Башкы
Жаңылыктар
Жаңылыктар
Талас облусунун Талас районунун Бекмолдо айыл өкмөтүнүн башчысын шайлоосу дайындалды
Талас облусунун Талас райондук мамлекеттик администрациясынын башчысы – акиминин 2019-жылдын 14-февралындагы № 37 буйругу менен Бекмолдо айыл өкмөтүнүн башчысы К.Молдобеков, өзү берген арызынын негизинде, ээлеген кызматынан бошотулган.
КР БШКнын токтомуна ылайык, Талас облусунун Талас районунун Бекмолдо айыл өкмөтүнүн башчысын шайлоо 2019-жылдын 6-мартына саат 9-00дөн 12-00гө чейинкиге дайындалды.
Шайлоону Кыргыз Республикасынын мыйзамдарына ылайык уюштуруп, өткөрүү Талас АШКна тапшырылды.
Маалымат катары: “Жергиликтүү өз алдынча башкаруу жөнүндө" Кыргыз Республикасынын Мыйзамынын 48-беренесине ылайык жогорку билими жана мамлекеттик же болбосо муниципалдык кызматта 2 жылдан кем эмес иш стажы, же болбосо билим берүүнүн, саламаттык сактоонун мамлекеттик мекемелеринде же уюмдардын, мекемелердин жана жеке менчик чарбакер субъекттердин жетекчилик кызматтарында 3 жылдан кем эмес иш стажы бар аракетке жөндөмдүү Кыргыз Республикасынын жараны айыл өкмөтүнүн башчысы боло алат. Кылмыш жасагандыгы үчүн мыйзамдарда белгиленген тартипте алып салынбаган же жоюлбаган соттуулугу бар Кыргыз Республикасынын жараны айыл өкмөтүнө башчы болушу мүмкүн эмес.
КР БШК аппаратынын маалымат бөлүмү
Кененирээк билүү >>
Ысык-Көл облусунун Ысык-Көл районунун Чоң-Сары-Ой айыл өкмөтүнүн башчысынын шайлоодогу добуш берүүнүн жыйынтыктары жана шайлоонун натыйжалары тууралуу протоколдор бекитилди
2019-жылдын 15-февралында КРнын БШКсы 2019-жылдын 6-февралында Ысык-Көл облусунун Ысык-Көл районунун Чоң-Сары-Ой айыл өкмөтүнүн башчысын шайлоодогу добуш берүүнүн жыйынтыктары жана шайлоонун натыйжалары тууралуу протоколдорду бекитти.
Протоколдордун негизинде:
- Ысык-Көл облусунун Ысык-Көл районунун Чоң-Сары-Ой айыл өкмөтүнүн башчысын шайлоо өттү деп табылып, Сарбагышев Максатбек Канатбекович айыл өкмөтүнүн башчысы болуп шайланды.
Шайланган айыл өкмөт башчысына белгиленген үлгүдөгү күбөлүк берүү Ысык-Көл аймактык шайлоо комиссиясына тапшырылды.
КР БШК аппаратынын маалымат бөлүмү
Кененирээк билүү >>
КР БШК жетекчилиги Индия Республикасынын Кыргыз Республикасындагы жаңы дайындалган Атайын жана Ыйгарым укуктуу Элчиси Алока Амитабх Димри мырза менен жолугушту
2019-жылдын 14-февралында КР БШК жетекчилиги Индия Республикасынын Кыргыз Республикасындагы жаңы дайындалган Атайын жана Ыйгарым укуктуу Элчиси Алока Амитабх Димри мырза менен жолугушту.
КР БШК Төрагасы Н. Шайлдабекова Элчи мырзаны дайындалышы менен куттуктап, ага жооптуу ишмердикте ийгиликтерди каалады.
КР БШК башчысы Элчи мырзага иденттештирүүдөн өтүүнүн жол-жоболору, жаңы шайлоо модели боюнча шайлоочулардын тизмелерин түзүү, шайлоо мезгилинде чет өлкөлөрдө жашаган же жүргөн Кыргыз Республикасынын жарандарынын шайлоо укуктарын камсыздоо маселелери, Туруктуу өнүктүрүү боюнча улуттук кеңеши тарабынан бекитилген шайлоо мыйзамдарын өркүндөтүү Стратегиясы жана аны жүзөгө ашыруу планы жөнүндө кыскача маалымат берди.
Тараптар мазмундуу жолугушуу үчүн бири-бирине ыраазычылыгын билдирип, Индия менен Кыргызстандын ортосундагы ар тараптуу сүйлөшүүлөрдү улантуу зарылдыгын белгилешти.
КР БШК аппаратынын маалымат бөлүмү
Кененирээк билүү >>
2019-жылдын 15-февралында өтө турган КР БШКнын отурумунун күн тартибинин долбоору
Өткөрүү датасы: 15 февраль 2019-ж.
