Бүгүн, 23-мартта, 2020-жылдын 12-апрелинде Кыргыз Республикасынын Баткен, Жалал-Абад, Нарын, Ысык-Кѳл, Чүй, Ош облустарынын жана Ош шаарынын жергиликтүү кеңештеринин депутаттарын шайлоону токтото туруу жѳнүндѳ Кыргыз Республикасынын Шайлоо жана референдум ѳткѳрүү боюнча борбордук комиссиясынын жыйыны болуп ѳттү.
КР Коопсуздук кеңешинин чечимин жана КР Өкмѳтүнүн тескемесин эске алуу менен жергиликтүү кеңештердин депутаттарын шайлоону токтото туруу жѳнүндѳ Кыргыз Республикасынын Президентинин Жарлыгын жүзѳгѳ ашыруу алкагында Борбордук шайлоо комиссиясынын мүчѳлѳрү ѳзгѳчѳ кырдаал режими колдонулган мезгилде жергиликтүү кеңештердин депутаттарын шайлоону даярдоону жана ѳткѳрүүнү токтото туруу тууралуу токтом кабыл алышты.
Аймактык шайлоо комиссияларына тѳмѳндѳгүлѳр тапшырылды:
2020-жылдын 13-мартына чейин катталган шаардык кеңештердин депутаттыгына талапкерлер жана 2020-жылдын 23-мартына чейин катталган айылдык кеңештин дептуттагына талапкерлер Кыргыз Республикасынын Президентинин 2020-жылдын 23-мартындагы № 54 Жарлыгы күчүнѳ кирген күндѳн тартып шайлоолорду даярдоо жана ѳткѳрүү кайра башталган датага чейин талапкердин сатусун жана ушул статуска байланышкан укуктарын жогото тургандыгын караган тийиштүү чечимдерди кабыл алсын;
Шайлоого катышуу мезгилинде ѳздѳрүнүн кызматтык абалын жана кызматтык ыйгарым укуктарын токтоткон талапкерлер иштеген жери боюнча кызматтык абалын жана кызматтык ыйгарым укуктарын аткарууну улунтууга укуктуу.
Шаардык жана айылдык кеңештердин депутаттыгына катталган жогоруда көрсөтүлгөн талапкерлердин статусун калыбына келтирүү датасы шайлоону даярдоону жана өткөрүүнү улантуунун расмий датасы болуп саналат.
айылдык кеңештердин депутаттыгына талапкерлердин фамилияларын, аты-жөндөрүн, туулган жылын, ээлеген кызмат орундарын, жашаган жерлерин көрсөтүү менен катталган талапкерлер жөнүндө маалыматтарды басма сөзгө жарыялоо токтотулуп турсун, бардык маалыматтар КР БШКнын сайтында мына бул шилтеме боюнча жайгаштырылган: http://talapker.shailoo.gov.kg/;
талапкерлерден, саясий партиялардан шайлоого андан ары катышуудан баш тартуу жөнүндө, талапкерлердин тизмесин кайра чакыртып алуу жөнүндө, саясий партиялардын талапкерлеринин тизмесинен талапкерлерди чыгарып салуу жөнүндө, талапкерлерди каттоону жокко чыгаруу жөнүндө арыздарды кабыл алуу токтотулуп турсун;
2020-жылдын 24-мартынан тартып талапкерлердин, саясий партиялардын атайын эсептерине каражаттардын келип түшүүсү жана чыгымдалышы боюнча финансылык операциялар токтотулуп турсун жана катталган талапкерлерге, талапкерлердин тизмесин каттаган саясий партияларга, банктык мекемелерге кабарландырылсын. Талапкерлердин, саясий партиялардын жайгаштырылган финансылык отчеттору БШКнын сайтында мына бул шилтеме боюнча жеткиликтүү: http://talapker.shailoo.gov.kg/.
УШКга шайлоо документтерин, мѳѳрлѳрдү, техникалык жана башка жабдууларды аймактык шайлоо комиссияларына ѳткѳрүп берүү тапшырылды, алар жергиликтүү өз алдынча башкаруу органдары менен өз ара аракеттенүү аркылуу алардын сакталышын камсыз кылсын.
