Жаңылыктар

Борбордук шайлоо комиссиясы Кыргыз Республикасынын жергиликтүү өз алдынча башкаруусунун аткаруу органдарынын башчыларын – айыл өкмөттөрүнүн башчыларын шайлоону 2013-жылдын 24-сентябрына дайындады Ысык-Көл облусунун Түп районундагы Түп айыл өкмөтүнүн башчысы Т.К.Байтемиров, ошондой эле Чүй облусунун Сокулук районундагы Камышановка айыл өкмөтүнүн башчысы М.С.Кубатов өздөрү берген арыздарынын негизинде ээлеген кызмат ордунан бошотулган. Талас облусунун Бакай-Ата районундагы Боо-Терек айыл өкмөтүнүн башчысы Соорбеков Таалай Нышанович айылдык кеңештин депутаттарынын Боо-Терек айыл өкмөтүнүн башчысына депутаттар ишеним көрсөтпөгөн 9-сессиясында 2013-жылдын 28-июнунда кабыл алынган айылдык кеңештин №1 токтомунун негизинде ээлеген кызмат ордунан бошотулган. Түп, Сокулук, Бакай-Ата аймактык шайлоо комиссияларына шайлоону Кыргыз Республикасынын мыйзамдарына ылайык өткөрүүнү уюштуруу милдети тапшырылган. Ошондой эле, бүгүнкү жыйналышта Ош, Сузак, Ноокен, Тоң, Баткен шаардык, Алай, Ат-Башы жана Чүй аймактык шайлоо комиссияларынын резервдерине өзгөртүүлөрдү киргизүү жөнүндө токтом кабыл алынды.  Кыргыз Республикасынын Борбордук шайлоо комиссиясынын басма сөз кызматы

Бүгүн, 2013-жылдын 5-сентябрында, «Ата-Журт» партиясынан Кыргыз Республикасынын Жогорку Кеңешинин депутаттары Жапаров Садыр Нургожоевичтин, Ташиев Камчыбек Кыдыршаевичтин, Мамытов Талант Турдумаматовичтин ыйгарым укуктары мөөнөтүнөн мурда токтотулганына байланыштуу, Кыргыз Республикасынын Шайлоо жана референдум өткөрүү боюнча борбордук комиссиясы Кадырбекова Майрамкан Мамытовнаны, Мурзабеков  Кантемир Зулумовичти, Шаршеев Бакыт Октябровичти Кыргыз Республикасынын Жогорку Кеңешинин депутаты деп каттады. Кыргыз Республикасынын Жогорку Кеңешинин катталган депутаттарына белгиленген үлгүдөгү күбөлүк жана төш белги тапшырылды.  Кыргыз Республикасынын Борбордук шайлоо комиссиясынын басма сөз кызматы

Бүгүн Борбордук шайлоо комиссиясынын кезектеги отуруму өтүп, анда 2013-жылдын 17-июлунда өткөрүлгөн Ысык-Көл облусунун Ысык-Көл районуна караштуу Бостери айыл өкмөт башчысын шайлоодогу добуш берүүнүн жыйынтыктары жана шайлоонун натыйжалары тууралуу протоколдорду бекитүү жөнүндө токтом кабыл алынды.  Токтомго ылайык Ысык-Көл облусунун Ысык-Көл районунун Бостери айыл өкмөтүнүн шайланган башчысы болуп Айылчиев Тимур Кудайбердиевич табылды. Бостери айыл өкмөтүнүн башчысы болуп шайланган Т. К. Айылчиевдин иш стажысын аныктоо максатында  Кыргыз Республикасынын Шайлоо жана референдум өткөрүү боюнча борбордук комиссиясы тарабынан тиешелүү Жумушчу топ тузулгөн. Жумушчу топтун берген маалымкатына ылайык Бостери айыл өкмөтүнүн башчысын шайлоодо добуш берүүнүн жыйынтыгы жана шайлоонун натыйжасы тууралуу протоколдорду бекитүү жана Т. К. Айылчиевди Бостери айыл өкмөтүнүн шайланган башчысы деп тануу жөнүндө сунуш берилген.  Кыргыз Республикасынын Борбордук шайлоо комиссиясынын басма сөз кызматы    

