КРнын БШКсы 26-июндагы отурумунда коронавирустун пандемиясынын кесепетинен өзгөчө кырдаалга байланыштуу 2020-жылдын 29-июнунда убактылуу токтотулган жергиликтүү өз алдынча башкаруунун аткаруучу органдарынын 4 башчысын шайлоону кайрадан баштоо жөнүндө токтом кабыл алды.
Добуш берүү күндөрү төмөнкүдөй аныкталды:
- 2020-жылдын 30-июну саат 9:00дөн 12:00гө чейин Ысык-Көл облусундагы Түп районунун Арал айыл өкмөтүнүн башчысын шайлоого;
- 2020-жылдын 1-июлу саат 9:00дөн 12:00гө чейин Ош облусундагы Кара-Суу районунун Кара-Суу шаарынын мэрин шайлоого;
- 2020-жылдын 13-июлуна саат 9:00дөн 12:00гө чейин Нарын облусундагы Кочкор районунун Кош-Дөбө айыл өкмөтүнүн башчысын шайлоого;
- 2020-жылдын 15-июлуна саат 9:00дөн 12:00гө чейин Чүй облусундагы Ысык-Ата районунун Логвиненко айыл өкмөтүнүн башчысын шайлоого.
Мындан тышкары, жаңы вакансиялардын пайда болушуна байланыштуу, 4 айыл өкмөтүнүн башчыларын шайлоо 2020-жылдын17-июлуна (саат 9:00дөн 12:00гө чейин) дайындалат:
- Нарын облусунун Ат-Башы районунун Ак-Жар айыл өкмөтү,
- Чүй облусунун Сокулук районунун Кызыл-Туу айыл өкмөтү,
- Чүй облусунун Чүй районунун Ибраимов айыл өкмөтү,
- Жалал-Абад облусунун Токтогул районунун Толук айыл өкмөтү.
БШКнын токтому менен Түп, Кара-Суу, Кочкор, Ысык-Ата, Ат-Башы, Сокулук, Чүй жана Токтогул аймактык шайлоо комиссиялары аймактык мамлекеттик органдар жана жергиликтүү өз алдынча башкаруу органдары менен бирдикте санитардык-эпидемиологиялык эрежелерди сактоо жана жарандардын саламаттыгын коргоо боюнча бардык чараларды көрүү тапшырылды:
- добуш берүүчү жайдын ичин залалсыздандыруу;
- шайлоо процессинин катышуучуларынын бири биринин ортосундагы 1,5-2-метрлик аралыкты сактоо үчүн ченемдерди белгилөө;
- жайдын кире беришине жана бюллетень берген жерлерге колду санитайзер менен камсыз кылуу;
- шайлоо процессинин катышуучуларынын дене табын контактсыз термометр менен өлчөө;
- шайлоо процессинин катышуучуларына бет кап жана кол кап берүү;
- колдонулуучу материалдарды жана буюмдарды залалсыздандырып туруу.
БШКнын аппаратына керектүү материалдар (бет кап, кол кап, санитайзер) менен камсыздоого жардам берүү тапшырылды.
Белгилей кетсек, айыл өкмөттөрүнүн башчыларын жана мэрлерди шайлоо жергиликтүү кеңештердин депутаттары тарабынан жүргүзүлөт. Жергиликтүү кеңештердин депутаттары добуш берүүгө 11ден 31 кишиге чейин катышкандыгын, жана добуш берүү мүмкүнчүлүгү процедурасы 3 саатты камтыгандыгын эске алып, шайлоого катышуучулардын убакыттан жана аралыктан алысташына шарт түзүүгө болот. Шайлоо аймактык шайлоо комиссиялары тарабынан өткөрүлөт. Алгоритмге ылайык, шайлоонун бардык катышуучулары жеке коргонуу каражаттары менен камсыз болушат.
Маалымат үчүн:
“Жергиликтүү өз алдынча башкаруу жөнүндө” Кыргыз Республикасынын Мыйзамынын 48-беренесине ылайык, жогорку билимдүү жана мамлекеттик, муниципалдык кызматта иштеген, же мамлекеттик билим берүү, саламаттык сактоо мекемелеринде, же жогорку кызматтарда иштеген, жеке менчик формасындагы уюмдардын, мекемелердин жана жеке ишкерлердин жетекчилик кызматында 2 жылдан кем эмес эмгектенген, мамлекеттик тилди билген, эмгекке жарамдуу жаран айыл өкмөтүнүн башчысы болуп шайлана алат.
Айыл өкмөтүнүн башчысынын кызмат ордуна талапкер Өкмөт менен бекитилген “Кыргызтест” мамлекеттик тилди билүү тутумунун талаптарына ылайык, бардык чөйрөдөгү коммуникативдик компетенция деңгээлинде мамлекеттик тилди билиши керек. Тил билүү деңгээли мамлекеттик тилди билүү жөнүндө сертификат менен күбөлөндүрүлөт.
Аймактык шайлоо комиссиясына айыл өкмөтүнүн башчысынын кызмат ордуна талапкердин мамлекеттик тилди билүү деңгээли жөнүндө күбөлүктү тапшырбоо каттоодон баш тартуу үчүн негиз болуп саналат.
Кылмыш жасагандыгы үчүн соттолгондугу бар Кыргыз Республикасынын жарандары, талапкерлерди каттоо мөөнөтү аяктаганга чейин мыйзамда белгиленген тартипте жок кылынган, ошондой эле оор жана өзгөчө оор кылмыштары үчүн соттолгон жарандар, алардын соттолгондугу белгиленген тартипте жоюлгандыгына карабастан, айыл өкмөтүнүн башчысы болуп шайлана алышпайт.