Шайлоолорду жана шайлоо алдындагы үгүт жүргүзүүлөрдү маалыматтык камсыздоо жаатында БШК тѳмѳндѳгүдѳй чечимдерди кабыл алды:
2020-жылдын 24-мартынан тартып ар кандай формада шайлоо алдында үгүт жүргүзүүлөр токтотулуп турсун;
шайлоолорду токтотуп турууга чейин даярдалган үгүт жүргүзүү материалдары мыйзамдарда белгиленген талаптарды сактоо менен шайлоолор улантылгандан кийин пайдаланылышы мүмкүн;
шайлоолор токтотулуп турганга чейин илинген үгүт жана маалыматтык материалдар алып салынсын;
шайлоо комиссияларына айылдык кеңештердин депутаттыгына талапкерлердин программаларынын берилиши жана алардын КР БШКнын расмий сайтына жарыяланышы токтотулуп турсун;
аккредиттелген жалпыга маалымдоо каражаттары талапкерлерге, саясий партияларга бөлүнгөн эфир убактылары жана басма аянты тууралуу эсеп маалыматты, бекитилген формада 5 календарлык күндө БШКга тапшырсын.
Шайлоочулардын тизмелери жаатында тѳмѳндѳгүдѳй чечимдер кабыл алынды:
участкалык шайлоо комиссиялары шайлоочулардын арыздарын (№1-форма боюнча) кабыл алууну токтотуп турсун, 2020-жылдын 23-мартын кошуп алганда келип түшкөн реестрлерди жана шайлоочулардын арыздарын тиешелүү АШКнын системалык администраторуна иштеп чыгуу жана сактоо үчүн 2 күндүк мөөнөттө өткөрүп берсин;
шайлоочулардын тизмелерин актуалдаштуруу калкты каттоо чөйрөсүндөгү ыйгарым укуктуу мамлекеттик орган менен өз ара аракеттенүү аркылуу жүзөгө ашырылсын, мында КР БШКсынын аппараты жарандардын категориялары (18 жашка жеткен, каза болгон ж.б.), каттоо жана актуалдаштуруу датасы боюнча ККМБдагы актуалдаштырылуучу маалыматтардын дифференциялаштырылган эсебин камсыз кылсын;
укук коргоо органдары жана МКК тарабынан жүргүзүлгөн текшерүүлөр, сотко чейинки териштирүүлөр, кызматтык териштирүүлөр боюнча жарандардын айрым категорияларына жана/же массалык каттоо даректерине мурда берилген айрым эсепке алууларды андан ары жүргүзүү алар бүткөнгө жана укуктук баа берилгенге чейин улантылсын, шайлоочулардын тизмесине киргизүү үчүн бөлүп жүктөө аракеттери токтотулуп турсун.
Шайлоолорду каржылоо жаатында:
2020-жылдын 25-мартына карата жергиликтүү шайлоолорду даярдоо жана өткөрүү мезгилинде аймактык жана участкалык шайлоо комиссияларынын мүчөлөрүнө мыйзамдарда каралган сый акыларды төлөө жүргүзүлсүн;
жергиликтүү кеңештердин депутаттарын шайлоону даярдоого жана өткөрүүгө көмөк көрсөтүү үчүн шайлоо комиссияларына ишке тартылган адамдар менен эмгек мамилелери токтотулсун;
шайлоо комиссияларынын мүчөлөрүн, автоматтык эсептөөчү урналардын жана биометрикалык идентификациялоонун операторлорун күндүзү окутуу боюнча өткөрүлүп жаткан иш чаралар өзгөчө кырдаал режими аяктаганга жана шайлоолор улантылганга чейин токтотулуп турсун.
КР БШКнын аппараты шайлоо процессинин катышуучуларын дистанциялык электрондук маалымдоо жана окутуу, ошондой эле айрым жумушчу процесстерди дистанциялык жүргүзүү мүмкүнчүлүктөрүн кеңейтүү боюнча иштерди улантат.
Ошондой эле ѳзгөчө кырдаал киргизилген учурда шайлоо процессин жөнгө салуу жаатында шайлоолор жөнүндө мыйзамдарга өзгөртүүлөрдү киргизүү боюнча сунуштар иштелип чыгып, мыйзам чыгаруу субектилерине киргизилет.