Бүгүн Борбордук шайлоо комиссиясы өзүнүн кезектеги отурумунда Майлуу-Суу шаардык кеңешинин депутаттыгына талапкерге бош депутаттык мандатты ыйгаруу жөнүндө аймактык шайлоо комиссиясынын чечимин бекитүү тууралуу токтомду кабыл алды. Майлуу-Суу шаардык кеңешинин IV сессиясынын 2013-жылдын 6-августундагы токтому менен депутат Масиров Нурланбек Заирбековичтин депутаттык ыйгарым укуктары өзүнүн берген арызынын негизинде мөөнөтүнөн мурда токтотулуп, Майлуу-Суу аймактык шайлоо комиссиясы бош депутаттык мандатты “Кыргызстан социал-демократиялык партиясы” саясий партиясынын катталган тизмесиндеги депутат болуп шайлангандардан кийинки катталган талапкер Абдуллаева Гульмира Капаровнага ыйгаруу чечимин кабыл алышкан.  Кыргыз Республикасынын Борбордук шайлоо комиссиясынын басма сөз кызматы  

Бүгүн, 2013-жылдын 3-сентябрында Борбордук шайлоо комиссиясынын төрагасы Т.Абдраимов “Немец Бундестагына шайлоо жөнүндө мыйзам  - демократиялык стандарттар жана чакырыктар” темасындагы Фридрих Эберт атындагы ири немец саясий Фонду тарабынан уюштурулган тегерек столдун ишине катышты. Тегерек столдо 2015-жылда Жогорку Кеңешке боло турган алдыдагы шайлоого тиешелүү маселелер каралды.  Ошондой эле тегерек столдун ишине Кыргыз Республикасынын Президентинин аппаратынын жетекчиси Д.Нарымбаев, Германиянын Юстиция министрлигинин экс-министри -  профессор Герта Дойблер-Гмелин, Кыргыз Республикасынын Жогорку Кеңешинин айрым депутаттары, шайлоо мыйзамдары боюнча эксперттер ж.б. катышышты. Кыргыз Республикасынын Борбордук шайлоо комиссиясынын төрагасы саламдашуу сөзүн айтып, шайлоо процессин өркүндөтүү жана 2015-жылдагы парламенттик шайлоонун, Кыргыз Республикасынын кийинки шайлоолорунун айкындыгын жана ачыктыгын камсыз кылуу маселелерин талкулоого катышты.  Кыргыз Республикасынын Борбордук шайлоо комиссиясынын басма сөз кызматы  

