Жаңылыктар

2025-жылдын 19-февралы күнү Кыргыз Республикасынын Борбордук шайлоо комиссиясынын төрагасы Т.У.Шайназаров ЕККУнун (Европалык коопсуздук жана кызматташтык боюнча уюму) Улуттук азчылыктар боюнча Жогорку комиссарынын саясий кеңешчиси Петер Надерер менен онлайн жолугушуу өткөрдү. Жолугушууга ЕККУнун Улуттук азчылыктар боюнча Жогорку комиссарынын юридикалык кеңешчиси Эльжбета Кузборска, ЕККУнун Улуттук азчылыктар боюнча Жогорку комиссарынын Борбордук Азиядагы долбоорлорду координациялоочу ассистенти Гульжан Ермекбаева, Борбордук шайлоо комиссиясынын мүчөсү Искендер Гайпкулов жана БШКнын аппарат кызматкерлери катышты. Жолугушуу учурунда БШКнын төрагасы шайлоо мыйзамын жакшыртуу боюнча жасалып жаткан иштер тууралуу маалымат берип, мындан ары да кызматташууга даяр экендигин билдирди.          Өз кезегинде Петер Надерер ЕККУнун Улуттук азчылыктар боюнча Жогорку комиссарынын ишмердүүлүгү, анын артыкчылыктуу багыттары жана этникалык чыңалууларды алдын алуу боюнча ыкчам чараларды кабыл алуу боюнча кызматташтык тууралуу айтып берди. Жолугушуу соңунда тараптар кызматташтыкты мындан ары да өнүктүрүү боюнча макулдашты.                         Маалымат үчүн:          Кыргыз Республикасынын Конституциясында улутуна жана башка таандыктарга карабастан өлкөнүн бардык жарандары үчүн бирдей шайлоо укугу принциби каралган. Кыргыз Республикасынын Президентин жана Жогорку Кеңештин депутаттарын шайлоо боюнча шайлоо мыйзамында пропорционалдык система боюнча талапкерлердин тизмесин аныктоодо саясий партиялар 15% га жакын этникалык түрдүүлүгү бар талапкерлерди эске алууга милдеттүү, алардан кеминде 3 талапкер биринчи 25 талапкердин тизмесине киргизилиши керек. Эске салсак, Кыргыз Республикасынын Жогорку Кеңешинин депутаттар курамында этникалык топтордун өкүлдөрү 95,45% - кыргыздар, 4,55% - башка улуттар түзөт. Ал эми жергиликтүү кеңештердин депутаттарынын составында 89,10% - кыргыздар, 10,9% - башка улуттардан. Ар кандай улуттардын өкүлдөрү  жер-жерлерде этникалык топтордун жайгашуу өзгөчөлүктөрүнө жараша бардык деңгээлдеги шайлоо комиссияларына кеңири киргизилген.

2025-жылдын 19-февралында Кыргыз Республикасынын Шайлоо жана референдум өткөрүү боюнча борбордук комиссиясында Токтогул жана Кант шаарларынын аймактык шайлоо комиссияларына саясий партиялардан келген талапкерлердин кезектүүлүгүн аныктоо жана аларды резервдерине киргизүү боюнча чүчүкулак өткөрүлдү. Чүчүкулак өткөрүү Кыргыз Республикасынын «Шайлоо жана референдум өткөрүү боюнча шайлоо комиссиялары тууралуу» мыйзамы жана «Шайлоо комиссияларын түзүү, кайрадан түзүү жана шайлоо комиссияларынын резервин түзүү тартиби» жөнүндө жобого ылайык жүргүзүлдү. Белгилей кетсек, 2024-жылдын 10-декабрында шайлоо жана референдум өткөрүү боюнча аймактык шайлоо комиссияларын түзүү тууралуу маалымат массалык маалымат каражаттарында жарыяланган. Аймактык шайлоо комиссияларын түзүү беш жылдык мөөнөткө жүргүзүлөт жана саясий партиялар менен жергиликтүү өз алдынча башкаруу органдарынын тең укуктуу өкүлдөрүн камтыйт. Эгерде саясий партиялардан келген талапкерлердин саны белгиленген нормадан ашып кетсе, чүчүкулак  өткөрүлөт, бул болсо процессти объективдүү жана ачык жүргүзүүгө кепилдик берет. Токтогул аймактык шайлоо комиссиясы үчүн өткөрүлгөн чүчүкулак өткөрүүгө жети саясий партиянын өкүлдөрү катышты: “Жаңы Кыргызстан”, “Эл умүтү”, “Өнүгүү Прогресс”, “Бирге Вместе”, “Тынчтык”, “Ынтымак” жана “Ишеним” партияларынан. Чүчүкулак өткөрүү жыйынтыгында комиссияга кирген талапкерлердин кезектүүлүгү аныкталып, ошондой эле резервге кирген талапкерлер белгиленди. Кант аймактык шайлоо комиссиясы үчүн чүчүкулак  өткөрүүгө алты саясий партиянын өкүлдөрү катышты: “Эл үмүтү”, “Калк Ынтымагы”, “Жаңы Кыргызстан”, “Ордо”, “Улуу журт” жана “Ишеним” партиялары. Чүчүкулак  өткөрүү жыйынтыгы комиссиянын резервине кирген талапкерлердин кезектүүлүгүн аныктады.

Кыргыз Республикасынын Президенти Садыр Жапаров “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамына өзгөртүүлөрдү киргизүү тууралуу” Кыргыз Республикасынын конституциялык Мыйзамына кол койду. Конституциялык Мыйзам 2025-жылдын 29-январында Кыргыз Республикасынын Жогорку Кеңеши тарабынан кабыл алынган.  Аталган конституциялык Мыйзам КыргызРеспубликасынын Конституциялык сотунун 2023-жылдын 15-ноябрындагы чечимин ишке ашыруу, майыптыгы бар адамдар үчүн шайлоо күрөөсүнүн өлчөмүн азайтуу максатында кабыл алынган. Конституциялык Мыйзам менен “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамынатөмөнкү өзгөртүүлөрдү киргизүү каралган: 1) өзүн-өзү көрсөтүү тартибинде бир мандаттуу шайлоо округу боюнча Кыргыз Республикасынын Жогорку Кеңешинин депутатына талапкер Борбордук шайлоо комиссиясынын атайын эсебине эсептик көрсөткүчтүн миң эселенген өлчөмүндө шайлоо күрөөсүн өзүнүн шайлоо фондунун каражаттарынан төгөт; 2) бир мандаттуу шайлоо округу боюнча Кыргыз Республикасынын Жогорку Кеңешинин депутатына майыптыгы бар адамдарболуп саналган талапкерлер үчүн шайлоо күрөөсү майыптыктын тобун эске алуу менен төмөнкүдөй белгиленет: –  III топтогу майыптарга – эсептик көрсөткүчтүн жети жүз эсе өлчөмүндө; – I жана II топтогу майыптарга – эсептик көрсөткүчтүн беш жүз эсе өлчөмүндө.

