Кыргыз Республикасынын Башкы прокуратурасы 2016-жылдын 17-июнунда Кыргыз Республикасынын Шайлоо жана референдум өткөрүү боюнча борбордук комиссиясына (мындан ары – КР БШК) Ж.А. Саматов алып келген Россиянын ФМКсынын документинин түп нускалыгын текшерүү фактысы боюнча жүргүзүлгөн текшерүүлөрдүн материалдары боюнча укуктук жардам көрсөтүү тууралуу Кыргыз Республикасынын компетенттүү органдарынын суроо-талаптарын аткарууда алынган Россия Федерациясынын Башкы прокуратурасынын материалдарын жөнөткөн (16.06.2016-ж. чыг.№9/93-16).
22.01.1993-жылдагы Минск шаарында кабыл алынган “Жарандык, үй-бүлөлүк жана кылмыш иштери боюнча укуктук мамилелер жана укуктук жардам жөнүндө” Конвенциясына ылайык, укуктук жардам көрсөтүү тууралуу эл аралык тапшырманын алкагында Россия Федерациясынын компетенттүү органдарынын алдында төмөнкүдөй суроолор коюлган:
1. Ош облусунун Өзгөн районунун Кара-Дыйкан айылында 11.03.1973-жылы туулган Саматов Жыргалбек Алимбаевич Россия Федерациясынын жараны экендигин текшерүү, эгерде жараны болуп эсептелсе – кайсы мезгилден тартып, аны документтештирген органды көрсөтүү менен алган паспортунун номери.
2. Жаран Саматов Жыргалбек Алимбаевич 2015-жылдын октябрынан декабрына чейинки мезгил аралыгында Россиянын ФМКсына анын Россия Федерациясынын жарандыгы тууралуу суроо-талабы менен кайрылды беле?
3. Россиянын ФМКсынан жаран Саматов Жыргалбек Алимбаевичтин анын Россия Федерациясынын жарандыгы тууралуу кайрылуусун карап чыгуу жөнүндөгү милициянын генерал-полковниги К. О. Ромодановскийдин наамынан 02.11.2015-ж. чыг.№ МС-4/3-83159 кат жөнөтүлгөндүгүн текшерүү.
Россия Федерациясынын Башкы прокуратурасы 22.01.1993-жылдагы Жарандык, үй-бүлөлүк жана кылмыш иштери боюнча укуктук мамилелер жана укуктук жардам жөнүндөгү Конвенцияга ылайык, кыргыз тараптын дарегине Россиянын ФМКсынын 16.03.2016-ж. №Мс-2/6-17771-р материалдарын жөнөткөн, анда төмөнкүлөр көрсөтүлгөн:
“1) Татарстан Республикасы боюнча ФМКБ маалыматы боюнча Киргизия ССРдин Ош облусунда 11.03.1973-жылы туулган Саматов Жыргалбек Алимбаевич Россия Федерациясынын жарандыгын, 28.03.1996-ж. Кыргыз Республикасына туруктуу жашоого келген Россия Федерациясынын жарандарынын жана Россия Федерациясына туруктуу жашоо үчүн келген Кыргыз Республикасынын жарандарынын жарандыкты алуусунун, мурдагы жарандыгынан чыгуусунун жөнөкөйлөтүлгөн тартиби жөнүндө Кыргыз Республикасынын жана Россия Федерациясынын ортосундагы Макулдашуунун 1-беренесинин 1-бөлүгүнүн “а” пунктуна ылайык, Татарстан Республикасынын ИИМ УПВСинин 15.03.2001-ж. чечиминин негизинде алган.
19.07.2001-ж. Казань шаарынын Авиакурулуш районунун ИИБ тарабынан Ж.А. Саматов Россия Федерациясынын жаранынын паспорту менен документтештирилген.
2) Россия ФМКнын эсепке алуу кагаздарында текшерилип жаткан адамдын Россия Федерациясынын жарандыгынан чыгуу жөнүндө арызы менен кайрылгандыгы тууралуу маалымат жок.
3) Россия Федерациясынын жарандыгы жок жөнүндөгү Россия ФМКнын жетекчиси К. О. Ромодановскийдин колу коюлган маалымат Ж.А. Саматовдун наамына берилген эмес. Россия ФМКсында көрсөтүлгөн катталган номер боюнча кат (02.11.2015-ж.чыг. № МС-4/3-83159) эсепте жок.”
