Бүгүн, 5-февралда, Кыргыз Республикасынын Шайлоо жана референдум өткөрүү боюнча борбордук комиссиясында Бүткүл дүйнөлүк шайлоо күнүнө арналган маалыматтык-түшүндүрүү иш-чарасы өткөрүлдү.
Иш-чара Кыргыз Республикасынын Борбордук шайлоо комиссиясынын алдындагы Жарандык билим берүү жана шайлоо технологиялары борбору (ЖБББ) тарабынан уюштурулуп, жаштар арасында жарандык жоопкерчиликти жогорулатууга, шайлоо маданиятын калыптандырууга жана жарандык иденттүүлүктү өнүктүрүүгө багытталды.
Иш-чарага «Тенсай» мектебинин 21 окуучусу жана Кыргыз-Орус Славян университетинин «Саясат таануу» багыты боюнча билим алган 13 студенти катышты.
Иш-чаранын алкагында КР БШКнын Төрагасы Тынчтык Шайназаров катышуучуларга Бүткүл дүйнөлүк шайлоо күнүнө карата аралыктан куттуктоо сөзү менен кайрылды. Ал өз сөзүндө бул күн мыйзамдын үстөмдүгү, жарандардын эркин жана аң-сезимдүү добуш берүү укугу, ошондой эле мамлекеттик институттардын коом алдындагы жоопкерчилиги сыяктуу жалпы демократиялык баалуулуктарды бекемдөөгө багытталганын белгиледи.
Мындан тышкары, ал Бүткүл дүйнөлүк шайлоо күнү Кыргыз Республикасы үчүн шайлоо системасын өнүктүрүүдөгү жетишкендиктерди талдоого жана аны мындан ары өркүндөтүүнүн артыкчылыктуу багыттарын аныктоого мүмкүнчүлүк берерин белгилеп өттү.
Ошондой эле шайлоолордун ачыктыгын жана айкындуулугун камсыз кылуу, жарандык билим берүүнү жана медиасабаттуулукту өнүктүрүү, жалган маалыматтарга каршы туруу маселелерине, ошондой эле демократиялык процесстерди өнүктүрүүдөгү жаштардын маанилүү ролуна өзгөчө көңүл бурулду.
ЖБББнын ишмердүүлүгү жарандардын сынчыл ой жүгүртүүсүн өнүктүрүүгө жана шайлоолорго аң-сезимдүү катышуусун жогорулатууга багытталганы өзгөчө белгиленди.
Катышуучуларды куттуктоо сөзү менен КР БШКнын төрагасынын орун басары Айдана Жупуева да кайрылып, Бүткүл дүйнөлүк шайлоо күнүнүн маанисин, жаштардын демократиялык процесстердеги ролун жана шайлоолорго аң-сезимдүү катышуунун зарылдыгын баса белгиледи.
Иш-чаранын алкагында баяндамалар жана презентациялар менен төмөнкү баяндамачылар сөз сүйлөштү:
Анара Бейшембаева, ЖБББнын директору;
Чолпон Бапиева, ЖБББнын эксперти;
Аскар Акимбаев, КР БШКнын маалыматтык-коммуникациялык технологиялар башкармалыгынын башчысы.
Катышуучуларга Кыргыз Республикасындагы шайлоо системасы, шайлоо процессинин негизги этаптары, ошондой эле шайлоолорду уюштурууда жана өткөрүүдө колдонулган санариптик технологиялар тууралуу маалымат берилди. Өзгөчө көңүл шайлоо процессин санариптештирүү, шайлоолордун ачыктыгын жана ишенимдүүлүгүн жогорулатуу маселелерине бурулду.
Мындан тышкары, иш-чаранын алкагында Кыргыз жараны жарандык иденттүүлүгүнүн баалуулуктары жана «Улуттук рух - дүйнөлүк бийиктиктер» (Уңгужол) Улуттук Доктринасынын жоболору каралып, алар жарандардын активдүү жарандык позициясын, жоопкерчилигин жана өлкөнүн келечегине болгон жоопкерчиликтүү мамилесин калыптандырууга багытталганы белгиленди.
Алынган билимдерди бекемдөө максатында интерактивдүү оюн-викторина өткөрүлүп, анда катышуучулар шайлоо процесси боюнча өз билимдерин оюн форматында текшерип, талкууланган темаларга болгон жогорку кызыгуусун көрсөтүштү.
Ошондой эле катышуучуларга КР БШКсы тарабынан жарыяланган «Эмне үчүн мен добуш берем / добуш бермекчимин?» аттуу конкурсу тууралуу маалымат берилип, ал жаштардын шайлоо маданиятын жогорулатууга, активдүү жарандык позициясын калыптандырууга жана шайлоолорго аң-сезимдүү катышуусун арттырууга багытталганы белгиленди.
Бүткүл дүйнөлүк шайлоо күнүнө арналган мындай иш-чаралар шайлоо маданиятын өнүктүрүүгө, жаштардын жарандык активдүүлүгүн жогорулатууга жана демократиялык институттарга болгон ишенимди бекемдөөгө өбөлгө түзөт.