Бүгүн, 19-февралда, Кыргыз Республикасынын Шайлоо жана референдум өткөрүү боюнча борбордук комиссиясында жаңы мүчө Гүлшаркан Култаева тааныштырылды. Президенттин жана Министрлер Кабинетинин Жогорку Кеңештеги туруктуу өкүлү Алмасбек Абытов жана Кыргыз Республикасынын Жогорку Кеңешинин Конституциялык мыйзамдар, мамлекеттик түзүлүш, сот-укуктук маселелер жана Регламент комитетинин төрайымы Чолпон Султанбекова жаңы мүчөнү тааныштырышып, ишине ийгиликтерди каалады. Буга чейин Жогорку Кеңештин жыйынында депутаттар Гүлшаркан Култаеванын талапкерлигин карап чыгып, Шайлоо жана референдум өткөрүү боюнча борбордук комиссиясынын мүчөлүгүнө бекитишкен. Анын талапкерлиги Кыргыз Республикасынын Президенти тарабынан сунушталып, жалпы 78 депутат анын талапкерлигин колдогон. Гүлшаркан Оконовна Култаеванын өмүр баяны 1972-жылы 24-октябрында, Жалал-Абад облусунун, Аксы районуна караштуу Ак-Суу айылында туулган. Жогорку билимдүү. 1993-жылы Ош Технологиялык техникумун «Жип ийрүү өндүрүшүнүн техниги» адистигин, 2001-жылы Ош Технологиялык Университетинин «Бухгалтердик эсеп жана аудит» адистигин бүтүргөн. Эмгек жолу 1989-жылы Ош шаарындагы №59 бала бакчада тарбиячынын жардамчысы болуп башталган. 1990-2016-жылдары – жеке ишкерлик менен алектенген. 2016-2021-жылдары – Ош шаардык кеңешинин депутаты. 2021-жылдын ноябрь айында «Ата-Журт Кыргызстан» саясий партиясынан Кыргыз Республикасынын Жогорку Кеңешинин VII чакырылышынын депутаты болуп шайланган. Сыйлыктары: Туризмди өнүктүрүүгө кошкон салымы үчүн Ош облустук мамлекеттик администрациясынын Ардак грамотасы (2001-ж.) «Бизнес Шанс» сынагында «2001-жылдын мыкты ишкери» наамы, Кыргыз Республикасынын Өкмөтү (2001-ж.) Кыргыз Республикасынын Туризм, спорт жана жаштар саясаты боюнча Мамлекеттик комитетинин Ардак грамотасы (2003-ж.) Кыргыз Республикасынын Өкмөтүнө караштуу Мамлекеттик Бажы кызматынын Ардак грамотасы (2011-ж.) Үй-бүлөлүү, бир кызы жана үч уулу бар.  

2025-жылдын 19-февралында Борбордук шайлоо комиссиясынын төрагасы Тынчтык Шайназаров “Эгль” коомдук фондунун директору Чолпон Өмүрканова менен жолугуп, республикадагы мүмкүнчүлүгү чектелген жарандарыбыздын шайлоодогу орду жана аларга карата камкордуктар тууралуу сүйлөштү. Жолугушууга БШКнын мүчөсү Искандер Гайпкулов жана БШКнын аппаратынын кызматкерлери да катышты. Жолугушууда төрага Тынчтык Шайназаров Борбордук шайлоо комиссиясы жана "Эгль" коомдук фондунун ортосундагы кызматташтыкты жогорулатуу маанилүү экенин белгилеп, мүмкүнчүлүгү чектелген шайлоочулар үчүн шарттардын түзүү маанилүү экенине токтолду. "Биздин негизги максат — мүмкүнчүлүгү чектелген жарандарыбызга шайлоолордо тоскоолдуксуз катышууга шарттарды түзүп берүү. Бул ишти биргеликте  жүргүзүп, биздин жана сиздердин фонддун кызматташтыгынын натыйжасында гана ийгиликтүү ишке ашыруу мүмкүн. Мындан тышкары, бул – мамлекеттик органдардын жана жергиликтүү бийлик органдарынын да милдети. Бардык тараптардын ортосундагы кызматташтык шайлоочулардын укугун коргоо үчүн маанилүү" деди БШК төрагасы. Өз кезегинде “Эгль” коомдук фонудунун директору Чолпон Өмүрканова фонд буга чейин Борбордук шайлоо комиссиясы менен жакшы кызматташып келгенин, мүмкүнчүлүгү чектелген жарандарга жана башка категориядагы адамдарга жардам берүү багытында атайын эксперттер иш алып барып келгенин жана мындан ары кызматташтыкты уланта берерине токтолду. Ошондой эле төрага 2024-жылдын 1-августуна карата Кыргызстанда 18 541 мүмкүнчүлүгү чектелген жарандарыбыз катталганын жана алардын 49,4% аялдар, 50,6% эркектер экенин билдирди. БШКнын кызматкерлери арасында да ден соолугунун мүмкүнчүлүгү чектелген кызматкерлер бар экенин жана алар өз ишин ийгиликтүү аткарып жатканын айтты. Мындан тышкары, Тынчтык Шайназаров Борбордук шайлоо комиссиясынын мекемелер аралык жумушчу тобу бар экенин, алардын ишин күчөтүү боюнча иштер күчөтүлөрүн баса белгилеп кетти. Белгилей кетсек, шайлоо комиссияларында 38 мүмкүнчүлүгү чектелген жаран иштейт: БШК аппаратынын 131 кызматкеринин ичинен — 2 кызматкер мүмкүнчүлүгү чектелген жаран; 56 аймактык комиссиянын 650 мүчөсүнүн ичинен — 2 мүчө мүмкүнчүлүгү чектелген жаран; 2438 участкалык комиссиянын 30 503 мүчөсүнүн ичинен — 34 мүчө мүмкүнчүлүгү чектелген жаран. БШК КР бардык жарандар үчүн шайлоо процессине тең мүмкүнчүлүктөрдү камсыз кылуу боюнча ишин улантууда жана бул багытта активдүү катышып жаткан коомдук уюмдарга ыраазычылык билдирет.  

