2020-жылдын 31-июлуна дайындалган Ысык-Көл облусунун Түп районунун Арал айыл өкмөтүнүн башчысын шайлоо кворумдун жоктугуна байланыштуу өтпөй калды.
Ысык-Көл облусунун Түп районунун мамлекеттик администрация башчысы – акиминин 2020-жылдын 27-февралындагы №18 буйругу менен Арал айыл өкмөтүнүн башчысы Мамытов Бактыбек Орозгелдиевич берген арызынын негизинде ээлеген кызмат ордунан бошотулган.
“Жергиликтүү өз алдынча башкаруу жөнүндө” Кыргыз Республикасынын Мыйзамынын 49-беренесинин 3-бөлүгүнө ылайык КР БШКнын 2020-жылдын 6-мартындагы №67 токтому менен Ысык-Көл облусунун Түп районунун Арал айыл өкмөтүнүн башчысын шайлоо 2020-жылдын 24-мартына дайындалган.
Кыргыз Республикасынын аймагына өзгөчө кырдаал режими киргизилгенине байланыштуу, COVID-19 коронавирус инфекциясынын таралышын болтурбай коюу максатында, КР Коопсуздук кеңешинин 2020-жылдын 21-мартындагы №6 чечимине жана КР Өкмөтүнүн 2020-жылдын 22-мартындагы №93-р буйругуна ылайык, КР БШКнын 2020-жылдын 23-мартындагы №85 токтому менен 2020-жылдын 24-мартына дайындалган Ысык-Көл облусунун Түп районунун Арал айыл өкмөтүнүн башчысын шайлоо убактылуу токтотулган.
КР БШКнын 2020-жылдын 26-июнундагы №108 токтому менен 2020-жылдын 29-июнунан тартып, Ысык-Көл облусунун Түп районунун Арал айыл өкмөтүнүн башчысын шайлоо жаңыланып, 2020-жылдын 30-июну добуш берүү күнү деп аныкталган.
Арал айыл өкмөтүнүн башчысы кызмат ордуна эки талапкер – мамлекеттик администрация башчысы – акими тарабынан көрсөтүлгөн Чоркозов Эрлан Акматович жана айылдык кеңештин депутаттар тобунан көрсөтүлгөн Курманов Иманбек Карыбаевич катталган. Арал айыл өкмөтүнүн башчысын шайлоого Арал айылдык кеңешинин бардык 11 депутаты катышты. Түп аймактык шайлоо комиссиясынын 2020-жылдын 30-июнундагы добуш берүүнүн жыйынтыгы жөнүндө протоколуна ылайык добуш берүүдө талапкер Чоркозов Э.А. 5 добуш, талапкер Курманов И. К. 0 добуш алган, “бардык талапкерлерге каршы” позициясы үчүн 6 добуш берилген. Талапкерлерге караганда “бардык талапкерлерге каршы” позициясы үчүн айылдык кеңештин депутаттарынын көпчүлүк добушу берилгендигине байланыштуу шайлоо өтпөй калды деп таанылган.
“Жергиликтүү өз алдынча башкаруу жөнүндө” КР Мыйзамынын 49-беренесине ылайык, эгерде талапкерлерге караганда “бардык талапкерлерге каршы” позициясы үчүн депутаттардын көпчүлүк добушу берилсе, жаңы талапкерлерди көрсөтүү менен кайра шайлоо өткөрүлөт.
КР БШКнын 2020-жылдын 3-июлундагы №125 токтому менен Арал айыл өкмөтүнүн башчысын шайлоо 2020-жылдын 17-июлуна дайындалган. Бирок бир дагы талапкер катталбагандыгына байланыштуу шайлоо өтпөй калган.
“Жергиликтүү өз алдынча башкаруу жөнүндө” КР Мыйзамынын 49-беренесине ылайык, эгерде белгиленген мөөнөттө бир дагы талапкер катталбаса, кайра шайлоо өткөрүлөт.
КР БШКнын 2020-жылдын 17-июлундагы №133 токтому менен Түп районунун Арал айыл өкмөтүнүн башчысын шайлоо 2020-жылдын 31-июлуна дайындалган. Айылдык кеңештин депутаттарынын тобунан көрсөтүлгөн бир талапкер – Жигитеков Азамат Курманбекович катталган. Бирок 31-июлда Арал айыл өкмөтүнүн башчысын шайлоо кворумдун жоктугуна байланыштуу өтпөй калды: 11 депутаттан 11 депутат катышкан эмес.
