2024-жылдын 30-июнунда Свердлов, Ноокат жана Ысык-Көл шайлоо округдарында Кыргыз Республикасынын Жогорку Кеңешинин депутаттарын мөөнөтүнөн мурда шайлоо болуп өттү.

Шайлоону уюштурууга жана өткөрүүгө үч округдук шайлоо комиссиясынын 36 мүчөсү жана 175 участкалык шайлоо комиссиясынын 2214 мүчөсү тартылган.

Шайлоону уюштуруу боюнча шайлоо комиссиялары бир топ иштерди аткарышты. Мыйзамда белгиленген бардык жол-жоболор сактылды. .

Мамлекет тарабынан шайлоочуларга жана талапкерлерге шайлоо укуктарын жүзөгө ашыруу үчүн бардык шарттар түзүлдү.

Округдук шайлоо комиссияларынын сунушу боюнча КР БШКнын чечими менен ар бир округ боюнча «мыкты участкалык шайлоо комиссиясы» аныкталды:

1. № 29 Свердлов округу боюнча – Бишкек шаарындагы № 32 орто мектептин имаратында жайгашкан, курамына 12 мүчө кирген № 1301 участкалык шайлоо комиссиясы, төрагасы - Самиева Наргиза Холбутаевна;

2. №5 Ноокат округу боюнча – Ноокат шаарындагы А.Абдуллаев атындагы орто мектепте жайгашкан, курамына 12 мүчѳсү кирген № 5392 участкалык шайлоо комиссиясы, төрагасы – Жусупова Нускайым Төрөбековна;

3. № 36 Ысык-Көл округу боюнча – Жаркынбаев айылынын Жаркынбаев айыл өкмөтүнүн имаратында жайгашкан, 13 мүчөдөн турган № 3048 участкалык шайлоо комиссиясы, төрагасы – Тердикбаева Татыкүл Дякшеновна.

Сапаттуу жана ак ниет эмгеги, шайлоо жол-жоболорун өткөрүүдө мыйзамдык нормаларды сактагандыгы, шайлоону уюштурууга жана өткөрүүгө кошкон салымы үчүн округдук жана участкалык шайлоо комиссияларынын мүчөлөрү Кыргыз Республикасынын Борбордук шайлоо комиссиясынын Ардак грамотасы менен сыйланышты.

Ошондой эле Свердлов, Ноокат жана Ысык-Көл шайлоо округдарынын жергиликтүү өз алдынча башкаруу органдарынын бир катар жетекчилери жана кызматкерлери шайлоолорду даярдоого жана өткөрүүгѳ кѳмѳктѳшкѳндүгү, жарандардын шайлоо укуктарын ишке ашыруу үчүн шарттарды түзгѳндүктѳрү үчүн КР БШКнын Ардак грамоталары жана ыраазычылык каттары менен сыйланышты.

Шайлоо участкаларында коопсуздукту, коомдук тартипти жана шайлоо процессинин мыйзамдуулугун камсыз кылгандыктары үчүн үч округдун укук коргоо органдарынын кызматкерлери КР БШКнын Ардак Грамоталары менен сыйланышып, аларга ыраазычылык билдирилди.

Кыргыз Республикасынын Шайлоо жана референдум өткөрүү боюнча борбордук комиссиясы шайлоого катышкан шайлоочуларга активдүү жарандык позициясы үчүн ыраазычылык билдирет.

Сыйлангандардын тизмеси