Бүгүн, 2013-жылдын 26-августунда Кыргыз Республикасынын Шайлоо жана референдум өткөрүү боюнча борбордук комиссиясынын Төрагасы Туйгунаалы Абдраимовдун жана Төрага Арнис Цимдарс башында турган Латвия Республикасынын Борбордук шайлоо комиссиясынын делегациясынын расмий жолугушуусу болду. Эки өлкөнүн Борбордук шайлоо комиссияларынын төрагалары саламдашуу сөздөрүн айтты, андан соң Кыргыз Республикасынын Шайлоо жана референдум өткөрүү боюнча борбордук комиссиясынын жана Латвия Республикасынын Борбордук шайлоо комиссиясынын ортосундагы өз ара түшүнүшүү жөнүндө меморандумга кол коюу аземи болду. Меморандумда Кыргыз Республикасынын Шайлоо жана референдум өткөрүү боюнча борбордук комиссиясынын жана Латвия Республикасынын Борбордук шайлоо комиссиясынын ортосундагы кызматташтык тең укуктуулуктун жана таламдарды урматтоонун, эки мамлекеттин шайлоо мыйзамдарын сактоонун негизинде жүргүзүлөт деп белгиленген. Өз ара түшүнүшүү жөнүндө меморандумдун алкагында шайлоону жана референдумдарды уюштурууну, даярдоону жана өткөрүүнү камсыз кылган органдардын кызматташтыгы жана иштерин координациялоо; ошондой эле шайлоо жана референдумдар жөнүндө улуттук мыйзамдарды өркүндөтүү; жарандардын конституциялык шайлоо укуктарын турмушка ашырууну жана коргоону камсыз кылуу; шайлоо процессине талапкерлердин жана саясий партиялардын катышуусун укуктук жөнгө салуу; шайлоону жана референдумдарды финансылык жана материалдык-техникалык жактан камсыз кылууну өркүндөтүү; шайлоону жана референдумдарды өткөрүү учурунда шайлоочуларды эсепке алуунун заманбап маалыматтык технологияларын жана системаларын пайдалануу; шайлоо алдындагы үгүт учурунда жалпыга маалымдоо каражаттарын пайдалануу менен шайлоо процессинин субъекттеринин укуктарын камсыз кылуу; шайлоо процессинин жана референдумдардын катышуучуларынын укуктук маданиятын жогорулатуу, шайлоону жана референдумдарды уюштуруучуларды даярдоону өркүндөтүү сыяктуу багыттар боюнча тажрыйба алмашуу каралган. Өз ара түшүнүшүү жөнүндө меморандумга кол коюлгандан кийин, Кыргыз Республикасынын Борбордук шайлоо комиссиясынын басма сөз борборунда Латвия Республикасынын Борбордук шайлоо комиссиясынын Латвияда шайлоодо натыйжаларды электрондук эсептөө жана аны колдонуу системасы деген темадагы презентациясы болду.   Өз ара түшүнүшүү жөнүндө меморандумдун тексти менен бул жерден таанышууга болот.               Кыргыз Республикасынын Борбордук шайлоо комиссиясынын басма сөз кызматы

Бүгүн  Ош областынын  Ноокат районундагы Т. Кулатов айыл өкмөтүнүн башчысын шайлоо өткөрүлөт. Ош облусунун Ноокат районунун Т. Кулатов айыл өкмөт башчысы Эргешов А. өзүнүн берген арызынын негизинде, Ош областынын Ноокат райондук мамлекеттик администрациясынын башчысынын-акиминин буйругу менен айыл өкмөт башчысы кызматынан бошотулган. Айыл аймагынын аткаруу бийлигинин жетекчилик кызматына жергиликтүү кеңештин депутатттары тарабынан Жаныбек Исаевдин, Мирланбек  Жолдошовдун жана Нуридин Мадимаровдун талапкерлиги көрсөтүлгөн. Айыл өкмөтүнүн башчысы айыл кеңешинин депутаттары жана райондук мамлекеттик администрациянын башчысы тарабынан көрсөтүлүүчү талапкерлердин ичинен жашыруун добуш берүү аркылуу айыл кеңешинин депутатттары тарабынан шайланат.   Ноокат аймактык шайлоо комиссиясына шайлоону Кыргыз Республикасынын мыйзамдарына ылайык өткөрүү тапшырылды.           Кыргыз Республикасынын Борбордук шайлоо комиссиясынын басма сөз кызматы  

Бүгүн Чүй областынын Сокулук районундагы Фрунзе, Панфилов районундагы Орто айыл аймактарында  өкмөт башчыларын шайлоо өткөрүлөт. Сокулук районундагы Фрунзе айыл өкмөтүнүн башчыcы П.Рахимов өзүнүн берген арыздарынын негизинде кызматынан бошотулган. Ал эми Панфилов районундагы Орто айыл өкмөтүнүн башчыcы Т. Молдокулов Кыргыз Республикасынын Премьер-министринин  буйругу менен Панфилов райондук мамлекеттик администрациясынын башчысы-акими болуп дайындалган. Сокулук районундагы Фрунзе айыл өкмөтүнүн башчыcы кызматына жергиликтүү кеңештин депутатттары тарабынан­­­­­­­­ Арфел  Кушчубаевдин  талапкерлиги көрсөтүлгөн. Панфилов районундагы Орто айыл өкмөтүнүн башчыcы кызматына жергиликтүү кеңештин депутатттары тарабынан­­­­­­­­  Алтынай Абдыраеванын, Эркин Арыковдун, жана Максат Оторбаевдин талапкерлиги көрсөтүлгөн. Сокулук, Панфилов аймактык шайлоо комиссияларына шайлоону Кыргыз Республикасынын мыйзамдарына ылайык өткөрүү тапшырылды.                Кыргыз Республикасынын Борбордук шайлоо комиссиясынын басма сөз кызматы  