Кыргыз Республикасынын Шайлоо жана референдум өткөрүү боюнча борбордук комиссиясы Кыргыз Республикасынын Жогорку Кеңешинин депутатынын бош калган мандатын өткөрүп берүү жөнүндө чечим кабыл алды. Кыргыз Республикасынын Шайлоо жана референдум өткөрүү боюнча борбордук комиссиясынын 2025-жылдын 18-февралындагы жыйынында, Кыргыз Республикасынын Жогорку Кеңешинин «Ата-Журт Кыргызстан» саясий партиясынан талапкерлердин тизмеси боюнча Жунушалиева Гүлсүнкан Ишенгазиевна Кыргыз Республикасынын Конституциялык мыйзамынын 65-беренесинин 3-бөлүмү жана 4-1-бөлүмүнө ылайык, «Ата-Журт Кыргызстан» саясий партиясынан Кыргыз Республикасынын Жогорку Кеңешинин депутаты болуп катталды, ага белгиленген үлгүдөгү күбөлүк жана төш белги берилди.

Кыргыз Республикасынын Шайлоо жана референдум өткөрүү боюнча борбордук комиссиясы 2025-жылдын 18-февралындагы жыйналышында «Ата-Журт Кыргызстан» парламенттик фракциясынан Кыргыз Республикасынын Жогорку Кеңешинин депутаты Култаева Гүлшаркан Оконовнанын ыйгарым укуктарын мөөнөтүнөн мурда токтотту. КР БШК «Ата-Журт Кыргызстан» парламенттик фракциясынан Кыргыз Республикасынын Жогорку Кеңешинин депутаты Култаева Гүлшаркан Оконовнанын ыйгарым укуктарын мөөнөтүнөн мурда токтотуу боюнча келип түшкөн жеке арызынын негизинде, Кыргыз Республикасынын Конституциясынын 79-беренесинин 2-бөлүгүнүн 1-пунктуна, «Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө» Кыргыз Республикасынын конституциялык Мыйзамынын 65-беренесинин 4-бөлүгүнүн 1-пунктуна, «Кыргыз Республикасынын Жогорку Кеңешинин депутатынын статусу жөнүндө» Кыргыз Республикасынын Мыйзамынын 3-беренесинин 1-бөлүгүнүн 1-пунктуна, 2-бөлүгүнө ылайык, “Ата-Журт Кыргызстан” парламенттик фракциясынан Кыргыз Республикасынын Жогорку Кеңешинин депутаты Култаева Гүлшаркан Оконовнанын ыйгарым укуктарын мөөнөтүнөн мурда токтотуу жөнүндө токтом кабыл алды. Кыргыз Республикасынын Жогорку Кеңешинин депутаты Култаева Гүлшаркан Оконовнанын күбөлүгү анык эмес деп табылды.

Өткөрүү датасы: 18 февралы 2025-ж. Убактысы: 15:00 Өткөрүлүүчү жери: жыйналыштар залы       1. Кыргыз Республикасынын Жогорку Кеңешинин депутаты Г.О. Култаеванын ыйгарым укуктарын мөөнөтүнөн мурда токтотуу жөнүндө (баяндамачы – Айтикеев Т.О., шайлоолорду уюштуруу башкармалыгынын начальниги) 2. Кыргыз Республикасынын Жогорку Кеңешинин депутатынын бош калган мандатын өткөрүп берүү жөнүндө (баяндамачы – Айтикеев Т.О., шайлоолорду уюштуруу башкармалыгынын начальниги) 3. Ар кандай маселелер

2025-жылдын 11-февралында Кыргыз Республикасынын шайлоо жана референдум өткөрүү боюнча борбордук комиссиясынын жыйыны болуп өттү. Жыйындын күн тартибинде БШКнын төрага орун басарын шайлоо маселеси каралды. Ачык добуш берүү жыйынтыгы менен Борбордук шайлоо комиссиясынын төрага орун басары болуп Жупуева Айдана Садыковна шайланды. Айдана Жупуева ишеним көрсөткөн кесиптештерине ыраазычылык билдирип, өлкөдөгү шайлоо процессин жакшыртуу боюнча дагы да натыйжалуу иштөө маанилүүлүгүн белгиледи.. Жупуева Айдана Садыковнанын өмүр баяны Жупуева Айдана Садыковна 1977-жылы 4-мартта, Ош облусунун, Алай районунун, Көлдүк айылында туулган. Жогорку билимдүү. 1999-жылы Кыргыз мамлекеттик улуттук университетинин (КГНУ), экономикалык факультетин аяктаган. Эмгек жолу: 2025-жылдын 11-февралынан баштап Кыргыз Республикасынын Шайлоо жана референдум өткөрүү боюнча борбордук комиссиясынын төрагасынын орун басары 2021-2025 жж. – Кыргыз Республикасынын Шайлоо жана референдум өткөрүү боюнча борбордук комиссиясынын мүчөсү; 2020-2021-жж. – Кыргыз Республикасынын Борбордук шайлоо комиссиясынын аппаратынын шайлоолорду уюштуруу боюнча бөлүмүнүн эксперти; 2017-2020-жж. – Кыргыз Республикасынын Шайлоо жана референдум өткөрүү боюнча борбордук комиссиясынын аппаратынын документтерди камсыздоо бөлүмүнүн жетектөөчү адиси; 2016-2017-жж. – Кыргыз Республикасынын Эмгек жана социалдык өнүктүрүү министрлигинин гендердик маселелер боюнча бөлүмүнүн жетектөөчү адиси; 2014-2015-жж. – Кыргыз Республикасынын Жогорку Кенешинин вице-спикеринин консультанты; 2011-2014-жж. – Кыргыз Республикасынын Сотторду тандоо кеңешинин мүчөсү; 2008-2012-жж. – Ош мамлекеттик университетинин бухгалтердик эсеп жана экономикалык талдоо кафедрасынын улук окутуучусу; 2001-2008-жж. – Ош технологиялык университетинин окутуучусу.

