Кыргыз Республикасынын Шайлоо жана референдум өткөрүү боюнча борбордук комиссиясынын 2018-жылдын 23-июлундагы № 150 “Бишкек шаарынынын мэрин шайлоону дайындоо жөнүндө” токтому менен Кыргыз Республикасынын Бишкек шаарынын мэрин шайлоо 2018-жылдын 8-августуна, саат 9-00дөн 12-00гө чейинки мезгилге дайындалган.

“Борбордун статусу жөнүндө” Кыргыз Республикасынын Мыйзамынын 23-беренесине ылайык, “Бишкек шаарынын мэрин шайлоону өткөрүүнүн ушул берене менен жөнгө салынбаган тартиби Бишкек шаардык кеңешинин Регламенти менен аныкталат”.

Бишкек шаардык кеңешинин 2012-жылдын 28-декабрында №2 токтому менен бекитилген Бишкек шаардык кеңешинин Регламентинин 239-1 пунктунун 1-пунктчасында белгиленгендей, “Бишкек шаарынын мэри Бишкек шаардык кеңешинин чакырылган мөөнөтүнө Бишкек шаардык кеңешинин депутаттары тарабынан жашыруун добуш берүү жолу менен шайланат”. Аталган Регламенттин 116-пунктуна ылайык, “Сессиянын иштөө убактысы саат 09-00дөн 18-00гө чейин. Ар бир бир жарым саатта 20 мүнөттүк танапис.  Түшкү тыныгуу – 1 саат”.

Шаардык кеңештин сессиясынын чечими менен сессиянын башка иштөө убактысы да белгиленүүсү мүмкүн.

Шаардык кеңештин сессиясынын протоколдук чечими менен, анын иштөө убактысы узартылышы мүмкүн”.

2018-жылдын 30-июлунда КР БШКга Бишкек шаардык кеңешинен 2018-жылдын 8-августунда Бишкек шаарынын мэрин шайлоонун убактысын өзгөртүү боюнча кайрылуу келип түшкөн.

Жогорудагылардын негизинде, Бишкек шаардык кеңешинин кайрылуусун эске алып, КР БШКнын 2018-жылдын 23-июлундагы № 150 “Бишкек шаарынынын мэрин шайлоону дайындоо жөнүндө” токтомуна шайлоону өткөрүү убактысы “9-00дөн 12-00гө чейинки” мезгил “9-00дөн 18-00гө чейинки” мезгилге өзгөртүлдү.

2018-жылдын 8-августуна дайындалган Бишкек шаарынын мэрин шайлоо саат 9-00дөн 18-00гө чейин өткөрүлөт.

КР БШКнын аппаратынын маалымат бөлүмү