Жети-Өгүз аймактык шайлоо комиссиясынын маалыматы боюнча Саруу айылдык кеңешинин депутаттыгына мөөнөтүнөн мурда шайлоого катышуу үчүн 21 мандатка 79 талапкер катталды. Анын ичинде өзүн өзү көрсөтүү жолу менен – 67, саясий партиялардан – 12  адам көрсөтүлсө, алардын арасында 16 аял бар.

Жети-Өгүз АШК документтердин талапкерлерди көрсөтүү тартибинин “Жергиликтүү кеңештердин депутаттарын шайлоо жөнүндө” Кыргыз Республикасынын Мыйзамынын талаптарына ылайыктуулугун текшерди.

2019-жылы 7-сентябрда Ысык-Көл облусунун Жети-Өгүз районунун Саруу айылдык кеңешинин депутаттыгына талапкерлерди каттоо аяктаганын эске салабыз.

Шайлоо алдындагы үгүт иштери айылдык кеңештин депутаттыгына талапкерлерди каттоо мөөнөтү аяктаган күндөн б.а. 2019-жылдын 7-сентябрынан тартып, добуш берүү башталганга чейин 24 саат мурда (2019-жылы 21-сентябрда  саат 8.00дө) аяктайт.

Ысык-Көл облусунун Жети-Өгүз районунун Саруу айылдык кеңешинин депутаттыгына мөөнөтүнөн мурда шайлоо 2019-жылы 22-сентябрда өтөт.

КР БШК аппаратынын маалыматтык бөлүмү