Кыргыз Республикасынын Шайлоо жана референдум өткөрүү боюнча Борбордук комиссиясы, 2025-жылдын 10-февралдагы жыйынында, Кыргыз Республикасынын Шайлоо жана референдум өткөрүү боюнча борбордук комиссиясы жергиликтүү кеңештеринин кээ бир депутаттарынын ыйгарым укуктарын мөөнөтүнөн мурда токтотуу жана бош калган мандаттарды жергиликтүү кеңештердин депутаттыгына талапкерлерге өткөрүп берүү жөнүндө Лейлек, Баткен, Кемин, Аламүдүн, Жайыл жана Ноокат аймактык шайлоо комиссияларынын чечимдерин бекитти. Төмөндөгү депутаттардын ыйгарым укуктары токтотулуп, мандаттары тизмедеги кийинки талапкерлерге өткөрүлүп берилди: Лейлек районунун, Раззаков шаардык кеңешинин «Мурас» депутаттык фракциясынан Абдисаламов Алмазбек Азиреткуловичтин ыйгарым укуктары токтотулуп, анын мандаты - Жаназаков Садирбек Шамшиевичке өткөрүлүп берилди. Баткен районунун, Ак-Татырык айылдык кеңешинен Жангиров Дурусбек Сейдимахматовичтин ыйгарым укуктары токтотулуп, анын мандаты - Джапаров Нүрүдин Дүйшеевичке өткөрүлүп берилди. Баткен районунун, Ак-Татырык айылдык кеңешинен Абдуллаева Мухаббат Эшбаевнанын ыйгарым укуктары токтотулуп, анын мандаты Авазбеков Курбанбек Бахаповичке өткөрүлүп берилди. Кемин районунун, Кемин шаардык кеңешинин «Эмгек» депутаттык фракциясынан Абдырахманов Марс Рысбековичтин ыйгарым укуктары токтотулуп, анын мандаты - Чопиев Медер Нурлановичке өткөрүлүп берилди. Аламүдүн районунун, Байтик-Баатыр айылдык кеңешинен Абдылдаева Дамира Кожобековнанын ыйгарым укуктары токтотулуп, анын мандаты - Аширкулов Кадырбек Биялиевичке өткөрүлүп берилди. Жайыл районунун, Жайыл айылдык кеңешинен Калиева Алина Алмасбековнанын ыйгарым укуктары токтотулуп, анын мандаты - Абдрахманова Кишимжан Токушпековнага өткөрүлүп берилди. Ноокат районунун, Кеңеш айылдык кеңешинен Бегматов Нурадил Жолдошалиевичтин ыйгарым укуктары токтотулуп, анын мандаты - Субанов Өмүрбек Бектемировичке өткөрүлүп берилди.

       Бүгүн Кыргыз Республикасынын  Борбордук шайлоо комиссиясынын жыйынында Н.Шайлдабекова өз арызы боюнча төраганын кызмат ордунан бошотуу тууралуу арызын берди, аны Борбордук шайлоо комиссиясынын мүчөлөрү канааттандырды. Ачык добуш берүүнүн жыйынтыгында Тынчтык Шайназаров Кыргыз Республикасынын Борбордук шайлоо комиссиясынын жаңы төрагасы болуп шайланды. Н.Шайлдабекова шайлоо комиссиясындагы кесиптештерине, ошондой эле мамлекеттик органдардагы, жарандык сектордогу, эл аралык уюмдардагы, дипломатиялык өкүлчүлүктөрдѳгү ѳнѳктѳштѳрүнѳ жана жалпыга маалымдоо каражаттарынын өкүлдөрүнө биргелешкен иши үчүн ыраазычылык билдирди. Ал   биргелешкен күч-аракеттердин аркасында шайлоо системасын өнүктүрүүдөгү эң маанилүү кадамдарды ишке ашырууга мүмкүн болгон, бирок процесс андан ары өркүндөтүүнү талап кыларын белгиледи. Н.Шайлдабекова кесиптештерине мындан аркы иштерине ийгиликтерди каалады. Тынчтык Шайназаров өз кезегинде көрсөтүлгөн ишеним үчүн ыраазычылык билдирди. Ал БШКнын ишинин артыкчылыктары шайлоо системасын өркүндөтүү, анын ачык-айкындуулугун жана көз карандысыздыгын жогорулатуу, ошондой эле жарандардын шайлоого болгон ишенимин бекемдөө экендигин белгиледи. Эске сала кетсек, Н.Шайлдабекова Борбордук шайлоо комиссиясын 2016-жылдан бери жетектеп келген. Борбордук шайлоо комиссиясы Кыргыз Республикасында демократияны жана мыйзамдуулукту чыңдоого күч-аракеттерди багыттоо менен шайлоолорду жана референдумдарды уюштуруу жана өткөрүү боюнча ѳз ишин улантат.  Тынчтык Шайназаровдун ѳмүр баяны 1974-жылы 27-февралда, Ош облусунун, Кара-Суу районунун, Мады айылында туулган. 1991-жылы Ош шаарындагы № 7 Нариманов атындагы орто мектебин аяктаган. 1991-1996 жж. Кыргыз мамлекеттик улуттук университетинин юридикалык факультетинин “укук таануу” адистигин ийгиликтүү аяктаган. Эмгек жолу: 10.02.2025- ж - Кыргыз Республикасынын Шайлоо жана референдум өткөрүү боюнча борбордук комиссиясынын төрагасы. 2021-2025 ж.ж. – Кыргыз Республикасынын Шайлоо жана референдум өткөрүү боюнча борбордук комиссиясынын төрагасынын орун басары. 2020-2021-ж.ж. – Кыргыз Республикасынын Шайлоо жана референдум өткөрүү боюнча борбордук комиссиясынын мүчөсү. 2015-2020-ж.ж. – Кыргыз Республикасынын Жогорку Кеңешинин VI- чакырылышынын депутаты. 2010-2015-ж.ж. – Кыргыз Республикасынын Жогорку Кеңешинин V- чакырылышынын депутаты. 2009-2010-ж.ж. – Жалал-Абад шаарынын прокурору. 2007-2009-ж.ж. – Ош шаарынын прокурорунун улук жардамчысы. 2004-2007-ж.ж. –  Ош шаардык прокуратурасынын кылмыштарды тергөө боюнча көзөмөлдөө бөлүмүнүн башчысы. 1999-2004-ж.ж. – Ош облусунун прокуратурасынын ага-тергөөчүсү, прокурору. 1997-1999-ж.ж. –  Кызыл-Кыя шаардык прокуратурасынын ага-тергөөчүсү. 1996-1997 ж.ж. –  Чоң-Алай районунун прокуратурасынын мөөнөткер-тергөөчүсү. Ардактуу наамы –  Кыргыз Республикасынын “Эмгек сиңирген” юристи. Класстык чини –  Кыргыз Республикасынын мамлекеттик кызматынын 2-класстагы мамлекеттик кеңешчиси. Сыйлыктары: Кыргыз Республикасынын Ардак грамотасы. Кыргыз Республикасынын Жогорку Кеңешинин Ардак грамотасы. Кыргыз Республикасынын Өкмөтүнүн Ардак грамотасы. ЖККУнун Парламенттик ассамблеясынын Ардак грамотасы. «КМШ ПАА 25 жыл» медалы. ТүркПА медалы. “Юстициянын мыктысы” медалы.      