Кыргыз Республикасынын Башкы прокуратурасы тарабынан 1993-жылдын 22-январындагы Жарандык, үй-бүлөлүк жана кылмыш иштери боюнча укуктук мамилелер жана укуктук жардам жөнүндө конвенциянын алкагында аткарылган эл аралык тапшырманын материалдарын иликтеп жана алардын укуктук статусу жөнүндөгү маалыматты угуп чыгып, Кыргыз Республикасынын Шайлоо жана референдум өткөрүү боюнча борбордук комиссиясы төмөнкүгө келди.
Жогоруда көрсөтүлгөн Конвенциянын 13-беренесине ылайык, Макулдашылган Тараптардын биринин аймагындагы расмий документтер катары каралган документтер, башка Макулдашылган Тараптардын аймактарында расмий документердин далилдөө күчү катары колдонулат.
Ушундан улам, Кыргыз Республикасынын Башкы прокуратурасынан 17.06.2016-ж. алынган расмий документтер Саматов Жыргалбек Алимбаевич 15.03.2001-жылдан тартып Россия Федерациясынын жараны экендигин айкын күбөлөндүрөт.
Кыргыз Республикасынын Конституциясынын 52-беренесинин 5-бөлүгүнө ылайык, башка жарандыгы бар Кыргыз Республикасынын жарандары саясий мамлекеттик кызматты жана соттордун кызмат ордун ээлөөгө укуксуз.
“Кыргыз Республикасынын Жогорку Кеңешинин депутатынын статусу жөнүндө” Кыргыз Республикасынын Мыйзамынын 1-беренесинин 1-бөлүгүнө жана Кыргыз Республикасынын Президентинин 2013-жылдын 26-июнундагы №145 Жарлыгы менен бекитилген Кыргыз Республикасынын мамлекеттик кызматтарынын реестринин 1-главасына ылайык, Кыргыз Республикасынын Жогорку Кеңешинин депутатынын кызматы саясий мамлекеттик кызмат болуп саналат.
Кыргыз Республикасынын Башкы прокуратурасы тарабынан жөнөтүлгөн материалдардын негизинде, Кыргыз Республикасынын Конституциясынын 52, 73-беренелерине, “Кыргыз Республикасынын шайлоо жана референдум өткөрүү боюнча шайлоо комиссиялары жөнүндө” Кыргыз Республикасынын Мыйзамынын 7, 18 - беренелерине ылайык, Кыргыз Республикасынын Шайлоо жана референдум өткөрүү боюнча борбордук комиссиясы
ТОКТОМ КЫЛАТ:
1. “Республика – Ата Журт” саясий партиясынын тизмеси боюнча Кыргыз Республикасынын Жогорку Кеңешинин депутаты болуп шайланган Саматов Жыргалбек Алимбаевичтин ыйгарым укуктары мөөнөтүнөн мурда токтотулсун.
2. Кыргыз Республикасынын Жогорку Кеңешинин депутаты Саматов Жыргалбек Алимбаевичтин күбөлүгү ушул токтом күчүнө кирген күндөн тартып жараксыз деп табылсын.
3. Саматов Жыргалбек Алимбаевичти Кыргыз Республикасынын Жогорку Кеңешинин 6-чакырылышындагы депутаты деп каттоо жөнүндөгү Кыргыз Республикасынын Шайлоо жана референдум өткөрүү боюнча борбордук комиссиясынын 2015-жылдын 7-декабрындагы № 193 токтомунун 5-пункту күчүн жоготту деп табылсын.
4. Бул токтомдун көчүрмөсү Кыргыз Республикасынын Жогорку Кеңешине жана Кыргыз Республикасынын Башкы прокуратурасына жиберилсин.
5. Бул токтом «Эркин Тоо» газетасына жана Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.
6. Бул токтомдун аткарылышын контролдоо Кыргыз Республикасынын Шайлоо жана референдум өткөрүү боюнча борбордук комиссиясынын төрагасынын орун басары А. Бекматовго жүктөлсүн.
Төрага Н.Шайлдабекова
Бишкек ш., 2016-жылдын 8 – июлу
№ 126