КР БШК жана Бишкек шаарынын мэриясы Свердлов райондук администрациясы менен бирдикте №29 Свердлов бир мандаттуу шайлоо округу боюнча Кыргыз Республикасынын Жогорку Кеңешинин депутатын мөөнөтүнөн мурда шайлоону даярдоого жана өткөрүүгө көмөктөшүү боюнча шаардык штабдын жыйналышын өткөрдү.
Жыйналышка КР БШКнын төрагасы Н.К. Шайлдабекова, Бишкек шаарынын биринчи вице-мэри М.К. Байгончоков, Свердлов райондук администрациясынын башчысы – акими К.М. Айтакунов, Свердлов округдук шайлоо комиссиясынын төрагасы Б. Конуров, жергиликтүү өз алдынча башкаруу органдарынын жетекчилери, прокуратуранын жана укук коргоо органдарынын өкүлдөрү катышты.
«Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө» КР конституциялык Мыйзамына ылайык БШК шайлоону жана референдумдарды өткөрүү маселелери боюнча мамлекеттик органдардын жана жергиликтүү өз алдынча башкаруу органдарынын ишин координациялайт.
КР Президентинин 2024-жылдын 16-майындагы Жарлыгы менен №29 Свердлов шайлоо округунда КР Жогорку Кеңешинин депутатын мөөнөтүнөн мурда шайлоо 2024-жылдын 30-июнуна дайындалган.
№ 29 Свердлов шайлоо округу боюнча депутатты мөөнөтүнөн мурда шайлоону өткөрүүнү даярдоо бекитилген календардык план боюнча жүрүп жатат.
Шайлоону уюштуруу үчүн Бишкек аймактык шайлоо комиссиясынын мүчөлөрүнүн ичинен 12 мүчөдөн турган Свердлов округдук шайлоо комиссиясы түзүлгөн. Добуш берүүнү уюштуруу үчүн 60 шайлоо участкасында участкалык комиссиялардын 810 мүчөсү иштеп жатат.
Свердлов округунда шайлоочулардын саны 2021-жылдагы шайлоого салыштырганда 19 431 шайлоочуга көбөйгөн, 2021-жылы шайлоочулардын саны – 103 520 болсо, азыркы учурда – алдын ала маалыматтар боюнча 122 951 шайлоочуну түзөт.
Шайлоо жана катышып жаткан талапкерлер жөнүндө жарандарга маалымдоо максатында ар бир шайлоочуга добуш берүү күнү, шайлоо участкасынын номери жана дареги жөнүндө чакыруулар, ошондой эле тиешелүү округ боюнча Жогорку Кеңештин депутаттыгына талапкерлер жөнүндө маалымат жөнөтүлөт. Ошондой эле маселелер келип чыккан учурда кайрылууга боло турган байланыш маалыматы көрсөтүлөт.
Округдук шайлоо комиссиясы тарабынан талапкерлердин шайлоочулар менен жолугушуулары өткөрүлөт. Телекөрсөтүүдө дебаттар жана талапкерлердин жеке сөз сүйлөөсү өтөт.
№29 Свердлов шайлоо округу боюнча Кыргыз Республикасынын Жогорку Кеңешинин депутатын мөөнөтүнөн мурда шайлоого катышуу ниети жөнүндө 12 талапкер билдирди, алардын ичинен 2024-жылдын 4-июнуна карата:
- 3 талапкер – катталды;
- 2 талапкер – шайлоого катышуудан баш тартты;
- эки талапкер боюнча документтердин толук пакети берилбегенине байланыштуу каттоодон баш тартылды.
Бүгүнкү күндө 5 талапкер боюнча мыйзамдардын талаптарына шайкештик жагынан текшерүү улантылып жатат. Бардык талапкерлерди каттоо 2024-жылдын 10-июнуна чейин аяктайт.
10-июндан тартып шайлоо алдындагы үгүт башталат, ал 2024-жылдын 29-июнунда саат 8:00дө аяктайт.
Бул округда округдук шайлоо комиссиясынын өкүлдөрүнүн, прокуратуранын жана укук коргоо органдарынын өкүлдөрүнүн ичинен түзүлгөн ыкчам аракеттенүүнүн координациялык тобунун (ЫАКТ) алкагында шайлоодо мыйзамдуулукту камсыз кылуунун, комиссиялардын жана Свердлов районунун жана Бишкек шаарынын укук коргоо органдарынын өз ара аракеттенүүсүнүн маселелери талкууланды.
Атап айтканда, мурдагы шайлоодо бузууларга каршы аракеттенүү боюнча укук коргоо органдары көргөн чаралардын тажрыйбасына таянып, шайлоодо бузуулардын бардык түрлөрүнө каршы, өзгөчө добуштарды сатып алууга каршы чаралар өз учурунда, толук жана натыйжалуу көрүлүшүнө көңүл бурулду.
Шаардык штабдын жетекчиси вице-мэр М.К. Байгончоков Свердлов округунан КР ЖК депутатын мөөнөтүнөн мурда шайлоону өткөрүүдө комиссияларга толук көмөктөшүүгө мэриянын даярдыгын билдирди, талкууланган милдеттер эске жана аткарууга кабыл алынды деп белгиледи, шаардык кызматтарга шайлоону даярдоого ар тараптан көмөк көрсөтүүнү, ошондой эле маалыматтык-түшүндүрүү ишин күчөтүүнү тапшырды.
Ошондой эле участокторду материалдык-техникалык жабдуу, үгүт материалдары жана башкалар үчүн электр, байланыш, транспорт, маалыматтык аянтчалар менен үзгүлтүксүз жабдууну камсыз кылуу маселелери боюнча бардык зарыл чаралар көрүлөт, ошондой эле айрым шайлоо участкалары боюнча курулуш нормаларына жана эрежелерине ылайык ДМЧАлар үчүн пандустарды жеткире иштеп чыгуу боюнча иштер аяктайт, шайлоону даярдоо учурунда башка маселелер келип чыкканда шайлоо комиссияларына толук көмөк көрсөтүлөт деп белгиледи.
Маалымат үчүн: белгилеп кетүү керек, 2024-жылдын 4-июнунда Кыргыз Республикасынын Жогорку соту Бишкек шаарынын Административдик сотунун 2024-жылдын 1-мартындагы чечимин, Бишкек шаардык сотунун административдик иштер боюнча соттук коллегиясынын 2024-жылдын
5-апрелиндеги аныктамасын жокко чыгарды, аларда соттор КР БШКны А.Муртазалиевди №29 Свердлов шайлоо округунда Кыргыз Республикасынын Жогорку Кеңешинин шайланган депутаты деп таанууга милдеттендирген.
