Бүгүн, 2018-жылдын 1-февралында, Кыргыз Республикасынын Шайлоо жана референдум өткөрүү боюнча борбордук комиссиясы, 2005-жылдын күзүндө Венгрияда өткөн Шайлоолорду уюштуруучулардын глобалдуу конферениясында бекитилген Бүткүл дүйнөлүк шайлоолор күнүн белгилөөдө. Шайлоолорду уюштуруу жана өткөрүү боюнча кесипкөйлөр, Бүткүл дүйнөлүк шайлоолор күнүн белгилөө аркылуу адамдардын көңүлүн жарандардын шайлоо укуктарын камсыздоо жана шайлоо процесстерин эң кеңири мааниде өркүндөтүү көйгөйлөрүнө бурууну максат кылышкан.

Демилгечилердин пикири боюнча, Бүткүл дүйнөлүк шайлоолор күнү жыл сайын февралдын биринчи бейшембисинде белгиленет. Бүткүл дүйнөлүк шайлоолор күнүн белгилөө датасы кокусунан эле тандалган эмес. Так ушул күнү мамлекеттердин жана өкмөттөрдүн жетекчилери шайлоолор боюнча эң көп эл аралык келишимдерге кол коюшкан экен.

Бүткүл дүйнөлүк шайлоолор күнүн өткөрүүнүн негизги максаттары болуп, коомчулуктун аң сезиминде демократиялаштыруу процессинин кайталангыстыгын бекитүү, коомчулукту шайлоо процессиндеги жетишкендиктер менен кабардар кылуу, жаш шайлоочуларда демократиялык баалуулуктарды жактоочулукту калыптандыруу эсептелет.

Калыптанып калган салттар боюнча, Шайлоолор күнүн майрамдоо максатында, 1-февралда КР БШК мектеп окуучулары жана студенттер үчүн “Ачык эшиктер күнүн” өткөрөт, ал жерде “Шайлоолор – бул эмне жана алар эмне үчүн маанилүү?” темасында ачык лекция окулат.

Ошондой эле имарат ичине экскурсия өткөрүлүп, анын жүрүшүндө аппараттын иши менен таанышып, аларды кызыктырган суроолорго БШК мүчөлөрүнөн жооп ала алышат.

Бул иш-чаранын негизги максаты – өлкөбүздүн жарандарынын аң-сезиминде шайлоонун негизги демократиялык принциптерин жана жоболорун түптөө, жаш шайлоочулардын түздөн-түз же Конституция тарабынан кепилденген демократиялык эркиндиктерин ишке ашыруу менен эркин шайланган өз өкүлдөрү аркылуу мамлекетти башкаруудагы өз укуктарын жана мүмкүнчүлүктөрүн билүүсү жана түшүнүүсү.

КР БШК аппаратынын маалымат бөлүмү