Убактысы: 11:00
Өткөрүлүүчү жери: отурумдар залы
1. Ысык-Көл облусунун Ысык-Көл районунун Чоң-Сары-Ой айыл өкмөтүнүн башчысын шайлоодогу добуш берүүнүн жыйынтыктары жана шайлоонун натыйжалары тууралуу протоколдорду бекитүү жөнүндө
(Баяндамачы – Т.О. Айтикеев, шайлоолорду уюштуруу боюнча бөлүмдүн башчысы)
2. Талас облусунун Талас районунун Бекмолдо айыл өкмөтүнүн башчысын шайлоону дайындоо жөнүндө
(Баяндамачы – Т.О. Айтикеев, шайлоолорду уюштуруу боюнча бөлүмдүн башчысы)
3. Кыргыз Республикасынын жергиликтүү кеңештеринин кээ бир депутаттарынын ыйгарым укуктарын мөөнөтүнөн мурда токтотуу жана бош калган депутаттык мандаттарды жергиликтүү кеңештердин депутаттыгына талапкерлерге өткөрүп берүү жөнүндөгү Аламудун, Ак-Талаа, Нарын, Тогуз-Торо, Сузак жана Түп аймактык шайлоо комиссияларынын чечимдерин бекитүү тууралуу
(Баяндамачы – Т.О. Айтикеев, шайлоолорду уюштуруу боюнча бөлүмдүн башчысы)
4. Ар түрдүү маселелер
Төрага
Кененирээк билүү >>
Кыргыз Республикасынын Шайлоо жана референдум өткөрүү боюнча борбордук комиссиясынын жарандарга жана саясий партияларга КАЙРЫЛУУСУ
Урматтуу Кыргыз Республикасынын жарандары жана саясий партиялардын өкүлдөрү!
Кыргыз Республикасынын Шайлоо жана референдум өткөрүү боюнча борбордук комиссиясы Кыргыз Республикасынын кээ бир аймактык шайлоо комиссияларынын - Жалал-Абад облусунун Майлуу-Суу, Кара-Көл, Токтогул, Ысык-Көл облусунун Каракол, Ак-Суу, Нарын облусунун Ак-Талаа, Ош облусунун Кара-Кулжа, Талас облусунун Талас шаардык, Чүй облусунун Ысык-Ата, Сокулук, Москва жана Панфилов аймактык шайлоо комиссияларынын резервдерин толуктоо максатында, саясий партиялардан, жергиликтүү өз алдынча башкаруусунун өкүлчүлүктүү органдарынан өкүлдөрдү көрсөтүү тууралуу жарыялайт.
Аймактык шайлоо комиссиялары – жарандардын шайлоо укуктарын коргоону жана ишке ашырууну камсыз кылган, шайлоону даярдоону жана өткөрүүнү уюштурган коллегиалык орган болуп саналат. Аймактык шайлоо комиссияларынын курамындагы иш жооптуу жана шайлоо мыйзамдарына ылайык так жүргүзүлөт.
Ошол себептен, аймактык шайлоо комиссияларынын резервдерине талапкерлерди көрсөтүүдө жарандардын макулдугун, алардын шайлоо комиссияларынын ишине даярдык деңгээлин, иш тажрыйбасын эске алуу зарыл.
Аймактык шайлоо комиссияларынын резервдерине жарандардын чогулушунан, коомдук бирикмелерден талапкерлерди көрсөтүү жөнүндө протоколдору чогулуштун төрагасынын жана катчысын колтамгасы менен күбөлөндүрүлүшү керек. Протоколго жашаган жери көрсөтүлгөн жана кол тамгалары менен күбөлөндүрүлгөн чогулушка катышкандардын тизмеси тиркелүүгө тийиш.
Саясий партиялардан талапкерлерди көрсөтүү алардын уставына ылайык жүргүзүлөт. БШКага саясий партиянын жетекчисинин (жана чогулуштун төрагасынын) колтамгасы жана мөөрү менен күбөлөндүргөн тийиштүү документ тапшырылат.
Жогоруда көрсөтүлгөн документтерге төмөнкүлөр тиркелет:
-аймактык шайлоо комиссиялардын резервинде иштөөгө макулдугу жөнүндө талапкердин арызы жана Кыргыз Республикасынын шайлоо мыйзамдарынын ченемдерин сактоо жөнүндө милдеттенмеси;
-паспортунун көчүрмөсү;
-иштеген, окуган жерин, билимин көрсөтүү менен өмүр баянына тиешелүү маалыматтары (кадрларды эсепке алуу боюнча жеке баракчасы же резюмеси);
-байланыш маалыматтары: жашаган жеринин дареги, телефону.