Бүгүн Кыргыз Республикасынын Шайлоо жана референдум өткөрүү боюнча борбордук комиссиясынын жыйынында коомдук укук коргоочу Акин Токталиевдин Кыргыз Республикасынын Жогорку Кеңешинин “Ата-Журт” фракциясынан депутаттары Камчыбек Ташиев, Садыр Жапаров жана Талант Мамытовду депутаттык мандатынан ажыратууну убактылуу токтотуу жөнүндөгү арызы канаттандырылган жок. Укук коргоочунун арызы Борбордук шайлоо комиссиясына 2013-жылдын 13-августунда келип түшкөн.                   Кыргыз Республикасынын Борбордук шайлоо комиссиясынын басма сөз кызматы   

Бүгүн Кыргыз Республикасынын Шайлоо жана референдум өткөрүү боюнча борбордук комиссиясынын кезектеги жыйынында Кыргыз Республикасынын жергиликтүү кеңештеринин депутаттарын таануу жөнүндө аймактык шайлоо комиссияларынын чечимдери бекитилди. Анын негизинде депутаттык ыйгарым укуктарды мөөнөтүнөн мурда токтоткон жергиликтүү кеңештердин депутаттарынын  ордуна Үсөн Мамажанов, Абасбек Кутманов Ала-Бука районундагы 1-Май айылдык кеңешинин депутаты, Алмаз Матаев Чүй районундагы Чүй айылдык кеңешинин депутаты болуп катталышты. Жергиликтүү кеңештердин шайланган депутаттарына белгиленген үлгүдөгү күбөлүк жана төш белги берилет.             Кыргыз Республикасынын Борбордук шайлоо комиссиясынын басма сөз кызматы     

Кыргыз Республикасынын Шайлоо жана референдум өткөрүү боюнча борбордук комиссиясы Кыргыз Республикасынын Жогорку сотунун 2013-жылдын 6-августундагы жана Бишкек шаарынын Биринчи май райондук сотунун 2013-жылдын 29- мартындагы Кыргыз Республикасынын Жогорку Кеңешинин  “Ата-Журт” фракциясынын депутаттары Садыр Жапаров Камчыбек Ташиев жана Талант Мамытов боюнча токтомдору күчүнө киргендигине байланыштуу аларды  депутаттык мандаттарын мөөнөтүнөн мурда токтотуу жөнүндө токтом кабыл алды. Алардын депутаттык күбөлүктөрү Борбордук шайлоо комиссиясынын токтому «Эркин Тоо» газетасына расмий жарыяланган күндөн баштап жараксыз деп табылат.                 Кыргыз Республикасынын Борбордук шайлоо комиссиясынын басма сөз кызматы   

