мыйзамдардын талаптарына ылайык уюштуруу жана өткөрүү милдети тапшырылды.   Кыргыз Республикасынын Борбордук шайлоо комиссиясынын басма сөз кызматы

28-март. Кыргыз Республикасында  жергиликтүү өз алдынча башкаруусунун аткаруу органдарынын башчыларын шайлоо 2013-жылдын 15-, 16 – апрелинде өтөт. Бул чечим Кыргыз Республикасынын Шайлоо жана референдум өткөрүү боюнча борбордук комиссиясынын кезектеги жыйналышында кабыл алынды, ошондой эле шайлоону өткөрүү графиги бекитилди. Шайлоо өлкөнүн 15 айылдык аймагында өтөт. Чүй облусу № к/н Айыл өкмөттүн аталышы Шайлоо өткөрүү датасы Жайыл району   Сары-Булак 15.04.2013 -ж. Чүй району   Искра 15.04.2013 -ж.          Нарын облусу    Жумгал   району    Түгөл –Сай 15.04.2013 -ж.   Жаңы-Арык 15.04.2013 -ж. Баткен  облусу Лейлек  району   Жаңы-Жер 15.04.2013 -ж. Кадамжай  району   Чаувай 15.04.2013 -ж.   Ак-Турпак 15.04.2013 -ж.   Ош  облусу Алай  району   Гүлчө 15.04.2013 -ж. Чоң-Алайу  району   Жекенди 15.04.2013 -ж. Ноокат  району   Кара-Таш 15.04.2013 -ж.   Көк-Жар 16.04.2013 -ж.   Кеңеш 15.04.2013 -ж.   Он Эки-Бел 16.04.2013 -ж. Өзгөн району   Дон-Булак 15.04.2013 -ж. Жалал-Абад  облусу   Чаткал  району   Терек-Сай 15.04.2013 -ж.          Кыргыз Республикасынын Борбордук шайлоо комиссиясынын басма сөз кызматы

27-03-2013 12:47 Кыргыз Республикасынын Шайлоо жана референдум өткөрүү боюнча борбордук комиссиясы өзүнүн 2013-жылдын 27-мартында өткөн жыйналышында “2013-жылдын 14-, 19-, 20-мартында болуп өткөн Кыргыз Республикасынын жергиликтүү өз алдынча башкаруусунун аткаруу органдарынын башчыларын шайлоонун натыйжалары жана добуш берүүнүн жыйынтыктары тууралуу протоколдорду бекитүү жөнүндө” токтомду кабыл алып, өткөн шайлоолорду болуп өттү деп тапты. Кыргыз Республикасынын жергиликтүү өз алдынча башкаруусунун аткаруу органдарынын башчылары болуп төмөнкү талапкерлер шайланды:   Катар № Аткаруу органынын аталышы Шайланган башчынын Ф.А.Ж. Ысык-Көл облусу Ысык-Көл району   1. Өрүктү Токтосопиев Каныбек Молдокматович Жети-Өгүз району   2. Оргочор Супатаев Канатбек Аалиевич 3. Светлая поляна Мамытканов Джылкычий Кукуневич Талас облусу Талас району   4. Көк-Ой Узгенов Самарбек Торобекович Бакай-Ата району   5. Бакай-Ата Бердалиев Кубандык Кыдыкович 6. Шадыкан Ызабеков Медеркул Сагынбекович Нарын облусу Ак-Талаа району   7. Коңорчок Сатындиев Курманбай Мамбетжусупович Нарын району   8. Ак-Кудук Касымов Самат Шайлоевич       Чүй облусу Аламүдүн району   9. Лебединовка Солтонов Алкан Шайлообекович Сокулук району   10. Сокулук Майгулаков Маратбек Эмильбекович Ош облусу Кара-Суу району   11. Кашкар-Кыштак Насирдинов Мухидин Салайдинович Кыргыз Республикасынын Борбордук шайлоо комиссиясынын басма сөз кызматы

