2011-жылдан бери жыл сайын апрель айынын төртүнчү бейшембисинде “МКТдагы кыздар” эл аралык күнү (International Girls in ICT Day) белгиленет. Бул майрам БУУнун маалыматтык-коммуникациялык технологиялар жаатындагы адистештирилген мекемеси болуп саналган ЭЭБ – Эл аралык электрбайланыш бирлиги тарабынан демилгеленген.

Бул майрамды демилгелөөнүн башкы максаты – кыздарга жана жаш аялдарга маалыматтык-коммуникациялык технологиялар чөйрөсүндө кесиптик өсүүнүн келечегин көрсөтүү.

Бүгүн, 2023-жылдын 27-апрелинде КР БШКнын Жарандык билим берүү жана шайлоо технологиялары борбору тарабынан санариптик билим берүүнүн алкагында Кыргызстандын санариптик лидерлерин чакыруу менен аталган майрамга карата иш-чара уюштурулду.

КР БШК төрагасы Н.К. Шайлдабекова, КР Санариптик өнүктүрүү министринин орун басары Ж.Шаршенова саламдашуу сөзү менен чыгып сүйлөштү.

Иш-чарага Ж.Баласагын атындагы КУУнун колледжинин санарип технологиялары жана IT департаментинин студент кыздары катышты, ошондой эле аймактардагы 71 жарандык жана санариптик билим берүү борборунан Zoom санариптик платформасынын жардамы менен он-лайн көрсөтүү аркылуу республиканын бардык облустарындагы катышууну каалаган бардык кыз-келиндер кошулду.

Иш-чара кыздардын чоң кызыгуусун жаратты. Бул МКТ чөйрөсүндө ар кандай багыттарда иштеген жана иш-чарага чакырылган спикерлердин аркасында мүмкүн болду, алар ынтызырлыкты көрсөтүп, өз тажрыйбалары жана билимдери менен бөлүштү.

1) Женни Жениш кызы, эксперимент жүргүзүү боюнча жетекчи, БУУӨПтүн лабораториясынын акселератору STEM (илим-технология-инженерия-математика) тармагындагы глобалдык тенденциялар, ошондой эле санариптик доордогу кыздар жана аялдар үчүн жеткиликтүү мүмкүнчүлүктөр жөнүндө маалымат берди. БУУӨП кыргыз тилинде үйрөнчүктөр үчүн санариптик көндүмдөр боюнча окутуучу материалдарды иштеп чыкты, алар UNDPKG Ютуб каналында жеткиликтүү.

STEM чөйрөсүндөгү илим, технология жана инновация биздин барган сайын глобалдуу жана санариптик коомубуздун маанилүү кыймылдаткыч күчтөрү болуп саналат. Бирок, жогорку билим берүү мекемелеринин бүтүрүүчүлөрүнүн 31%ы гана кыздар. Кыргызстанда үч кыздын бирөө гана компьютердик сабаттуулукка ээ.

Коомдун маалымат чөйрөсүнүн тез өнүгүшү эмгек рыногунун суроо-талаптарын түп-тамырынан бери өзгөртөт, жаңы кесиптердин жана жумуш орундарынын пайда болушуна өбөлгө түзөт. Дүйнөлүк өнүгүү жана санариптештирүү доорунда кыздар жана жаш аялдар билим алууга бирдей жеткиликтүү жана МКТ же STEM чөйрөсүндө мансап жасоо үчүн бардык мүмкүнчүлүктөргө ээ болушу керек.

2) Душенова Марина Анарбековна, “Technowoman KG” билим берүү багытынын лидери.

Technowoman KG – бул Кыргызстандагы аялдар кыймылынын жаңы багыты. Анын башкы миссиясы – Кыргызстандагы аялдар жана кыздар үчүн жогорку технологиялар чөйрөсүндө жаңы мүмкүнчүлүктөрдү ачуу. “Technowoman” аялдары – бул технологиялык (IT, инженерия, биотехнология ж.б.) кесиптерде иштеген жаңы муундагы аялдар. Спикер бирикменин стратегиясына жана миссиясына кеңири токтолуп, маалыматтык технологиялар жаатында сапарын жаңыдан баштап жаткандар үчүн жетишилген ийгиликтер жана мүмкүнчүлүктөр тууралуу мисалдар менен айтып берди.

3) Тимур Мон – биздин мекендеш, ал Нью-Йоркто жашайт жана “Yurtah” жана “Jyldyz Academy” старт-аптарынын негиздөөчүсү. Тимур Коннектикут университетин бүтүргөн. 2014-жылдан бери Нью-Йоркто Уолл Стритте кыймылсыз мүлк сатуу жана ижарага берүү тармагында иштеп келатат.

Тимур эмне үчүн жаш курагына жана убактысына карабастан, дайыма билим алуу маанилүү экендигин айтты. Тимур өз бүтүрүүчүлөрүнүн “Келечек-1”, “Келечек-2” социалдык долбоорлорунун ийгиликтери менен бөлүштү. Ал өзүнүн “Чырак” долбоорунун мисалында катышуучуларды бүтүрүүчү У.Айтбаева менен тааныштырды, ал балдарга кыргыз тилин үйрөтүү боюнча тиркеме иштеп чыккан.

Жыйынтыгында бардык катышуучулар спикерлерге суроолорун беришип, өз ой-пикирлери менен бөлүштү.

Аймактардагы катышуучулар аймактардагы келечекте ишке ашырылуучу санариптик долбоорлорго кызыгышты, анткени алардын арасында чыгармачыл, мобилдүү жана максатка умтулган жаш кыздар абдан көп. Алар мындай семинарларды аймактарда уюштуруу боюнча каалоолорун билдиришти.