«Кыргыз Республикасынын шайлоо жана референдум өткөрүү боюнча шайлоо комиссиялары жөнүндө» Кыргыз Республикасынын Мыйзамынын 22-беренесинин негизинде төмөнкүлөр АШКнын мүчөсү боло албайт:
- Жогорку Кеңештин депутаты, жергиликтүү кеңештин депутаты;
- мамлекеттик органдардын жана жергиликтүү өз алдынча башкаруу органдарынын кызмат адамдары;
- судья, укук коргоо жана фискалдык органдын кызматкери, аскер кызматчысы;
- талапкер, талапкердин жана саясий партиянын өкүлү;
- башка мамлекеттин жарандыгы бар адам;
- мыйзамда белгиленген тартипте, соттуулугу алып салынбаган же жоюлбаган адам;
- башка шайлоо комиссиясынын мүчөсү;
- шайлоо комиссиясынын мүчөлүгүнөн мөөнөтүнөн мурда терс негиздер боюнча бошотулган адамдар.
Көрсөтүү субъектилери шайлоо комиссиясынын мүчөлүгүнө талапкер, эреже катары, тиешелүү калк жашаган пунктта жашашы керек экенин эске алуулары зарыл.
Жарандардын чогулушунан, коомдук уюмдардан аймактык шайлоо комиссияларынын резервдерине талапкерлерди көрсөтүү жөнүндө протоколдор 2019-жылдын 15-мартынын саат 18-00гө чейин жергиликтүү өз алдынча башкаруунун өкүлчүлүктүү органдарында (шаардык, айылдык кеңештерде) кабыл алынат. Жергиликтүү өз алдынча башкаруунун өкүлчүлүктүү органдары сессиясында каралган документтерди (сессиялардын токтомдору жана көрсөтүлгөн талапкерлердин тизмеси менен) тиешелүү АШКга берет. БШКнын тиешелүү АШКдагы атайын өкүлү бүт документтерди БШКга тапшырат.
Аймактык шайлоо комиссияларынын резервдерине саясий партиялардан талапкерлерди көрсөтүү жөнүндө протоколдор 2019-жылдын 15-мартынын саат 18-00гө чейин саясий партиянын жетекчи органынын өкүлү тарабынан БШКга тапшырылат.
“Шайлоо комиссияларын түзүү жана таратуу тартиби жөнүндө” жана “Шайлоо комиссияларынын резервин түзүү жана жүргүзүү тартиби жөнүндө” жоболор менен Кыргыз Республикасынын Шайлоо жана референдум өткөрүү боюнча борбордук комиссиясынын www.shailoo.gov.kg расмий сайтынан таанышсаңыздар болот.
Маалымат алуу телефону: (0312) 62-08-29, (0312) 66-01-16
Эскертүү: “Кыргыз Республикасынын шайлоо жана референдум өткөрүү боюнча шайлоо комиссиялары жөнүндө” Кыргыз Республикасынын Мыйзамынын 19-беренесинин 2-пунктунун негизинде аймактык шайлоо комиссияларынын курамында ар бир саясий партиядан бирден ашык эмес өкүл болушу мүмкүн, башкача айтканда, тиешелүү аймактык шайлоо комиссиясынын курамында турган саясий партиялар (БШКнын расмий сайтын караңыз) ошол аймактык шайлоо комиссиясынын резервине документтерди берүүсү мүмкүн эмес.
Кененирээк билүү >>
Шайлоонун бүткүл дүйнөлүк күнүнө карата КР БШК Конрад Аденауэр атындагы Фонду менен биргеликте ЖМК өкүлдөрү үчүн “ЖМКда шайлоо өнөктүгүн чагылдыруу” деген темада мастер-класс өткөрдү
Шайлоонун бүткүл дүйнөлүк күнүнө карата КР БШК Конрад Аденауэр атындагы Фонду менен биргеликте ЖМК өкүлдөрү үчүн “ЖМКда шайлоо өнөктүгүн чагылдыруу” деген темада мастер-класс өткөрдү.
Эксперт катары экономика илимдеринин доктору, World Peoples Academyнин (Нью Йорк, АКШ) профессору, Нью-Йорк Илимдер академиясынын (NYAS) анык мүчөсү, Жарнаманын эл аралык ассоциациясынын (IAA) Россиядагы бөлүмүнүн мүчөсү А.В. Зыбкин чыгып сүйлөдү.
Мастер-класстын катышуучуларына КР БШК Төрагасы Н. Шайлдабекова ЖМКнын шайлоо процессине катышуусу жаатында мыйзамдардагы негизги өзгөртүүлөр (2018-2020-жылдары шайлоо мыйзамдарын өркүндөтүү Стратегиясын жүзөгө ашыруу үчүн иштелип чыгып, КР ЖКга киргизилген мыйзам долбоорлорунун алкагында) жана шайлоону чагылдырууда ЖМКнын маанилүү ролу жөнүндө айтып берди. БШК башчысы ЖМК өкүлдөрүнүн кабардар болуусун жогорулатууга багытталган бул иш-чараны өткөрүүгө көмөктөшкөнү үчүн өкүлү доктор Т. Кунце болуп саналган Конрад Аденауэр атындагы Фондуга ыраазычылыгын билдирди. “Шайлоону уюштуруучу катары БШКнын ролу – жигердүү жана пассивдүү шайлоо укуктарын жүзөгө ашыруу үчүн шарттарды камсыздоо, акыр-аягында шайлоочулар добуш берүү учурунда билдирген артык баалоосу жөнүндө калыс, так жана анык жыйынтык берүү. Бул маселеде ЖМКнын ролу кененирээк: алар шайлоочунун артык баалоосун кайра өзгөртүүгө гана көмөктөшпөстөн, ошондой эле шайлоо процессинде ал артык баалоону бекемдегенге, аны өзгөртүүгө мүмкүнчүлүктөрү бар, бул биздин жарандар үчүн ЖМКнын ролунун маанилүүлүгүн кеңейтет. Маалымат чындыгында объективдүү, анык жана өз убагында болуусу зарыл”.