Ысык-Көл райондук сотунун өкүмү менен Ысык-Көл районунун Кара-Ой округу боюнча № 3026 шайлоо участкасынын катчысы жана мүчөсү Джумахан Абабакирова менен Ирина Кожонова шайлоо документтерин массалык бурмалоону жасагандыгы үчүн күнөлүү деп табылды. Добуш берүү күнү 2012-жылдын 25-ноябрында № 3026 шайлоо участкасында Кара-Ой айылдык кеңешинин депутаттарын шайлоодо добуш берүү башталаар алдында шайлоо бюллетендерин эки жолу кайра эсептегенде бюллетендердин кем экендиги айкын болгон. Көрсөтүлгөн участкада добуш берүүнүн жүрүшүндө башка адамдар үчүн добуш берүү, шайлоочулардын тизмесине киргизилбеген адамдарга шайлоо бюллетендерин берүү фактылары орун алган, бул УШКнын мүчөлөрүнүн түшүнүк каттары менен ырасталат. Жогоруда көрсөтүлгөн укук бузуулардын негизинде Ысык-Көл АШК 2012-жылдын 28-ноябрындагы протоколу менен Кара-Ой шайлоо округунун № 3026 шайлоо участкасында добуш берүүнүн жыйынтыктарын жараксыз деп тапкан жана материалдар Башкы прокуратурага берилген. Ысык-Көл райондук соту ишти өзгөчө тартипте карап чыккан жана Джумахан Абабакирова менен Ирина Кожонова мурда жазык жоопкерчилигине тартылбагандыгын, күнөөсүн толугу менен мойнуна алгандыгын эске алып, аларга шарттуу түрдө 3 жана 2 жылга эркинден ажыратууга жазаны дайындаган. Бул өкүм мыйзамдуу күчүнө кирди. Кыргыз Республикасынын Борбордук шайлоо комиссиясынын басма сөз кызматы

  Урматтуу Кыргызстандыктар! Сиздерди Нооруз майрамыңыздар менен чын дилимден куттуктаймын. Куттуу  Нооруз  майрамы жаңылануунун жана өзгөрүүнүн башаты болуп, өлкөбүзгө бакубат жашоону, тынчтык жана токчулук алып келсин деген аруу тилегимди билдирем!  Кылымдарды карыткан  бул майрамды элибиз табигаттын жаңырышы, кыштын ызгаарынан кийин жаңы тиричиликтин бүчүр түптөлүшү катары кабыл алып, жакшы маанай менен тосушат. Кыргызстан калкы бул күндү чын ниетинен айкөлдүктүн жана ынтымактын майрамы деп белгилешет. Анткени Нооруз майрамы – бардык элдерди достукка, ишенимге жана биримдикке чакырып, ар бир үйгө,  ар бир үй бүлөгө жакшы тилек менен кирип келген күн- түн теңелген жаз майрамы. Бул майрам Кыргыз мамлекетинин өсүп өнүгүүсү социалдык маселелердин чечеилиши берекелүү турмуш тынчтык менен биримдиктин бекемделиши сыяктуу жакшылыктын жышаанынын башаты болсун. Анткени учурда келечектеги чоң ийгиликтерге жетиш үчүн экономиканын бекем пайдубалын түзүп жатабыз.  Сиздерге тынчтык менен бейкутчулук, үй бүлөңөргө сак саламаттык менен бакыт таалай каалаймын. Теңирим өзү колдоп, бардык инсандарга ыйман берсин! Үй-бүлөдө ден-соолук, жергебизде тынчтык, элибизде ынтымак болсун! Майрамыңыздар менен, урматтуу мекендештер! Сиздерди терең урматтоо менен, Кыргыз Республикаынын Шайлоо жана референдум өткөрүү боюнча борбордук комиссиясынын төрагасы Туйгунаалы Абдраимов.