Кыргызстан элдеринин Ассамблеясында «2024-жылдын 17-ноябрында жергиликтүү кеңештерге депутаттарды шайлоо» аттуу маалыматтык жолугушуу болуп өттү, анын максаты – КР Президентинин Жарлыгы менен 2024-жылдын 17-ноябрына дайындалган жергиликтүү кеңештерге шайлоонун өзгөчөлүктөрү тууралуу калкка маалымдоону активдештирүү. Иш-чарага Кыргызстандын 20дан ашык диаспораларынын жана этникалык топторунун өкүлдөрү, ошондой эле КР Маданият, маалымат, спорт жана жаштар саясаты минстрлигинин жетекчилери катышты.
КР БШК төрагасы Н. Шайлдабекова алдыда болуучу жергиликтүү кеңештерге шайлоо жөнүндө, анын ичинде өлкөдө өткөрүлгөн административдик-аймактык реформаны эске алуу менен толук маалымат берди.
Кыргызстан элдеринин Ассамблеясынын төрагасы А. Матубраимов Кыргызстан элдеринин Ассамблеясы жана этникалык диаспоралар көп регионалдык уюмдарды бириктирип тургандыгын белгиледи. Ал диаспоралардын лидерлерин КР БШК тарабынан берилген маалыматтардын негизинде маалыматтык-түшүндүрүү иштерин кеңейтүүгө, ошондой эле азыркы убакта да – 18-октябрга чейин айылдык кеңештерге талапкерлерди көрсөтүү процесси жүрүп жаткандыктан, жергиликтүү кеңештерге татыктуу жана билимдүү жарандарды активдүү көрсөтүүгө өбөлгө болууга чакырды.
Жолугушууда дагы бир милдет айтылды, бул – жаштардын жергиликтүү кеңештерге шайлоого активдүү катышуусуна дем берүү. Кыргызстан элдеринин Ассамблеясы бул иште да көрүнүктүү роль ойной алаары белгиленди.
КР БШК жана Кыргызстан элдеринин Ассамблеясы шайлоо чөйрөсүн жакшыртууга жана ар түрдүү социалдык, анын ичинде этникалык топтордун бийликтин шайлоо органдарына өкүлчүлүгүн жакшыртууга өбөлгө түзүү менен, шайлоого катышуунун маанилүүлүгү жөнүндө шайлоочуларга маалымдоону биргелешип жүргүзүүгө макулдашышты. Шайлоочулар менен жолугушуулар өлкөнүн бардык региондорунда пландаштырылды. Шайлоо 264 жергиликтүү кеңеште, анын ичинен 33 шаардык кеңеште жана 231 айылдык кеңеште дайындалды.
Жолугушуунун катышуучулары алдыда болуучу шайлоонун алкагында биргелешип күч жумшоо Кыргызстандын элинин жарандык ынтымактуулугун жана биримдигин чыңдоого өбөлгө болот деп резюмелешти.
Кыргызстан элдеринин Ассамблеясындагы иш-чара «Өнүктүрүү саясаты иниституту» (ӨСИ) коомдук бирикмесинин колдоосунун алдында «Жарандык катышуу» коомдук фонду тарабынан уюштурулду. Бул кызматташуунун алкагында Кыргызстандын ар түрдүү улуттук диаспораларынын катышуусу менен, 2024-жылдын 17-ноябрына дайындалган жергиликтүү кеңештерге шайлоо боюнча маалыматтык-түшүндүрүү кампаниясын өткөрүү боюнча региондордо бир катар жолугушуулар өтөт. Жолугушуулардын катышуучуларына КР БШК менен кызматташууда ӨСИ тарабынан жергиликтүү кеңештерге шайлоо жөнүндө маалыматтары менен талапкерлер жана шайлоочулар үчүн жөнөкөй жана жеткиликтүү тилде иштелип чыккан брошюра түрүндөгү маалыматтык материалдар берилет.