Мастер-класс төмөнкү бир катар актуалдуу маселелерди талкуулоого багытталган:
- шайлоо процесси жана шайлоо өнөктүгүнүн ЖМКда чагылдырылуучу ченемдик укуктук актылары;
- шайлоо процессинин ачыктыгын жана объективдүүлүгүн мүнөздөөчү көрсөткүчтөр;
- ЖМКда шайлоо алдындагы үгүттү өткөрүү жана редакциялык саясаттын өзгөчөлүктөрү;
- шайлоо процессин чагылдырууда журналисттердин статусу, укуктары жана милдеттери;
- ЖМКда “проблемалуу” макалаларды даярдоонун негизги эрежелери;
- шайлоо процессин чагылдыруу пландарын түзүү;
- шайлоо убагында журналисттик этиканын негизги принциптери;
- шайлоо өткөрүү мезгилинде ЖМКны коргоо чаралары.
КР БШК аппаратынын маалымат бөлүмү
\
Кененирээк билүү >>
КР Жогорку Соту Бишкек шаардык кеңешинин бош мандатын кезексиз талапкерге өткөрүп берүү жөнүндө БАШКнын чечимин жокко чыгарган КР БШКнын токтомун мыйзамдуу деп тапты
Бүгүн Кыргыз Республикасынын Жогорку “Бишкек шаардык кеңешинин депутатынын бош мандатын өткөрүп берүү жөнүндө” Соту Бишкек АШКнын чечимин жокко чыгарган КР БШКнын 2019-жылдын 31-январындагы №7 токтомун мыйзамдуу жана негиздүү деп тапты.
Бишкек АШК катталган тизме боюнча №10 орунда кийинки болуп талапкер Э.Ш. Досиев турганына карабастан, бош мандатты кезексиз талапкер А.Х. Парпиевге (№ 12) өткөрүп берүү жөнүндө укукка каршы чечим кабыл алган.
Мында талапкер Э.Ш. Досиев тарабынан “Өнүгүү-Прогресс” саясий партиясынын сунуштамасына жана Бишкек АШКнын чечимине макул эместиги билдирилген. Бишкек АШКнын мандатты А.Х. Парпиевге өткөрүп берүү жөнүндө ал чечими КР БШКга даттанылган.
2016-жылы “Өнүгүү-Прогресс” партиясы Бишкек шаардык кеңештин 8 мандат алганын белгилей кетүү керек. Э.Ш. Досиев №8 менен катталган жана 2016-жылы шаардык кеңештин депутатынын мандатын алууга укугу бар болгон. Бирок Э.Ш. Досиев кезектүүлүгүн өткөрүп берип, катталган тизме боюнча №10 талапкер болуп калган. Учурда тизмеде №10 талапкер Э.Ш. Досиевдин кезеги келгенде партия анын Бишкек шаардык кеңешинин депутаты болууга даярдыгын эске албаган чечим кабыл алган.
Борбордук шайлоо комиссиясы саясий партиянын депутаттыкка талапкерлердин катталган тизмесинен бош мандатты ээлөөгө талапкерлерди сунуштоо укугун танбайт. Бирок саясий партиянын депутаттардын катталган тизмесинен бош мандатты ээлөөгө талапкерлерди сунуштоо укугу депутаттыкка талапкерлердин катталган тизмесиндеги кийинки талапкердин шайлоо укугун бузбоого тийиш.
Бул учурда талапкердин депутат болууга жана өз шайлоочуларына кызмат кылууга даярдыгы эске алынбай, шайланууга конституциялык укугу бузулган.
Өз кезегинде, партиянын депутат болууга өз укугун жүзөгө ашырууга укуктуу жана даяр, ал үчүн шайлоочулар добуш беришкен талапкердин позициясын эске албоосу ал талапкердин эле эмес, ал үчүн добуш беришкен шайлоочулардын дагы шайлоо укуктарын бузат.
КР БШК аппаратынын маалымат бөлүмү
Кененирээк билүү >>
Шайлоонун бүткүл дүйнөлүк күнүнө карата 2019-жылдын 9-февралында мамлекеттик органдардын ортосунда футбол боюнча турнир болуп өттү
Шайлоонун бүткүл дүйнөлүк күнүнө карата 2019-жылдын 9-февралында Кыргыз Республикасынын Шайлоо жана референдум өткөрүү боюнча борбордук комиссиясынын кубогу үчүн мамлекеттик органдардын ортосунда футбол боюнча турнир болуп өттү. Бардыгы 8 команда катышты: КР БШК, КР ЖК, Эсептөө палатасы, Акыйкатчынын аппараты, финансы, эмгек жана социалдык өнүктүрүү, билим берүү министрликтери, Мамлекеттик кадр кызматы.
