Кыргыз Республикасынын Борбордук шайлоо комиссиясы бүгүн, 28-октябрда Жогорку Кеңештин депутаттыгына көп мандаттуу №5 шайлоо округу боюнча өзүн-өзү талапкер катары көрсөткөн Нурбаев Жалолидин Паязидиновичти каттоодон баш тартуу чечимин кабыл алды.
Ж.Нурбаев №5 көп мандаттуу шайлоо округу боюнча Жогорку Кеңешке талапкер кылып өзүн-өзү көрсөтүү тартибинде шайлоого катышуу ниети жөнүндө арызды 2025-жылдын 13-октябрында КР БШКга тапшырган.
Талапкерлер, саясий партиялар тарабынан берилген шайлоо документтерин кабыл алуу жана текшерүү боюнча жумушчу топ
Нурбаев Жалолидин Паязидиновичтин Кыргыз Республикасынын Жогорку Кеңешинин депутаттыгына талапкерлерге коюлуучу мыйзамдардын талаптарына ылайык келбестигин аныктап, аны талапкер кылып каттоодон баш тартууну сунуштаган.
Кыргыз Республикасынын Ички иштер министрлигинин Маалыматтык технологиялар башкы башкармалыгынын “Түндүк” электрондук ведомстволор аралык өз ара аракеттенүү системасы аркылуу алынган маалыматка ылайык, Ж.Нурбаевге карата кылмыш иштери кыскартылгандыгы тууралуу маалыматтар келип түшкөн.
2006-жылдын 6-октябрында Бишкек ш. ИИБнын Тергөө бөлүмү тарабынан Кыргыз ССРнин Кылмыш-жаза кодексинин (1960-ж. редакциясында) 235-беренесинин 3-бөлүгүндө каралган кылмыштын белгилери боюнча козголгон № 51-96-688 кылмыш иши, Кыргыз Республикасынын Кылмыш-жаза процессуалдык кодексинин
28-беренесинин 1-бөлүгүнүн 11-пунктунун негизинде кыскартылган.
Мындан тышкары, 2021-жылдын 30-июнунда Ош облусунун Араван райондук ИИБдин Тергөө кызматы тарабынан Кыргыз Республикасынын Кылмыш-жаза кодексинин (2017-ж. редакциясы) 359-беренесинин
1-бөлүгүндө каралган кылмыштын белгилери боюнча козголгон № 03-030-2020-000012 кылмыш иши, Кыргыз Республикасынын Кылмыш-жаза процессуалдык кодексинин 26-беренесинин 1-бөлүгүнүн 13-пунктунун негизинде кыскартылган.
2025-жылдын 28-октябрында болуп өткөн Жумушчу топтун отурумунда Ж.Нурбаевдин ыйгарым укуктуу өкүлү жана КР Ички иштер министрлигинин Маалыматтык технологиялар башкы башкармалыгынын кызматкери катышып, алар угулду.
“Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” конституциялык мыйзамдын 3-беренесинин 4-бөлүгүнө ылайык, Жогорку Кеңештин депутаттыгына шайланууга төмөнкү адамдар укуксуз:
1) соттолгондугу бар, анын ичинде алып салынган же жоюлган;
2) аларга карата кылмыш иши реабилитацияланбаган негиздер боюнча кыскартылган, төмөнкүлөрдү кошпогондо:
- коркунучтуулугу аз кылмыштар, этиятсыздыктан жасалган анча оор эмес кылмыштар;
- Кыргыз Республикасынын кылмыш-жаза мыйзамдарына ылайык жана аларда каралган тартипте жабырлануучу жеке-ачык айыптоону колдоодон баш тарткан жана (же) жабырлануучу айыпталуучу менен макулдашууга жетишкен учурлар.
Жумушчу топтун 2025-жылдын 28-октябрындагы № 5 көп мандаттуу шайлоо округу боюнча Нурбаев Жалолидин Паязидиновичти Жогорку Кеңештин депутаттыгына талапкер кылып каттоодон баш тартуу жөнүндө корутундусунун негизинде, “Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө” конституциялык мыйзамдын 3-беренесинин 4-бөлүгүн, 61-беренесинин 11-бөлүгүн жетекчиликке алып, “Кыргыз Республикасынын Шайлоо жана референдум өткөрүү боюнча борбордук комиссиясы жөнүндө” конституциялык мыйзамдын 3, 4, 8-беренелерине ылайык КР БШКсы Нурбаев Жалолидин Паязидиновичти № 5 көп мандаттуу шайлоо округу боюнча Жогорку Кеңешинин депутаттыгына талапкер кылып каттоодон баш тартты.