Өткөрүү датасы: 10-февраль 2025-ж. Убактысы: 18:30 Өткөрүлүүчү жери: жыйналыштар залы       1. Кыргыз Республикасынын жергиликтүү кеңештеринин кээ бир депутаттарынын ыйгарым укуктарын мөөнөтүнөн мурда токтотуу жана бош калган мандаттарды жергиликтүү кеңештердин депутаттыгына талапкерлерге өткөрүп берүү жөнүндө Лейлек, Баткен, Кемин, Аламүдүн, Жайыл жана Ноокат аймактык шайлоо комиссияларынын чечимдерин бекитүү тууралуу (баяндамачы – Кожокеева М.Д., шайлоолорду уюштуруу бөлүмүнүн башчысы) 2. Ар кандай маселелер

2025-жылдын 6-февралында Бүткүл дүйнөлүк шайлоо күнүн майрамдоонун алкагында Борбордук шайлоо комиссиясы Кыргызстан элинин Ассамблеясы менен биргеликте жарандык жана санариптик билим берүү борборун ачты. Иш-чарага Кыргызстан элинин Ассамблеясынын төрагасы А.Матубраимов, Борбордук шайлоо комиссиясынын төрагасы Н.Шайлдабекова, Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиянын бѳлүм башчысы А. Супатаева катышты. Иш-чаранын башталышлында КР БШК менен Кыргызстан элинин Ассамблеясынын ортосунда кызматташуу боюнча меморандумга кол коюлду. Борбордун иштеши менен катар эле башка программаларды биргелешип ишке ашыруу каралды. Кыргызстан элинин Ассамблеясынын жарандык жана санариптик билим берүү борбору укуктук маданиятты жогорулатуу, маалыматтык-агартуу иш-чараларын жана жарандык иденттүүлүктү калыптандырууга жана биримдикти чыңдоого багытталган калк менен жолугушууларды уюштуруу боюнча иштерди жүргүзүүнү пландаштырууда. Кыргызстан элинин Ассамблеясы тарабынан уюштурулган мамлекеттик тилди, ошондой эле диаспоралардын эне тилин үйрөтүү курстарын өткөрүү Борбордун ишинин маанилүү багыты болуп саналат. Бул этникалык топтордун өкүлдөрүнө жана мамлекеттик тилди жана диаспора тилдерин үйрөнүүнү каалагандардын баарына мүмкүнчүлүк түзөт. Мамлекеттик тилди кеңири жайылтуу жана үйрөтүү максатында кыргыз тилин үйрөнүү боюнча атайын “Кыргызча оңой” программасы көрсөтүлдү. Этникалык коомдук бирикмелердин өкүлдөрү: «Барт» чечен маданий борборунун төрагасы Алиев Өзбек, өзбек улуттук маданий борборунун төрагасы Кадыров Бахтияр, азербайжандардын «Бирлик» коомдук уюмунун президенти Бахшалиев Хансывар берилген окуу материалдарынын жеткиликтүүлүгүн жана жеңилдигин жогору баалап, мамлекеттик тилди үйрөнүүнүн жана билүүнүн маанилүүлүгүн белгилешти. Мамлекеттик тил улуттун биримдигин жана мамлекеттин туруктуулугун чыңдоонун маанилүү куралы катары кызмат кылат. Бул коомдук ырашкерликке көмөктөшөт жана ар кандай этникалык топтордун ортосундагы байланышты жана өз ара аракеттенүүнү камсыз кылат. Кыргызстан элинин Ассамблеясы мамлекеттик тилдин өнүгүшүн камсыз кылууга өзгөчө маани берип, бул багытта активдүү иш алып барууга даяр экенин билдирди. Эске сала кетсек, учурда республика боюнча китепканалардын, жаштар борборлорунун, маданият үйлөрүнүн жана жергиликтүү өз алдынча башкаруу органдарынын имараттарынын базасында 77 жарандык жана санариптик билим берүү борборлору иштеп жатат. Борборлордо жарандык билим берүү программасын ишке ашыруу жана калктын бардык катмары үчүн санариптик көндүмдөрдү жогорулатуу үчүн бардык шарттар бар. Борборлордун иш-чараларынын форматтары өлкөдөгү жарандык, укуктук жана санариптик билим берүүнү өркүндөтүүгө багытталган онлайн/оффлайн билим берүү курстарын, тренингдерди, семинарларды, конференцияларды, дебаттарды, аялдар клубдарын өткөрүүнү камтыйт.