Жарым финалга Жогорку Кеңештин, Эсептөө палатасынын, билим берүү жана финансы министрликтеринин командалары чыкты. КР Эсептөө палатасынын командасы фаворит болуп, кийинки турнирди өткөрүү боюнча эстафетаны кабыл алды.
КР БШК аппаратынын маалымат бөлүмү
Кененирээк билүү >>
7-февралда КР Жогорку Соту Район аралык сотунун 1-февралдагы чечимин жокко чыгарып, жаңы - Ж. Коргонбай уулунун арызындагы талаптарды канааттандыруудан баш тартуу жөнүндө чечим кабыл алды
7-февралда КР Жогорку Сотунун токтому менен Район аралык сотунун 1-февралдагы чечими жокко чыгарылып, жаңы - Ж. Коргонбай уулунун арызындагы талаптарды канааттандыруудан баш тартуу жөнүндө чечим кабыл алынды.
КР Жогорку Соту башка мамлекеттин жарандыгы бар КР жарандары жергиликтүү кеңештердин депутаты болууга укуксуз экенине байланыштуу кабыл алынган КР БШКнын токтомун жана “Бишкек шаардык кеңешинин депутатынын ыйгарым укуктарын мөөнөтүнөн мурда токтотуу жөнүндө” Бишкек АШКнын чечимин мыйзамдуу жана негиздүү деп тапты.
КР Жогорку Соту КР БШКнын мурда кабыл алынган токтому жана Бишкек АШКнын чечими Россия Федерациясынын жана Кыргыз Республикасынын компетенциялуу органдарынын БШК депутаты Ж. Коргонбай уулунун Россия жарандыгы бар экени тууралуу расмий маалыматтарына негизденген деп эсептейт.
КР БШК аппаратынын маалымат бөлүмү
Кененирээк билүү >>
КР БШК жергиликтүү кеңештердин кээ бир депутаттарынын ыйгарым укуктарын мөөнөтүнөн мурда токтотту
2019-жылдын 8-февралында КР БШК жергиликтүү кеңештердин кээ бир депутаттарынын ыйгарым укуктарын мөөнөтүнөн мурда токтотуу жана бош калган депутаттык мандаттарды шайланган депутаттардан кийинки талапкерлерге жана саясий партиялардын катталган талапкерлердин тизмесиндеги шайланган депутаттан кийинки талапкерлерге өткөрүп берүү жөнүндөгү Бишкек, Жети-Өгүз,Нарын, Жумгал, Кара-Буура, Кадамжай жана Ноокен АШКнын чечимдерин бекитти.
Ошентип:
-Бишкек шаардык кенешинин бош калган мандаты “Республика-Ата-Журт” саясий партиясынан катталган талапкерлердин тизмесиндеги талапкер - К. Эргешовго өткөрүлүп берилди;
- Ысык-Көл облусунун Жети-Өгүз районунун Барскоон айылдык кеңешиндеги депутат М.Раматов депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, бош калган мандат шайланган депутаттан кийинки талапкерге – Э.Имангожоевге өткөрүлүп берилди;
- Ысык-Көл облусунун Жети-Өгүз районунун Тамга айылдык кеңешиндеги депутат А. Дуйшембиев депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, бош калган мандат шайланган депутаттан кийинки талапкерге – К.Жусуевге өткөрүлүп берилди;
- Нарын облусунун Нарын районунун Ак-Кудук айылдык кеңешиндеги депутат Э.Примбаева депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, бош калган мандат шайланган депутаттан кийинки талапкерге – К.Абакировго өткөрүлүп берилди;
- Нарын облусунун Нарын районунун Ак-Кудук айылдык кеңешиндеги депутат Талант уулу Б. депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, бош калган мандат шайланган депутаттан кийинки талапкерге – К.Исаковго өткөрүлүп берилди;
- Нарын облусунун Жумгал районунун Чаек айылдык кеңешиндеги депутат Р. Алымкулов депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, бош калган мандат шайланган депутаттан кийинки талапкерге – К.Алышбаевага өткөрүлүп берилди;
- Талас облусунун Кара-Буура районундагы Чолпонбай айылдык кеңешиндеги депутат Т.Айталиев өз каалоосу менен депутаттык ыйгарым укуктарын мөөнөтүнөн мурда токтотту, бош калган мандат кийинки талапкер – Байыш уулу А. өткөрүлүп берилди;
- Баткен облусунун Кадамжай районунун Орозбеков айылдык кеңешиндеги депутат А.Гапаров депутаттык ыйгарым укуктарды аткарууга ылайык келбеген кызмат ордуна дайындалгандыгына байланыштуу ыйгарым укуктары токтотулуп, бош калган мандат шайланган депутаттан кийинки талапкерге – Г.Кожоевага өткөрүлүп берилди;
- Баткен облусунун Кадамжай районундагы Орозбеков айылдык кеңешиндеги депутат М.Токтоматов өз каалоосу менен депутаттык ыйгарым укуктарын мөөнөтүнөн мурда токтотту, бош калган мандат кийинки талапкер – А.Имарбековго өткөрүлүп берилди;
- Жалал-Абад облусунун Ноокен районундагы Бүргөндү айылдык кеңешиндеги депутат Т.Асанов өз каалоосу менен депутаттык ыйгарым укуктарын мөөнөтүнөн мурда токтотту, бош калган мандат кийинки талапкер – Т. Джоробаевге өткөрүлүп берилди.
