“Адилет” саясий партиясынын арызы жөнүндө

(Токмок аймактык шайлоо комиссиясынын 2024 –жылдын 14-ноябрындагы №20 чечимин жокко чыгаруу жөнүндө)

2024-жылдын 15-ноябрында Кыргыз Республикасынын Шайлоо жана референдум өткөрүү боюнча борбордук комиссиясына  (мындан ары – БШК) “Адилет” саясий партиясынан Токмок аймактык шайлоо комиссиясынын (мындан ары – АШК) 2024-жылдын 14-ноябрындагы №20 чечимин жокко чыгаруу жөнүндө арызы келип түшкөн.

Арыз ээси, Токмок АШКсынын 2024-жылдын 14-ноябрындагы чечими менен “Адилет” саясий партиясынын талапкерлеринин тизмесин каттоо негизсиз жокко чыгарылганын белгилеп, ага байланыштуу өтүнөт: Токмок АШКнын 2024-жылдын 14-ноябрындагы “Адилет” саясий партиясынын талапкерлеринин тизмесин каттоону жокко чыгаруу жөнүндө чечимин жокко чыгарууну; «Жаңы Кыргызстан», «Эл биримдиги», «Ынтымак» саясий партияларынын арызын канааттандыруудан баш тартуу жөнүндө жаңы чечим кабыл алууну; көрсөтүлгөн арызды «Адилет» саясий партиясынын өкүлдөрүнүн катышуусуз каралган Токмок АШКсынын аракеттери мыйзамсыз деп табылуусун.

Келип түшкөн арызды объективдүү жана ар тараптуу кароо үчүн 2024-жылдын 15-ноябрында Арыздарды жана даттанууларды кароо, шайлоочуларды жана шайлоо процессинин башка субъектилерин маалымдоо маселелери жана үгүт эрежелери боюнча жумушчу топтун (мындан ары – Жумушчу топ) отуруму болуп, Токмок АШКнын төрагасы - Карабаева Г.К. жана “Адилет” саясий партиясынын шайлоо боюнча ыйгарым укуктуу өкүлү - Тынычбек уулу Улан чакырылып, угулду.

Иштин материалдарында, 2024-жылдын 11-ноябрындагы Токмок АШКсынын чечими менен “Адилет” саясий партиясынан Токмок шаардык кеңешинин депутаттыгына талапкер мүмкүнчүлүгү чектелген болуп саналган Абдинасир кызы Гүлзаданын каттоосу жокко чыгарылган.

Андан кийин, “Жаңы Кыргызстан”, “Эл биримдиги” жана “Ынтымак” саясий партияларынын арызы боюнча, Кыргыз Республикасынын «Жергиликтүү кеңештердин депутаттарын шайлоо жөнүндө» мыйзамында каралган көрсөтүү тартиби сакталбагандыгы үчүн 2024-жылдын 14-ноябрында Токмок АШКнын №20 чечими менен «Адилет» саясий партиясынын Токмок шаардык кеңешинин депутаттыгына талапкерлердин тизмесин каттоо жокко чыгарылган.

Жумушчу топтун отурумунда арыз ээси АШКнын чечими бардык жагдайларды изилдебей туруп, “Адилет” саясий партиясынын өкүлдөрүнүн катышуусуз, шашылыш түрдө кабыл алынгандыгы боюнча позициясын билдирди.

Тынычбек уулу Улан, “Адилет” саясий партиясынан Токмок шаардык кеңешинин депутаттыгына талапкерлердин тизмеси сунушталган деп белгиледи, анда талапкер Абдинасир кызы Гульзададан башка дагы эки ден соолугунун мүмкүнчүлүгү чектелген, тактап айтканда, 21 жана 29 номери менен талапкерлер Кожомкулова Динара Жумабековна жана Арлиев Рахи Арлиевич болгон. Жогоруда көрсөтүлгөн талапкерлердин майыптыгы бар экендигин далилдөө үчүн арызга тиешелүү документтердин көчүрмөлөрү тиркелген, алардын түп нускалары отурумда көрсөтүлдү.

Кыргыз Республикасынын “Жергиликтүү кеңештердин депутаттарын шайлоо жөнүндө” мыйзамынын (мындан ары - Мыйзам) 49-беренесинин 7-бөлүгүнө ылайык, “шаардык кеңештерге талапкерлердин тизмелерин түзүүдө саясий партиялар төмөндөгүлөрдүн өкүлчүлүгүн эске алууга милдеттүү:

- 1ден кем эмес талапкер - ден соолугунун мүмкүнчүлүгү чектелүү адамдар.

Мында саясий партиянын талапкерлеринин тизмеси көрсөтүлгөн учурдан тартып алынган мандаттар бөлүштүрүлгөнгө чейин көрсөтүлгөн талаптарга ылайык келүүгө тийиш”.

