Аймактык шайлоо комиссиялары Бишкек, Ош жана Токмок шаарларынын мэрлеринин кызмат ордуна талапкерлерди каттады

21 августа 2021

Бишкек, Ош жана Токмок аймактык шайлоо комиссиялары талапкерлерден кабыл алынган документтердин мыйзам талаптарына ылайыктыгын ведомстволор аралык электрондук “Түндүк” тутуму аркылуу дагы текшергенден кийин төмөнкүдөй чечим кабыл алышты.

Бишкек аймактык шайлоо комиссиясы Кыргыз Республикасынын Министрлер Кабинетинин Төрагасы жана Бишкек шаардык кеңештин көпчүлүк коалициясы көрсөткөн Жунушалиев Айбек Жанышбековичти каттады.

Ош аймактык шайлоо комиссиясы «Аманат» көпчүлүк коалициясы көрсөткөн Мамбетов Алмаз Ишенбековичти каттады.

Токмок аймактык шайлоо комиссиясы 2 талапкерди – көпчүлүк коалициясы ("Бирге-Вместе", "Патриот Ынтымагы", "Эл Биримдиги") көрсөткөн Самаев Урмат Обозбековичти жана азчылык коалициясы ("Эмгек", "Асыл Мурас-Жаштары") Кубатбек уулу Азатты каттады.

Маалымат үчүн:

1. Жогорку билими жана мамлекеттик, муниципалдык кызматта же билим берүү, саламаттык сактоо мамлекеттик мекемелеринде иш стажы бар же жеке менчик формасындагы уюмдардын, мекемелердин жана чарбакер субъекттердин жетекчилик кызмат орундарында 3 жылдан кем эмес иш стажы бар, мамлекеттик тилди билген, аракетке жөндөмдүү Кыргыз Республикасынын жараны шаар мэри боло алат.

2. Шаар мэринин кызмат ордуна талапкер карым-катыштын бардык чөйрөлөрүндө кесиптик ишти жүзөгө ашыруу үчүн коммуникативдик компетенциянын деңгээлинде мамлекеттик тилди билүүгө тийиш, бул деңгээл Өкмөт бекиткен "Кыргызтест" мамлекеттик тилди билүү деңгээлин аныктоо тутумунун талаптарына ылайык "ортодон жогорку" деңгээл катары мүнөздөлөт. Тилди билүү деңгээли белгиленген үлгүдөгү сертификат (мындан ары – мамлекеттик тилди билүү деңгээли тууралуу сертификат) менен ырасталат.

Мамлекеттик тилди билүү деңгээли тууралуу сертификат тестирлөөнүн жыйынтыктары боюнча мамлекеттик тилди билүү деңгээлине баа берүү чөйрөсүндөгү ыйгарым укуктуу мамлекеттик орган же мекеме тарабынан берилет.

Шаар мэринин кызмат ордуна талапкердин мамлекеттик тилди билүү деңгээли тууралуу өз сертификатын аймактык шайлоо комиссиясына бербей коюусу каттоодон баш тартууга негиз болуп саналат.

3. Кылмыш кылгандыгы үчүн соттолгон жана соттолгондугу мыйзамда белгиленген тартипте алынып салынбаган же жоюлбаган, ошондой эле талапкерлерди каттоо мөөнөтү аяктаганга чейин кылмыш жасагандыгы үчүн соттолгондугу мыйзамдарда белгиленген тартипте жоюлбаган Кыргыз Республикасынын жараны, ошондой эле соттолгондугу мыйзамдарда белгиленген тартипте жоюлгандыгына же жоюлбагандыгына карабастан, оор жана өзгөчө оор кылмыштарды жасагандыгы үчүн соттолгон жарандар шаардын мэри боло албайт.

Бишкек, Ош шаарларынын мэрлерин шайлоону өткөрүү тартиби Кыргыз Республикасынын шайлоо мыйзамдары, “Борбордун статусу жөнүндө” Кыргыз Республикасынын Мыйзамы, “Ош шаарынын статусу жөнүндө” Кыргыз Республикасынын Мыйзамы жана “Бишкек жана Ош шаарларынын мэрлерин шайлоо жөнүндө” Жобо менен жөнгө салынат.

Шаар мэри тиешелүү шаардык кеңештин депутаттары тарабынан анын чакырылган мөөнөтүнө жашырын добуш берүү жолу менен шайланат.

Тиешелүү шаардык кеңештеги депутаттардын жалпы санынын үчтөн экисинен кем эмеси катышса, шайлоо өттү деп деп эсептелет.

Тиешелүү шаардык кеңештеги депутаттардын көпчүлүк бөлүгүнүн добушуна ээ болгон талапкер шайланды деп эсептелет.

 

Токмок шаарынын мэрин шайлоону өткөрүү тартиби “Жергиликтүү өз алдынча башкаруу жөнүндө” Кыргыз Республикасынын Мыйзамы жана “Шаар мэрин шайлоо тартиби жөнүндө” Жобо менен жөнгө салынат.

Шаардык кеңештеги депутаттардын жалпы санынын көпчүлүк бөлүгү катышса, мэрди шайлоо өттү деп деп эсептелет.

Тиешелүү шаардык кеңештеги депутаттардын көпчүлүк бөлүгүнүн добушуна ээ болгон талапкер шайланды деп эсептелет.

Бишкек, Ош жана Токмок шаарларынын мэрлерин шайлоо 26-августка дайындалганын эске салабыз. Шайлоо саат 9:00дөн 12:00гө чейин өткөрүлөт.

Аймактык шайлоо комиссияларына шайлоону Кыргыз Республикасынын мыйзамдарына ылайык жана Кыргыз Республикасынын өкмөтү тарабынан 2020-жылдын 11-майындагы № 244 токтому менен бекитилген санитардык-эпидемиологиялык эрежелерди сактоо менен өткөрүүнү уюштуруу тапшырылды.

 

КР БШК аппаратынын маалымат бөлүмү