Кыргыз Республикасынын Шайлоо жана референдум өткөрүү боюнча борбордук комиссиясынын Кыргыз Республикасынын Жогорку Кеңешинин депутаттарын шайлоого катышууга ниеттенген саясий партияларына кайрылуусу
Кыргыз Республикасынын Президентинин 2020-жылдын 2-июлундагы № 139 Жарлыгына ылайык, Кыргыз Республикасынын Жогорку Кеңешинин депутаттарын шайлоо 2020-жылдын 4-октябрына дайындалды.
“Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамынын 28-беренесинин 3-бөлүгүнүн биринчи абзацына ылайык:
“Шайлоо жарыяланган учурдан тартып, шайлоочулардын добушун сатып алууга тыюу салынат:
- накталай акча каражаттарын төлөөгө;
- белектерди жана башка материалдык баалуулуктарды белекке берүүгө; - товарларды артыкчылыктуу сатууну жүзөгө ашырууга;
- Борбордук шайлоо комиссиясы бекиткен тизмеге ылайык, талапкерлердин тизмесин сунуштаган саясий партиянын символдору камтылган басылма үгүт материалдарынан, төш белгилеринен, футболкаларынан, баш кийимдеринен, моюн орогучтарынан, талапкердин сүрөтүн көрсөткөн басма сөз материалдарынан башка бардык товарларды акысыз таркатууга;
- кызматтарды акысыз же жеңилдетилген шарттарда сунуштоого.”
Ошондой эле “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” Кыргыз Республикасынын конституциялык Мыйзамынын 28-беренесинин 4бөлүгүнө ылайык: “Талапкерлер, алардын жакын туугандары, жубайы, саясий партиянын өкүлдөрү шайлоо дайындалган учурдан тартып жана шайлоонун жыйынтыктары жарыяланганга чейин кайрымдуулук иштерин жүргүзүүгө укуксуз”.
Конституциялык мыйзамдын талаптарына ылайык, кайрымдуулук ишаракеттери, акысыз же жеңилдетилген шарттарда кызмат көрсөтүү, анын ичинде ыктыярдуу иш-аракеттер, конституциялык мыйзамда белгиленген шайлоо өнөктүгүнүн талаптарын бузушу мүмкүн.
Ага байланыштуу, Борбордук шайлоо комиссиясы шайлоого катышууга ниеттенген саясий партияларга жогоруда аталган конституциялык Мыйзамда белгиленген ченемдерди бузган, мыйзамда белгиленген жоопкерчиликке алып келүүчү аракеттерден алыс болууну сунуштайт.
Борбордук шайлоо комиссиясы Кыргыз Республикасындагы оор эпидемиологиялык кырдаалга байланыштуу жардам берүүгө ниеттенген саясий партияларга, республикалык штаб жана/же жергиликтүү өз алдынча башкаруу органдарында түзүлгөн штаб аркылуу, жардам көрсөтүүгө көңүлүн бурат.