КР БШКнын аппаратынын маалымат бөлүмү
Кененирээк билүү >>
Талас облусунун Талас районунун Айдаралиев айыл өкмөтүнүн башчысын шайлоосу дайындалды
Кыргыз Республикасынын Премьер-министринин 2019-жылдын 31-январындагы № 39 буйругу менен Талас облусунун Талас районунун Айдаралиев айыл өкмөтүнүн башчысы Сыдыков Замирбек Бейшенович Талас районунун мамлекеттик администрациясынын башчысы - акими болуп дайындалган.
КР БШКнын токтомуна ылайык, Талас облусунун Талас районунун Айдаралиев айыл өкмөтүнүн башчысын шайлоо 2019-жылдын 27-февралына саат 9-00дөн 12-00гө чейинкиге дайындалды.
Шайлоону Кыргыз Республикасынын мыйзамдарына ылайык уюштуруп, өткөрүү Талас АШКна тапшырылды.
Маалымат катары: “Жергиликтүү өз алдынча башкаруу жөнүндө" Кыргыз Республикасынын Мыйзамынын 48-беренесине ылайык жогорку билими жана мамлекеттик же болбосо муниципалдык кызматта 2 жылдан кем эмес иш стажы, же болбосо билим берүүнүн, саламаттык сактоонун мамлекеттик мекемелеринде же уюмдардын, мекемелердин жана жеке менчик чарбакер субъекттердин жетекчилик кызматтарында 3 жылдан кем эмес иш стажы бар аракетке жөндөмдүү Кыргыз Республикасынын жараны айыл өкмөтүнүн башчысы боло алат. Кылмыш жасагандыгы үчүн мыйзамдарда белгиленген тартипте алып салынбаган же жоюлбаган соттуулугу бар Кыргыз Республикасынын жараны айыл өкмөтүнө башчы болушу мүмкүн эмес.
КР БШК аппаратынын маалымат бөлүмү
Кененирээк билүү >>
Шайлоонун бүткүл дүйнөлүк күнүнө карата КР БШК Төрагасынын орун басары А. Бекматов Ош шаарында 5 ЖОЖдун студенттери үчүн “Жаштар жана шайлоо. Келечек үчүн жоопкерчилик” деген темада лекция өткөрдү
Шайлоонун бүткүл дүйнөлүк күнүнө карата 7-февралда КР БШК Төрагасынын орун басары А. Бекматов Ош шаарында 5 ЖОЖдун укук жана тарых факультеттеринин студенттери үчүн “Жаштар жана шайлоо. Келечек үчүн жоопкерчилик” деген темада лекция өткөрдү. Иш-чара ЕККУнун Бишкектеги программалык кенсесинин колдоосу алдында өттү.
Презентацияда А. Бекматов 2017-жылдагы Президенттик шайлоого жаштардын катышуусу жөнүндө маалыматтарды келтирди. Ошондой эле, ал жаш шайлоочуларды шайлоо процессинин этаптары, шайлоонун натыйжаларынын аныктыгын жана айкындуулугун камсыздоочу шайлоочуларды биометрикалык иденттештирүү технологияларын жана добуштарды автоматтык эсептөөнү колдонуу менен жаңы шайлоо моделинин өзгөчөлүктөрү тууралуу айтып берди. “Шайлоо процессин башкаруу деңгээлинде коррупция үчүн негиздер четтетилди. Колдонуудагы модель мурдагы режимдердин тушунда орун алган “бюллетендерди жапырт салуу” жана “каруселдер” сыяктуу бурмалоолорду жоюу милдетин чечет”. Презентациянын жүрүшүндө студенттер БШКнын иши жана Кыргызстандагы шайлоо тутуму боюнча көп маселелерди талкуулашты. Маселен:
- чет өлкөдө жүргөн жарандардын шайлоо укугун жүзөгө ашыруу үчүн кандай чаралар көрүлүп жатат?
- шайлоону даярдоого жана өткөрүүгө чыгымдарды азайтуу үчүн эмне кылуу керек?
- жаштардын шайлоо маданиятын жакшыртуу үчүн кандай иш-чаралар өткөрүлөт?