Кыргыз Республикасынын Президенти Садыр Жапаров бүгүн, 6-февралда, Бүткүл дүйнөлүк шайлоо күнүнө байланыштуу кыргызстандыктарга кайрылуу жолдоду. Мамлекет башчысынын кайрылуусу: “Урматтуу мекендештер! Жыл сайын февраль айынын биринчи бейшембисинде дүйнө жүзүндө Бүткүл дүйнөлүк шайлоо күнү белгиленет. Бул күн мындан 20 жыл мурун Будапештте шайлоо органдарынын кесиптик майрамы катары бекитилген. Шайлоо – бул ар бир жаран өз келечеги менен өз өлкөсүнүн тагдырына таасир эте турган маанилүү процесс. Шайлоо аркылуу өлкөнү башкаруу укугу ишенип берилген бийлик органдары түзүлөт. Кыргызстан адилеттүү жана эркин шайлоосуз саясий стабилдүүлүк жана мамлекеттин туруктуу өнүгүүсү мүмкүн эместигин түшүнүү менен демократиялык шайлоо стандарттарын бекем карманат. Кыргыз Республикасынын Конституциясында эркин демократиялык шайлоонун бардык маанилүү принциптери чагылдырылган. Баш мыйзамыбыздын алгачкы беренесинде “эл мамлекеттик бийликтин жападан жалгыз булагы болуп саналат жана шайлоолор, референдумдар аркылуу өз эркин ишке ашырат” деп белгиленген. Соңку жылдары өлкөбүздө шайлоо процессинин бардык негизги жагдайларын камтыган масштабдуу шайлоо реформасы жүргүзүлүп жатат. Реформанын алкагында шайлоочуларды каттоо жана биометрикалык идентификациялоо боюнча добуш берүүнүн жыйынтыктарын эсептөөнүн тактыгын, ачык-айкындуулугун жана шайлоонун натыйжаларына коомдук көзөмөлдү камсыз кылуунун заманбап технологиялары киргизилип, мыйзамдуулукту жогорулатуу боюнча чаралар көрүлдү. Кыргызстандын шайлоо практикасы эл аралык деңгээлде жарандардын шайлоо укуктарын, шайлоонун ачык-айкындуулугун жана аныктыгын камсыз кылуу боюнча алдынкы тажрыйба катары таанылгандыгы абдан кубанычтуу. Ошол эле учурда татыктуу талапкерлерди таза жана калыс тандоого мамлекеттин гана эмес, шайлоонун бардык катышуучуларынын чогуу-чаран аракет кылышы абдан маанилүү. Мен бул багытта эки жагдайды белгилей кетмекчимин: 1. Кыргызстанда бардык тармакта коррупцияга каршы саясат жүргүзүлүүдө. Коррупциянын кейиштүү көрүнүштөрүнүн бири – бул шайлоодо добуштарды сатып алуу. Добуштарды сатып алуу менен эртеңки кызмат адамынын шайлоо учурунан баштап эле коррупцияга белчесинен батышына негиз түзүлөт. Көрүлгөн мыйзамдык чаралардын жана укук коргоо органдары менен шайлоо комиссияларынын аракеттеринин аркасында соңку мезгилде шайлоочулардын добушун сатып алуу деңгээли кыйла төмөндөдү. Бирок добуш сатып алуу аракеттерине каршы жарандардын өздөрүнүн келишпес позициясы, албетте, эң күчтүү жана таасирдүү курал болмок. Мына ушундай позиция гана добуштарды сатып алууну толугу менен жок кыла алат. Тынымсыз аракеттерибиз менен биз буга да жетишебиз деп ишенем. 2. Мамлекеттин жана элдин кызыкчылыгы үчүн иштей турган иш билги, абийирдүү талапкерлерди шайлоо үчүн жарандардын шайлоого активдүү катышуусу маанилүү. Жүргүзүлүп жаткан реформанын аркасында добуш берүүнүн жыйынтыгында бүгүнкү күндө жарандардын ар бир добушу так эсепке алынып, ким депутат, же Президент болорун шайлоочулардын өздөрү аныктап жатат. “Ар бир жарандын добушу маанилүү, ал өлкөнүн өнүгүшүнө таасир эте алат” деген тезис Кыргызстанда реалдуу мазмунга ээ! Шайлоо маалында шайлоочулардын активдүүлүгү төмөн болгон учурда бийликке келүүнү кѳздѳгѳндѳрдүн ѳзүнүн тарапташтарынын чакан тобун ишке тартуу менен, шайлоочуларды адаштырып-жазгырып жеке кызыкчылыктары үчүн “жеңил” өтүшүнө мүмкүнчүлүктөрдү түзөт. Ошондуктан жарандар активдүү катышып, татыктууларды тандоо аркылуу шайлануучу органдардын сапаттык курамына таасир эте турган ѳздѳрүнүн укуктарын жүзѳгѳ ашырышы маанилүү! Ардактуу кыргызстандыктар! 2024-жылдын 17-ноябрында Кыргызстандын жергиликтүү кеңештеринин депутаттарын шайлоо болуп өттү. Административдик-аймактык реформага байланыштуу ѳткѳрүлгөн жергиликтүү шайлоолор ѳзгѳчѳ актуалдуу жана маанилүү болду. Шайлоо аркылуу жер-жерлерде жарандардын кызыкчылыгында натыйжалуу иштөөгө жөндөмдүү өкүлчүлүктүү органдардын системасы оптималдаштырылды. Ошентип биз мурда убада кылгандай, жергиликтүү кеңештерге жигердүү, жоопкерчиликтүү жана татыктуу депутаттардын келүүсү үчүн шайлоону ачык-айкын жана эркин өткөрүүгө бардык шарттар түзүлдү. Эми жергиликтүү кеңештердин жаңы чакырылыштагы депутаттарынын алдында жакынкы 5 жылда жергиликтүү өнүгүүнүн эң орчундуу маселелерин чечүүдө чоң милдеттер турат. Бул үчүн жарандардын пикирлерин жана суроо-талаптарын эске алуу менен жергиликтүү маанидеги маселелерди чечүү боюнча жергиликтүү өз алдынча башкаруунун өкүлчүлүктүү жана аткаруу органдарынын биргелешкен иштерин уюштуруу зарыл. Андыктан, билекти бек түрүп, баарыбыздын жалпы ишибизди – жарандарыбыздын жашоо деңгээлин жогорулатууну жана аймактарды өнүктүрүүнү жана жаңы, өнүккөн Кыргызстанды курууну колго алышыбыз керек! Жергиликтүү кеңештерди шайлоодо аткарган иштери үчүн шайлоо комиссияларынын тутумунун бардык мүчөлөрүнө ыраазычылык билдирем. Шайлоо комиссияларынын мүчөлөрү мыйзамга жана демократиялык шайлоо принциптерине берилгендигин көрсөтүштү. Жергиликтүү кеңештердин депутаттарын шайлоо бардык деңгээлдеги шайлоолордун жаңы циклинин башталышын шарттады. Эми 2026-жылы Кыргызстанда Жогорку Кеңештин депутаттарын шайлоо, андан кийин президенттик шайлоо өткѳнү турат. Бул шайлоолор бардык катышуучулар үчүн бирдей мүмкүнчүлүктөрдү камсыз кылуу менен, таза атаандаштыктын жана мыйзамдуулуктун шартында өтүшү керек. Элдин эрки Кыргызстандын өнүгүүсүндѳ чечүүчү фактор болуп келгенин жана болуп кала берерин, ал эми эркин жана таза шайлоо демократиянын жана мамлекеттүүлүктүн негизи экенин эстен чыгарбоо зарыл! Шайлоо комиссияларынын жамааты бардык кызыкдар органдар жана уюмдар менен биргеликте, алдыдагы шайлоо циклинин бардык иш-чараларын татыктуу уюштуруу үчүн бүт күч-аракетин жумшаарына ишенем. Борбордук, аймактык жана тилкелик шайлоо комиссияларынын урматтуу мүчөлөрү! Сиздерди бүгүнкү маанилүү майрам – Бүткүл дүйнөлүк шайлоо күнү менен куттуктап кетүүгө уруксат этиңиздер! Өз ишмердигиңиздер менен шайлоо процесстеринин таза жана мыйзамдуу өтүшүн камсыз кылуунун, жарандардын өз пикирин эркин билдирүү укугун коргоонун алдынкы сабында турасыздар. Атуулдук парзыңыздар жана өз ишиңиздерге берилгендигиңиздер, кесипкөйлүгүңүздөр, калыс жана бекем принциптериңиздер Кыргызстанда таза жана ачык шайлоонун өтүшүнүн маанилүү шарты болуп саналат! Сиздерге жана үй-бүлөңүздөргө чың ден соолук, бакубатчылык, ийгилик жана байгерчилик каалайм!

