Бүгүн, 5-декабрда бүткүл дүйнөдѳ волонтерлордун Бүткүл дүйнөлүк күнүн - башкаларга жан үрѳп, дилгирлик менен жардам берип, дүйнөнү жакшырткандарга коом тарабынан ыраазычылык билдирген күндү белгилейт.
Кыргыз Республикасынын Шайлоо жана референдум өткөрүү боюнча борбордук комиссиясы волонтерлорду кесиптик майрамы менен куттуктайт жана жергиликтүү коомчулукту жана мамлекетти өнүктүрүү үчүн шайлоонун маанилүүлүгү жөнүндө жарандардын маалымдуулугун жогорулатууга жигердүү катышкандыгы үчүн, ошондой эле 2024-жылдын 17-ноябрында өткөн жергиликтүү кеңештердин депутаттарын шайлоодо аралыктан добуш берүүгө арыздарды кабыл алууга көмөктөшкөндүгү үчүн ыраазычылык билдирет. Майрамдын урматына КР БШК 2024-жылдын 17-ноябрындагы жергиликтүү кеңештердин депутаттарын шайлоодо жарандардын шайлоо процесси тууралуу маалымдуулугун жогорулатууга жана активдүү, жоопкерчиликтүү жарандык позицияны калыптандырууга кошкон салымы үчүн ыктыярчыларга ыраазычылык билдирди.
Жыл сайын шайлоого катышкан ыктыярчылардын саны өсүүдө. Түшүндүрүү иш-чараларына катышуудан тышкары, волонтерлор добуш берүү күнү ден соолугунун мүмкүнчүлүгү чектелген адамдарга активдүү жардам беришет, ошондой эле шайлоо укуктарынын сакталышын көзөмөлдөөгө катышышат. Алардын иши шайлоонун жыйынтыгына болгон ишенимди жана шайлоо процессинин ачыктыгын камсыз кылууга жардам берүүдѳ.
Бүткүл дүйнөлүк волонтерлор күнү - бул жарандык жоопкерчиликтин жана ар бирибиздин коомго аралашуубуздун канчалык маанилүүлүгүн эскертет. Ар бир добуш маанилүү болгон демократиялык шайлоолордо волонтердук ишмердүүлүк эркин жана таза добуш берүү үчүн шарттарды түзөт.
Ушул күнү биз бардык волонтерлорго ак эмгеги жана берилгендиги үчүн ыраазычылык билдиребиз. Алардын колдоосунун аркасында эң маанилүү демократиялык институттардын бири катары жарандарды маалымдоо жана шайлоону даярдоо процесси кыйла натыйжалуу, уюшкандыкта жана жарандар үчүн жеткиликтүү болуп калды.
Бүгүнкү күндө да волонтерлор өлкөбүздүн өнүгүүсүнө, анын демократиялык негиздерин чыңдоого жана бардык жарандар үчүн адилеттүү коомду түзүүгө салым кошууну улантууда.
Сиздерге чың ден соолук, асыл ишиңиздерде ийгиликтерди жана жаңы жетишкендиктер үчүн түгөнгүс кубат-дем каалайбыз. Сиздердин иш-аракеттериңиз ар дайым адамдардын жүрөгүндѳ түнѳк таап, ал эми ишке берилгендик канааттануу жана эл алдында таанылууну алып келсин.
Сиздердин ак эмгегиңиздер үчүн терең урматтоо жана ыраазычылык билдиребиз!