Бүгүн Кыргыз Республикасынын Шайлоо жана референдум өткөрүү боюнча борбордук комиссиясынын жыйынында Кыргыз Республикасынын жергиликтүү өз алдынча башкаруусунун аткаруу органдарынын – айыл өкмөттөрүнүн башчыларын шайлоону дайындоо жөнүндө токтом кабыл алынды. Токтомдун негизинде 2013-жылдын 4-сентябрында - Нарын облусунун Кочкор районунун Кум-Дөбө айыл өкмөтүнүн башчыcын кайра шайлоо; - Талас облусунун Бакай-Ата районунун Акназаров айыл өкмөтүнүн     башчысын шайлоо; - Чүй облусунун Жайыл районунун Жайыл айыл өкмөтүнүн башчысын шайлоо; - Чүй облусунун Кемин районунун Ильич айыл өкмөтүнүн башчысын шайлоо; -  Чүй облусунун Кемин районунун Жаңы-Алыш айыл өкмөтүнүн башчысын шайлоо өткөрүлөт. Кочкор районундагы  Кум-Дөбө айыл өкмөтүнүн башчыcын шайлоо Кыргыз Республикасынын Шайлоо жана референдум өткөрүү боюнча борбордук комиссиясынын 2013-жылдын 24-июлундагы № 127 токтому менен 2013-жылдын 12-августуна дайындалып, кворумдун жоктугунан шайлоо өткөн эмес. Талас облусунун Бакай-Ата районундагы Акназаров айыл өкмөтүнүн башчыcы Козубеков Ж.Ш. өзүнүн берген арызынын негизинде, Бакай-Ата райондук мамлекеттик администрациясынын башчысынын-акиминин 6-август 2013-жылдагы №29/VI буйругу менен айыл өкмөт башчысы кызматынан бошотулган. Чуй облусунун Жайыл районунун Жайыл айыл өкмөтүнүн башчысы Орозбаков Э.К. өзүнүн берген арызынын негизинде, Жайыл райондук мамлекеттик администрациясынын башчысынын-акиминин 12-август 2013-жылдагы №176-р буйругу менен айыл өкмөт башчысы кызматынан бошотулган. Чүй облусунун Кемин районунун Ильич айыл өкмөтүнүн башчысы Исмаилова Карачач Жумаевнага Ильич айылдык кеңешинин 2013-жылдын  1-августундагы № 22-9-26 токтому менен айылдык кеңештин депутаттары тарабынан бир добуштан ишенбестик билдирилген. Анын негизинде Кемин райондук мамлекеттик администрациясынын башчысынын-акиминин               13-август 2013-жылдагы №190-р буйругу менен айыл өкмөт башчысы кызматынан бошотулган. Чүй облусунун Кемин районунун Жаңы-Алыш айыл өкмөтүнүн башчысы Ибраимова Т.С. өзүнүн берген арызынын негизинде, Кемин райондук мамлекеттик администрациясынын башчысынын-акиминин 14-август 2013-жылдагы №192-р буйругу менен айыл өкмөт башчысы кызматынан бошотулган.  Кочкор, Бакай-Ата, Жайыл, Кемин аймактык шайлоо комиссияларына шайлоону белгиленген тартипте өткөрүү тапшырылды.                     Кыргыз Республикасынын Борбордук шайлоо комиссиясынын басма сөз кызматы  

Бүгүн Кыргыз Республикасынын Шайлоо жана референдум өткөрүү боюнча борбордук комиссиясынын кезектеги жыйынында 2013-жылдын 12-августунда өткөрүлгөн  Жалал-Абад облусунун Сузак районунун Көк-Жаңгак шаарынын мэрин шайлоо өттү деп табылды жана шайлоодогу добуш берүүнүн жыйынтыгы жана натыйжалары тууралуу аймактык шайлоо комиссиясынын протоколдору бекитилди. Каыбл алынган токтомдун негизинде Жалалидин Юсупов Көк-Жаңгак шаарынын мэри деп болуп шайланды. Жаңы шайланган шаар жетекчисине белгиленген үлгүдөгү күбөлүк берилет.                Кыргыз Республикасынын Борбордук шайлоо комиссиясынын басма сөз кызматы