2025-жылдын 6-февралында, Бүткүл дүйнөлүк шайлоо күнүндө Бишкек шаарында Кыргыз Республикасынын жергиликтүү кеңештеринин депутаттарын шайлоонун жыйынтыгы боюнча коомдук диалог болуп өттү. Иш-чараны Шайлоо жана референдум өткөрүү боюнча борбордук комиссиясы “Өнүктүрүү саясат институту” коомдук бирикмеси менен биргеликте “Кыргыз Республикасындагы жергиликтүү өз алдынча башкарууну өнүктүрүү үчүн” өнөктөштүк программасынын алкагында өткөрдү. Коомдук диалогго Борбордук шайлоо комиссиясынын мүчөлөрү, мамлекеттик органдардын, жарандык коомдук уюмдардын, эл аралык уюмдардын өкүлдөрү, көз карандысыз эксперттер, блоггерлер жана жалпыга маалымдоо каражаттарынын өкүлдөрү катышты. Коомдук диалогду ачып жатып, БШКнын төрагасы Н.Шайлдабекова жергиликтүү кеңештерге шайлоолор жаңы шайлоо циклин башталгандыгын, ал 2026-жылдагы парламенттик шайлоо, андан кийин Президентти шайлоо менен улана турганын белгиледи. Жергиликтүү кеңештерге шайлоодо бир катар жаңы технологиялар, программалар, жабдуулар жана комиссиялар менен мамлекеттик органдардын өз ара аракеттенүүсүнүн формалары сыноодон ѳттү. Жергиликтүү кеңештерди шайлоодо колдонулган ушул жаңылыктардын оң жана терс жактарын талкуулоо сунушталды. Катышуучуларга айрым маанилүү маселелерди жана кийинки жаңы шайлоо циклинде бардык деңгээлдеги шайлоолор үчүн жалпы шарттарды кантип жакшыртууга болорун чогуу ойлонуу жана талкуулоо сунушталды. Төрага шайлоо процесси шайлоо комиссияларынын, мамлекеттик органдардын, жергиликтүү өз алдынча башкаруу органдарынын, жарандык уюмдардын, эксперттердин бирдиктүү аракети, ошондой эле эл аралык өнөктөштөрдүн, жалпыга маалымдоо каражаттарынын жана блоггерлердин колдоосу менен камсыз кылынарын белгиледи. Бул шайлоолор кызыкдар тараптардын кеңири чөйрөсүнүн күч-аракетин бириктиргендигин белгилѳѳ менен, чогуу-чаран иш- аракеттенүү үчүн ыраазычылык билдирип, келечекте биргелешкен күч-аракеттер аркылуу көйгөйлөрдү жеңип ѳтүп, шайлоо процессинин маанилүү милдеттерин чечүүгө болот деген ишенимин билдирди. Административдик-аймактык реформа Кыргызстандын аймактык түзүмүн өзгөртүү менен, жер-жерлерде – аймактарда башкаруу системасын оптималдаштырды. Шайлоо аркылуу жергиликтүү кеңештердин өкүлчүлүктүү органдарынын түзүмү толугу менен оптималдаштырылды. Жарандар жакынкы 5 жылда жергиликтүү өнүктүрүүнү ишенип тапшырган жергиликтүү кеңештердин алдында айылдардагы жана шаарлардагы жарандардын жашоосун жакшыртуу, аларды өнүктүрүү боюнча чоң милдеттер турат. Борбордук шайлоо комиссиясынын төрагасы “Өнүктүрүү саясаты институтуна” шайлоого даярдык көрүүдөгү натыйжалуу өнөктөштүгү үчүн ыраазычылык билдирип, институттун жергиликтүү кеңештерге усулдук жардам көрсөтүү жана окутуу боюнча мындан аркы ишинин маанилүүлүгүн белгиледи. Швейцариянын Кыргыз Республикасындагы элчиси Оливье Бангертер чогулгандарга Швейцариянын Кыргызстандын жергиликтүү өз алдынча башкаруу органдарына жалпысынан, өзгөчө шайлоо процессине көрсөтүп жаткан колдоо тууралуу маалымат берди. Колдоо кѳрсѳтүү жамааттарды жана алардын өкүлдөрүн өнүктүрүүнүн. окутуудан баштап материалдык гранттарды берүүгө чейинки ар кандай аспектилерин камтыйт. Ошол эле учурда Швейцария Өкмөтүнүн колдоосу ѳзгѳчѳ мүнѳзгѳ ээ, анткени ал узак мөөнөттүү үзгүлтүксүз негизде жүригүзүлүп, жергиликтүү уюмдардын жана адамдардын тике ѳздѳрүнѳ берилип жатат. «Өнүктүрүү саясаты институту» коомдук уюмунун башкармалыгынын төрагасы Надежда Добрецова Кыргызстандагы жергиликтүү кеңештердин эволюциясына өзгөчө маани берди, алар шайлоо цикли өткөн сайын улам күчтөнүп, профессионалдуу болуп бараткандыгын белгилѳѳ менен мындай дедеи: “2000-жылдардын башында жергиликтүү кеңештер кандай болгондугу эсимде. Жергиликтүү өкүлчүлүктүү органдардын ишинин сапаты кандай өсүп жатканын байкабай коюуга болбойт. Алар социалдык-экономикалык өнүгүүгө, кызмат көрсөтүүлөрдү туруктуу уюштурууга, ар бир жергиликтүү жамаатта адамдын өсүүсү үчүн шарттарды түзүү боюнча барган сайын кыйла оор чечимдерди кабыл алууда. Ѳкүлчүлүктүү орган катары кеңештердин, ошондой эле депутаттардын, анын ичинде аял-депутаттардын жеке жоопкерчилиги да жогорулап жатат, алар коомчулук үчүн маанилүү демилгелерди көтөрүп, коррупцияга каршы күрөшүп, көйгөйлөрдү чечүү жана жамааттарды өнүктүрүү үчүн кошумча ресурстарды тартып жатышат. Али да болсо депутаттар колдоого жана окутууга муктаж болгондугуна карбастан, муниципалдык депутаттардын корпусу чыныгы жоопкерчиликтүү жана демилгелүү өкүлчүлүктүү органга айланды». Борбордук шайлоо комиссиясынын төрагасынын орун басары Т.Шайназаров бул шайлоолордо колдонулган ар түрдүү органдар менен өз ара аракеттенүү форматтарынын өзгөчөлүктөрүнө токтолуп, алар процессти жакшыртууга кандай таасир эткендигин белгиледи. Атап айтканда, ал укук бузуулар жөнүндө билдирүүлөрдү кароодо компетенцияны так бөлүштүрүүгө багытталган укук коргоо органдары менен өз ара аракеттенүүдѳгү өзгөрүүлѳрдү белгилеп ѳттү. Борбордук шайлоо комиссиясынын мүчөсү, шайлоочуларды маалымдоо боюнча жумушчу топтун жетекчиси У.Жылкыбаев жергиликтүү кеңештердин депутаттарын шайлоодо маалыматтык-түшүндүрүү иштеринин маанилүү багытында мамлекеттик жана мамлекеттик эмес сектордогу өнөктөштөр менен биргеликте жүргүзүлүп жаткан иштер боюнча маалымат берди. Ал маалымат берүү ишинде мамлекет тарабынан, анын ичинде Маданият министрлиги, УТРК (аймактардагы өкүлчүлүктөрү) менен өнөктөштүктө көрүлүп жаткан чаралар тууралуу толук баяндама жасады. Ишке телекомпаниялар, анын ичинде аймактык телекомпаниялар тартылып, алар күн сайын маалымат берип, дебаттарды да көрсөтүп турду. Э.Искаков шайлоо учурунда блоггерлик коомчулуктун маалыматтык кампанияга кошкон салымы тууралуу маалымат берди. Диалогдун жүрүшүндө маалымат өнөктүгүнө активдүү катышкан жалпыга маалымдо каражаттарынын жана блоггер коомчулугунун салымы жогору бааланды. Шайлоо учурунда социалдык тармактарга көз карандысыз мониторинг жүргүзүүнүн биринчи тажрыйбасы тууралуу Э.Токтогулова баяндады. Катышуучулар бул маанилүү жана толук камтылган тажрыйбага айлангандыгын, ишти улантуунун маанилүүлүгүн белгилешти, аны кийинки шайлоолордо ѳнүктүрүүнүн зарыл. Кыргыз Республикасынын жергиликтүү өз алдынча башкаруу бирлигинин директору Бектурган Орозбаев диалогдун катышуучуларын жаңы жергиликтүү кеңештердин депутаттарынын ишмердүүлүгү жана алардын муктаждыктары менен тааныштырды. Ал депутаттар бирикменин колдоосунан куру калбасын айтып, жергиликтүү эл өкүлдөрүнүн статусун көтөрүү үчүн мамлекет менен биргеликте иш алып барууга даяр экендиктерин билдирди. Ал эми парламенттик шайлоо боюнча сунуштарга келсек, бул маселелерди ведомстволор аралык жумушчу топтун алкагында өзүнчө талкуулоонун зарылдыгы белгиленди. Талкуунун жыйынтыгында келечектеги шайлоо өнөктүгүнүн натыйжалуулугун жогорулатуу боюнча сунуштар түзүлѳрү абзел. Иш-чара 2024-жылдын 17-ноябрында жергиликтүү кеңештердин депутаттарын шайлоону даярдоого жана өткөрүүгө активдүү көмөк көрсөткөндүгү үчүн шайлоо процессинин катышуучуларына Ардак грамоталарды жана ыраазычылык каттарды тапшыруу аземи менен аяктады. Маалымат иретинде: жыл сайын февралдын биринчи бейшембисинде бардык өлкөлөр 2005-жылы Венгрияда шайлоо органдарынын кесиптик майрамы катары негизделген Бүткүл дүйнөлүк шайлоо күнүн белгилешет. Бүткүл дүйнөлүк шайлоо күнү эркин жана таза шайлоонун маанилүүлүгүн эскертип, ар бир жарандын добушу керектүү жана маанилүү экенин, ал өлкөнүн өнүгүшүнө таасир эте тургандыгын жарандардын аң-сезиминде бекемдейт. Кыргыз Республикасында шайлоо реформасы жигердүү ишке ашырылууда. Шайлоолордун ишенимдүүлүгүн жана айкындуулугун камсыз кылуу, шайлоо процессинин атаандаштык жөндөмдүүлүгүн жогорулатуу, шайлоонун инклюзивдүүлүгүн кеңейтүү, ошондой эле жарандардын эркин жана адилет ѳз эркин билдирүүсү үчүн укуктук жана практикалык шарттарды түзүү реформанын азыркы этабынын негизги жетишкендиктеринен болуп саналат.  