Көпчүлүк студенттер КР БШКнын өкүлдөрү менен мындан ары дагы башка форматтарда жолугушуу жөнүндө каалоолорун билдиришти.
КР БШК аппаратынын маалымат бөлүмү
Кененирээк билүү >>
Шайлоонун бүткүл дүйнөлүк күнүнө карата КР ЖОЖдорунун арасында “Менин тандоом – менин укугум” деген темада QUIZ болуп өттү
Шайлоонун бүткүл дүйнөлүк күнүнө карата КР БШК тарабынан КМЮАнын “Укук өнөрканасы” Инновациялык-укук борбору менен биргеликте ЕККУнун Бишкектеги программалык офисинин колдоосу алдында КР ЖОЖдорунун студенттеринин ортосунда “Менин тандоом – менин укугум” деген темада QUIZ өткөрүлдү.
Жигердүү студенттер үчүн эстүүлүк жана кызуулук менен атаандашуунун атмосферасындагы курч оюн болду.
7 команданын ортосундагы интеллекттик “кармашуулар” динамикалык форматта өттү. Оюн ар бири эрудицияга, логикага, интуицияга, кунт коюуга жана юморго эсептелген 5-9 суроодон турган 7 турду түздү. Ар бир раунд жаңы форматта – шайлоо укугунун чөйрөсү, шайлоо процессинин этаптары, шайлоочуларды биометрикалык иденттештирүү технологияларын жана добуштарды автоматтык эсептөөнү колдонуу менен жаңы шайлоо моделинин өзгөчөлүктөрү боюнча сүрөттөр, видео, аудио-фрагмент жана блиц түрүндө уюштурулду.
Бул иш-чараны өткөрүүнүн негизги максаты жаш шайлоочулардын өздөрүнүн конституциялык укугун билүүсүн жана түшүнүүсүн аныктоо, ошондой эле мекенчилдикти калыптандыруу болуп саналат.
КМЮАнын “Максимум” командасы жеңип чыгып, эстелик байгесин алды.
Иш-чаранын жыйынтыгында QUIZдин бардык катышуучуларына эстелик белектер тапшырылды.
КР БШК аппаратынын маалымат бөлүмү
Кененирээк билүү >>
Шайлоонун бүткүл дүйнөлүк күнүнө карата Борбордук шайлоо комиссиясында №29 мектеп-гимназиянын жогорку класстарынын окуучулары үчүн “Мен – келечектеги шайлоочумун” деген темада тренинг откөрүлдү
Шайлоонун бүткүл дүйнөлүк күнүнө карата Борбордук шайлоо комиссиясында №29 мектеп-гимназиянын жогорку класстарынын окуучулары үчүн “Мен – келечектеги шайлоочумун” деген темада тренинг откөрүлдү. КР БШКнын мүчөсү Гульнара Джурабаева тренингдин модератору болду.
Бул иш-чаранын максаты келечектеги шайлоочуларга ар бир жарандын шайлоого катышуусунун жана анын өз тандоосу үчүн жоопкерчилигинин маанилүүлүгү жөнүндө маалымат берүү болуп саналат. Тренингдин катышуучулары саясий партиялардын ролун моделдештирген 4 топко бөлүндү. Ар бир партия өз программасын тааныштырды, бул катышуучуларга пассивдүү шайлоо укугунун маселелерин терең түшүнүүгө мүмкүндүк түздү.
КР БШК аппаратынын маалымат бөлүмү
Кененирээк билүү >>
Шайлоонун эл аралык күнүнө карата КР БШК АЭУну колдонуу менен Эл аралык АЛА-ТОО университетинин инженерия жана информатика факультетинин Президентин шайлоону өткөрүүгө көмөк көрсөттү
Шайлоонун эл аралык күнүнө карата КР БШК IFES менен биргелешип АЭУну колдонуу менен Эл аралык АЛА-ТОО университетинин инженерия жана информатика факультетинин Президентин шайлоону өткөрүүгө көмөк көрсөттү. Студенттердин арасынан түзүлгөн комиссиянын мүчөлөрү күн мурунтан окутулуп, шайлоо процессинин этаптары, добуш берүү жол-жоболору тууралуу инструктаждан өткөрүлдү.
2 студент - Абыкова Айжан жана Надирова Зухра өз талапкерлигин көрсөтүп, студенттердин арасында бир жума үгүт иштерин жүргүздү. Шайлоо процессинин этаптары – талапкерлер ортосундагы шайлоо бюллетениндеги кезектүүлүккө чүчүкулак, аудитория алдында дебаттар өткөрүлүп, бардык эрежелер сакталды жана үгүт иши жүргүзүлдү.
Добуш берүүнүн жыйынтыгы боюнча Надирова Зухра көп добуш (78 добуш) алды. Шайлоочулардын тизмесине 394 студент киргизилип, алардын 176сы добуш берди.
