Молдова Республикасынын Борбордук шайлоо комиссиясынын чакыруусу боюнча 2019-жылы 20-октябрда жалпы жергиликтүү жана мөөнөтүнөн мурда парламенттик шайлоолорго КР БШК мүчөсү А.Б. Абдрахматова жана шайлоону уюштуруу бөлүмүнүн эксперти Б.М. Мамбетов Кыргыз Республикасынын атынан эл аралык байкоочу катары катышты.
Шайлоолордун жүрүшүнө 145 эл аралык байкоочу, анын ичинде Молдова Республикасында аккредиттелген 11 дипломатиялык миссия, 11 чет өлкөлүк шайлоо органдары жана 3 эл аралык бейөкмөт уюмдар, ошондой эле 11 уюмдан 1 600 улуттук байкоочу байкоо жүргүзүштү.
Эл аралык байкоочулар өз ишин Молдова Республикасынын мыйзамдарына, ошондой эле шайлоону уюштуруу жана өткөрүү жөнүндө эл аралык укуктун жалпы таанылган ченемдерине ылайык шайлоо процессине жана мамлекеттин суверенитетине кийлигишпестен аткарышты.
Эл аралык байкоочулар төрт бир мандаттуу округдарында жалпы жергиликтүү жана мөөнөтүнөн мурда парламенттик шайлоолор ачык-айкын жана атаандаштык негизде өтүп, Молдова Республикасынын мыйзамдарына жана шайлоонун жалпы таанылган эл аралык стандарттарына ылайык болгонун белгилешти. Жалпы жергиликтүү шайлоодо 898 примар жана 11 680 жергиликтүү кеңешчи шайланды.
Мындан тышкары, байкоо жүргүзүү миссиясынын алкагында Молдова Республикасынын БШК төрагасы Ч. Дорин, ошондой эле СICDE директору Павел Кобаченко менен жолугушуу болуп өттү. (СICDE – Борбордук шайлоо комиссиясына караштуу Шайлоо тутуму чөйрөсүндөгү үзгүлтүксүз билим берүү борбору – бул шайлоо тутуму чөйрөсүндөгү эл аралык ченемдерге ылайык эркин жана адил шайлоо уюштурууга жөндөмдүү кызматчыларды даярдоо, ошондой эле шайлоо процессинин кызыкдар башка катышуучуларын окутуу менен алектенген мамлекеттик уюм). Молдованын Билим берүү борборунун тажрыйбасы Кыргыз Республикасындагы Жарандык билим берүү борбору үчүн изилденүүдө.
Маалымат үчүн:
2018-жылы апрелде Кыргыз Республикасынын БШКсы менен Молдова Республикасынын БШКсы ортосунда өз ара түшүнүшүү жөнүндө, шайлоолорду жана референдумдарды уюштурууну, заманбап маалыматтык тутумдарды жана технологияларды өркүндөтүү тармагында шайлоо комиссияларынын иш тажрыйбасын алмашуу максатында, шайлоолорду уюштуруучуларга жана шайлоочуларга жарандык билим берүүнү жана аларды электрондук окутууну уюштуруу, ошондой эле шайлоонун башка өңүттөрү боюнча кызматташтыкты өнүктүрүү жөнүндө Меморандумга кол коюлган.
КР БШК аппаратынын маалыматтык бөлүмү