КР БШК «Ата-Журт Кыргызстан» саясий партиясынан Кыргыз Республикасынын Жогорку Кеңешинин депутаттыгына катталган талапкерлердин тизмесинен чыгаруу жөнүндө Молдалиева Шарийпа Токтоматовнадан Кыргыз Республикасынын Шайлоо жана референдум өткөрүү боюнча борбордук комиссиясына түшкөн арызынын негизинде, «Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө» Кыргыз Республикасынын конституциялык Мыйзамынын 65-беренесин, «Кыргыз Республикасынын Шайлоо жана референдум өткөрүү боюнча борбордук комиссиясы жөнүндө» Кыргыз Республикасынын конституциялык Мыйзамынын 4, 8-беренелерин жетекчиликке алып, Кыргыз Республикасынын Шайлоо жана референдум өткөрүү боюнча борбордук комиссиясы Молдалиева Шарийпа Токтоматовна «Ата-Журт Кыргызстан» саясий партиясынан Кыргыз Республикасынын Жогорку Кеңешинин депутаттыгына катталган талапкерлеринин тизмесинен чыгаруу чечимин кабыл алды. Кыргыз Республикасынын Шайлоо жана референдум өткөрүү боюнча борбордук комиссиясынын 2021-жылдын 24-октябрындагы «Ата-Журт Кыргызстан» саясий партиясынын талапкерлеринин тизмесин каттоо жөнүндө» №859 чечиминде талапкер Молдалиева Шарийпа Токтоматовнаны каттоо бөлүгү күчүн жоготту деп табылды.