КР БШК аппаратынын маалымат бөлүмү
Кененирээк билүү >>
Шайлоонун бүткүл дүйнөлүк күнүнө карата БШК ден соолугунун мүмкүнчүлүктөрү чектелүү адамдардын шайлоо укуктарын камсыздоодогу жемиштүү эмгеги жана жеке салымы үчүн өнөктөштөрүн Ардак грамота менен сыйлады
Борбордук шайлоо комиссиясында жарандардын шайлоо укуктарын камсыздоого жеке өздөрү салмактуу салым кошкон өнөктөштөрдү сыйлоо болуп өттү. Сыйлыкка татыктуу болгон өнөктөштөр шайлоону уюштурууну жакшыртууга көмөктөшүү, ден соолугунун мүмкүнчүлүктөрү чектелүү жарандардын, аскер кызматчылары, ооруканалардын пациенттери, камоодо убактылуу кармалып турган адамдар сыяктуу шайлоочулардын кээ бир категорияларынын шайлоого катышуусун жакшыртуу максатында жигердүү иш жүргүзүшкөн.
БШКнын жетекчилиги менен аңгемелешүүдө өнөктөштөр шайлоонун инклюзивдүүлүгүн жогорулатуу, шайлоо процессинин катышуучуларынын саясий маданиятын арттыруу боюнча мерчемделген чаралар, Туруктуу өнүктүрүү боюнча улуттук кеңеш тарабынан жактырылган КРдин шайлоо мыйзамдарын өркүндөтүү стратегиясын жүзөгө ашыруу алкагында белгиленген башка өзгөртүүлөр менен тааныштырылды.
Төмөнкүлөр Ардак грамотасы менен сыйланды:
- Абдылдаев Турсун Абдыкасымович - Майыптардын «Талыкпас-Ата» коомдук фондусунун төрагасы;
- Алымбек кызы Гульмайрам - «Назик-кыз» коомдук бирикмесинин мүчөсү;
- Бакиров Жетиген Жокинович - Кыргыз Республикасынын Өкмөтүнүн аппаратынын уюштуруу-инспектордук иш жана региондорду өнүктүрүү бөлүмүнүн башчысы;
- Исаков Бакыт Кубанычбекович - Кыргыз Улуттук паралимпиада комитетинин президенти;
- Исаков Толкунбек Маматович - «Майыптарга укуктук жардам көрсөтүү» коомдук фондусунун президенти;
- Курманбеков Нурбек Курманбекович - Бишкек ш. мэриясынын социалдык өнүктүрүү башкармалыгынын начальниги;
- Мукашев Эрмек Жайлообаевич - Кыргыз азиздер жана дүлөйлөр
коомунун уюштуруу бөлүмүнүн жетектөөчү адиси;
- Мураталиева Укей Калмуратовна - “Назик-кыз” коомдук бирикмесинин төрагасы;
- Мусаева Асипа Мусаевна - Кыргызстандын аял-майыптарынын республикалык көз карандысыз ассоциациясынын президенти;
- Омурканова Чолпон Аскербековна - «Эгль» КФ директору;
- Сыдыков Жумгалбек Тургунбекович - Майыптардын кыргыз республикалык коому (МКРКБ);
- Джамакеев Кантанбек Джанчарбекович - сурдотилмеч;
- Соронбаева Джаннат - ЕККУнун Бишкектеги Программа офиси;
- Грядасова Анастасия - Кыргыз Республикасындагы шайлоо тутумдарынын Эл аралык фондунун өкүлчүлүгү;
- Исмаилов Нурлан Курманбекович - Подполковник, Кыргыз Республикасынын ИИМнин бөлүмүнүн начальниги;
- Жакеев Кубанычбек Жумашевич - Кыргыз Республикасынын ИИМнин коомдук коопсуздук кызматынын начальнигинин орун басары;
- Кулбаев Талантбек Минбаевич - Полковник, Кыргыз Республикасынын Куралдуу Күчтөрүнүн Штабынын тарбиялык иштер башкармалыгынын начальниги;
- Турпанбаев Максатбек Турарович - Кыргыз Республикасынын Өкмөтүнө караштуу ЖАМКнын тарбиялык иштер боюнча башкармалыгынын начальниги.
КР БШК аппаратынын маалымат бөлүмү
Кененирээк билүү >>
Акыркы жаңылыктар
20.11.2026
КР БШК өкүлдөрү Чүй облусунун мамлекеттик органдарынын жана жергиликтүү өз алдынча башкаруу органдарынын жетекчилери менен Президенттик шайлоого даярдык маселелерин талкуулашты
20.11.2026
КР БШК Кыргыз Республикасынын Президентин шайлоодо чет өлкөлөрдө алгачкы 74 шайлоо участогун түздү
20.11.2026
КР БШКсы Президенттин кызмат ордуна талапкердин ыйгарым укуктуу өкүлүн каттады
20.11.2026
КР БШКсы "Сезим" фондунан коомдук байкоочуну каттады
20.11.2026
Айрым аймактык шайлоо комиссияларынын курамдарына өзгөртүүлөр киргизилди
20.11.2026
КР БШКсы Токмок аймактык шайлоо комиссиясынын резервин толуктады