Бүгүн, 20-августта Кыргыз Республикасынын Борбордук шайлоо комиссиясынын Төрагасы Туйгунаалы Абдраимовдун Корея Республикасынын Кыргызстандагы элчиси Ким Чанг Гю менен расмий жолугушуусу болду. Жолугушууда Корея Республикасынын элчиси Борбордук шайлоо комиссиясынын Төрагасына Шайлоо маселелери боюнча дүйнөлүк уюмдун (ШМДУ) Алтынчы Глобалдык конференциясына расмий чакырууну тапшырды, конференция 2013-жылдын 15-17-октябрында Корея Республикасынын (Түштүк Корея) Сеул шаарында өтөт. Конференциянын темасы: «Туруктуу шайлоо процесстери – алда канча бекем демократия». ШМДУнун конференциясы шайлоо маселелери боюнча адистер үчүн алдыңкы эл аралык форум болуп саналат жана байланыштарды түзүүгө жана маалыматтарды алмашууга көмөктөшүү максатын көздөйт. Ошондой эле Корея Республикасынын Элчиси Борбордук шайлоо комиссиясынын Төрагасына 2013-жылдын 14-октябрында боло турган Шайлоо комиссияларынын Дүйнөлүк Ассоциациясынын (ШКДА) салтанаттуу Ассамблеясына катышууга Корея Республикасынын Улуттук шайлоо комиссиясынын чакыруусун тапшырды. ШКДА билим берүү жана кесиптик даярдоо аркылуу шайлоону өткөрүү жана шайлоо процессине катышкан адамдардын мүмкүнчүлүктөрүн кеңейтүү жагынан билим, маалымат жана тажрыйба алмашуу максатында бүткүл дүйнөнүн шайлоо органдары менен байланышуу тармактарын түзүү жагынан иш жүргүзөт.  Кыргыз Республикасынын Борбордук шайлоо комиссиясынын басма сөз кызматы    

Кечээ, 2013-жылдын 18-августунда Ош облусунун Кара-Суу районундагы Кара-Суу шаардык кеңешине, ошондой эле Жалал-Абад облусунун Тогуз-Торо районундагы Тогуз-Торо айылдык кеңешине жана Чаткал районундагы Терек-Сай айылдык кеңешине депутаттарды мөөнөтүнөн мурда шайлоо өткөрүлдү. Алдын ала маалыматтар боюнча, Кара-Суу шаарында шайлоочулардын келиши – 72,5%ды (6482 шайлоочу), Тогуз-Торо айылында – 56,7%ды (1234 шайлоочу), Терек-Сай айылында 57,7%ды (1115 шайлоочу) түздү. Аймактык шайлоо комиссияларына 2013-жылдын 19-августунда саат 08.00гө карата даттануулар жана арыздар келип түшкөн жок. Кыргыз Республикасынын Борбордук шайлоо комиссиясынын басма сөз кызматы

Кыргыз Республикасынын Президентинин 2013-жылдын 4-июлундагы  “Кыргыз Республикасынын кээ бир жергиликтүү кеңештерин таркатуу жана мөөнөтүнөн мурда шайлоо  күнүн дайындоо жөнүндөгү” Жарлыгынын негизинде эртең, 18-августу күнү,  Тогуз-Торо районундагы Тогуз-Торо , Чаткал районундагы Терек-Сай айылдык  кеңештерине шайлоо өткөрүлөт. Бул жергиликтүү кеңештер айыл өкмөт башчыларын белгиленген мөөнөттө шайлабагандыгы үчүн таркатылган. Кыргыз Республикасынын Шайлоо жана референдум өткөрүү боюнча борбордук комиссиясынын жыйынында Кыргыз Республикасынын жергиликтүү кеңештеринин депутаттарын мөөнөтүнөн мурда шайлоо боюнча шайлоо участкаларынын схемалары жана чек араларын бекитүү жөнүндө токтом кабыл алынган. Кыргыз Республикасынын Шайлоо жана референдум өткөрүү боюнча борбордук комиссиясына жергиликтүү өз алдынча башкаруунун жогоруда аталган өкүлчүлүктүү органдарына мөөнөтүнөн мурда шайлоону Кыргыз Республикасынын мыйзамдарына ылайык өткөрүү тапшырылган.           Кыргыз Республикасынын Борбордук шайлоо комиссиясынын басма сөз кызматы