Кыргыз Республикасынын Шайлоо жана референдумөткөрүү боюнча борбордук комиссиясынын 2017-жылдын 7-июлундагы № 212 токтому менен бекитилген “Кыргыз Республикасында шайлоону жана референдумдарды өткөрүүдө шайлоочулардын жана шайлоо процессинин башка субъекттеринин (катышуучуларынын) арыздарын (даттанууларын) шайлоо комиссиялары карап чыгышынын тартиби жөнүндө” жобонун 3.6. пункттуна ылайык “арыздарды (даттанууларды) аймактык шайлоо комиссиясы/ Борбордук шайлоо комиссиясы отурумда карайт.

Арызды (даттанууну) кароо күнү, убактысы жана орду жөнүндө төмөнкүлөр милдеттүү тартипте (электрондук почта боюнча, жазуу жүзүндө, телефон байланышы менен) кабарландырылат:

- арыз (даттануу) берген адам жана (же) анын өкүлдөрү;

- чечими, аракети (аракетсиздиги) даттанылып жаткан адам, орган;

- башка таламдаш тараптар жана (же) алардын өкүлдөрү;

- арызды (даттанууну) карап жаткан шайлоо комиссиясында катталган коомдук байкоочулар”.

Токмок АШКсы, “Адилет” саясий партиясынын талапкерлеринин тизмесин жокко чыгаруу чечимин, тизме сунушталып жаткан учурда келип түшкөн документтердин негизинде башка майыптыгы бар талапкерлер тууралуу маалымат берилбегендигин эске алуу менен кабыл алган.

Жумушчу топтун отурумунда “Адилет” саясий партиясынын талапкерлеринин тизмесинде дагы эки ден соолугунун мүмкүнчүлүгү чектелген талапкерлер бар экени аныкталды.

Борбордук шайлоо комиссиясы “Адилет” саясий партиясынын арызын карап чыгып, ошондой эле партиялардын пикирин угуп, “Адилет” саясий партиясы тарабынан талапкерлердин тизмесин көрсөтүүдө Мыйзамга ылайык, 1ден кем эмес талапкер - ден соолугунун мүмкүнчүлүгү чектелүү адамдардын өкүлчүлүгү эске алынган деп эсептейт. Буга байланыштуу Борбордук шайлоо комиссиясы “Адилет” саясий партиясынын аракеттеринде талапкерлердин тизмесин көрсөтүү тартиби бузулганын көргөн жок.

Мындан тышкары, Борбордук шайлоо комиссиясынын 2024-жылдын 15-ноябрындагы №294 чечими менен Токмок АШКнын талапкер Абдинасир к. Г. каттоосун жокко чыгаруу жөнүндө чечими жокко чыгарылган. Кыргыз Республикасынын конституциялык Мыйзамынын 4-беренесинин 2-бөлүгүнүн 5-пунктуна ылайык: “Борбордук шайлоо комиссиясы шайлоо мыйзамдары бузулган учурда шайлоо комиссияларынын чечимдерин жокко чыгарууга укуктуу”.

Жогоруда баяндалгандардын негизинде, “Кыргыз Республикасынын жергиликтүү кеңештеринин депутаттарын шайлоо жөнүндө” Кыргыз Республикасынын Мыйзамынын 42-беренесине, «Кыргыз Республикасынын Шайлоо жана референдум өткөрүү боюнча борбордук комиссиясы жөнүндө» Кыргыз Республикасынын конституциялык Мыйзамынын 3, 4, 8-беренелерине ылайык, Борбордук шайлоо комиссиясынын 2017-жылдын 7-июлундагы №212 токтому менен бекитилген “Кыргыз Республикасында шайлоону жана референдумдарды өткөрүүдө шайлоочулардын жана шайлоо процессинин башка субъекттеринин (катышуучуларынын) арыздарын (даттанууларын) шайлоо комиссиялары карап чыгышынын тартиби жөнүндө” Жобону жетекчиликке алып,

Кыргыз Республикасынын Шайлоо жана референдум өткөрүү боюнча борбордук комиссиясы

ЧЕЧИМ КЫЛАТ:

1. “Адилет” саясий партиясынын 2024-жылдын 14-ноябрындагы арызы - канааттандырылсын.

2. Токмок АШКнын 2024-жылдын 14-ноябрындагы № 20 чечими жокко чыгарылсын.

3. Бул чечим Кыргыз Республикасынын Шайлоо жана референдум өткөрүү боюнча борбордук комиссиясынын расмий сайтына жарыялансын.

4. Бул чечимдин аткарылышын контролдоо Арыздарды жана даттанууларды кароо, шайлоочуларды жана шайлоо процессинин башка субъектилерин маалымдоо маселелери жана үгүт эрежелери боюнча жумушчу топтун жетекчиси У.К. Жылкыбаевге жүктөлсүн.

ТӨРАГА                                                  Н.ШАЙЛДАБЕКОВА

Бишкек ш., 2024-жылдын 15-ноябры

№295