Бүгүн, 2024-жылдын 30-июнунда Кыргыз Республикасынын Шайлоо жана референдум өткөрүү боюнча борбордук комиссиясынын төрагасынын орун басары Н.Койчукеев шайлоочулардын активдүүлүгү, ошондой эле майыптыгы бар жарандардын шайлоо укуктарын жүзѳгѳ ашыруу боюнча көрүлүп жаткан чаралар тууралуу маалымат берди.
Республика боюнча жалпысынан 18 541 мүмкүнчүлүгү чектелген шайлоочу бар. Керектөөлөр картасына ылайык, үч шайлоо округунда мүмкүнчүлүгү чектелген шайлоочулардын саны 1412 адамды түздү. Жогорку Кеңештин депутаттарын мөөнөтүнөн мурда шайлоо үчүн үч округда жалпысынан 175 шайлоо участкасы ачылган.
Шайлоо округдары боюнча майыптыгы бар шайлоочулардын саны:
- № 29 Свердлов шайлоо округу боюнча – 1243 шайлоочу;
- № 5 Ноокат шайлоо округу боюнча – 88 майыптыгы бар шайлоочу;
- №36 Ысык-Көл шайлоо округунда 81 майыптыгы бар шайлоочу. 175 шайлоо участогунун 157си пандустар менен жабдылган, бул 90% түзөт. 15 шайлоо участогуна пандус орнотуунун зарылчылыгы жок.
Кыргыз Республикасынын Борбордук шайлоо комиссиясы шайлоо процессинин инклюзивдүүлүгүн жогорулатуу, анын ичинде добуш берүү үчүн жайлардын жеткиликтүүлүгүн камсыз кылуу жана майыптыгы бар жарандарга жардам көрсөтүүнүн атайын каражаттары менен жабдуу боюнча системалуу саясатты ишке ашырууда.
Белгилей кетсек, ар бир шайлоо участогу добуш берүү үчүн атайын кабина, лупа, трафареттер, шайлоо участогуна кире бериште чакыруу кнопкасы менен камсыздалган. Мүмкүнчүлүгү чектелген жарандарга маалымат берүү үчүн Брайль шрифти аркылуу маалымат плакаттары даярдалды.
Добуш берүүчү кабиналардын биринде туурасы 40тан кем эмес, тереңдиги 30 см. кем эмес шайлоо бюллетенин толтуруу үчүн полдун деңгээлинен 75 см. ашпаган бийиктикте жайгашкан орун (стол, текче, стенд ж.б.) жабдылат.
Майыптыгы бар жарандар үчүн шайлоо участкаларынын жеткиликтүүлүгүн камсыз кылуу прокурордук көзөмөлдүн предмети болуп саналат.
Үгүт материалдарынын жеткиликтүүлүгү үчүн шарттар түзүлдү: депутаттыкка талапкерлер үгүт материалдарын сурдокотормо же субтитр аркылуу окууга оңой болгон чоңойтулган шрифтте басылган, ошондой эле Брайль шрифти же башка атайын каражаттарды колдонуу менен ден соолугунун мүмкүнчүлүктөрү чектелүү шайлоочуларга үгүт материалдарынын жалпы тиражынын бир пайызынан кем эмес өлчөмдө басып чыгарууга жана жайылтууга милдеттүү.
Ден соолугунун мүмкүнчүлүктөрү чектелүү, активдүү шайлоо укугуна ээ, оорулардын, жаракаттардын кесепеттеринен же угуунун, көрүүнүн жана таяныч-кыймыл аппаратынын функцияларынын бузулушунан улам келип чыккан ден соолугунун бузулушу менен ооруган Кыргыз Республикасынын жарандары майыптыгы бар шайлоочулар болуп саналат. Ушуларды эске алуу менен майыптыгы бар жарандардын шайлоо укуктарын толук ишке ашыруу максатында мамлекет алардын укуктарын ишке ашыруу үчүн атайын уюштуруучулук жана маалыматтык шарттарды түзөт.
Маалымат иретинде: Орун-жайдан тышкары добуш берүү мүмкүнчүлүгүн алуу үчүн арыз менен үч округ боюнча участкалык шайлоо комиссияларына 993 шайлоочу кайрылса, анын 178и майыптыгы бар шайлоочулар болуп саналат. Майыптыгы бар 178 жарандын 175и добуш берди.
-
