2024-жылдын 17-мартында Кыргыз Республикасынын Борбордук шайлоо комиссиясынын төрагасы Н.Шайлдабекова башчылык кылган БШКнын мүчөлөрү И.Гайпкулов, А.Жумалиева, У.Жылкыбаев жана БШКнын аппаратынын кызматкерлеринен турган БШКнын делегациясы Россия Федерациясынын Президентин шайлоого байкоо жүргүзүүгѳ катышты.
КМШнын байкоочулар миссиясынын тизмесине Кыргыз Республикасынын Шайлоо жана референдум өткөрүү боюнча борбордук комиссиясынын өкүлдөрү жана аймактык шайлоо комиссияларынын мүчөлөрү киргизилген, алар Кыргыз Республикасынын шаарларында (Бишкек, Ош, Кант, Каракол) жайгашкан шайлоо участкаларында байкоо жүргүзмѳкчү, ошондой эле Россия Федерациясынын Екатеринбург, Санкт-Петербург, Владивосток, Красноярск шаарларындагы Кыргыз Республикасынын элчилигинин жана Башкы консулдугунун кызматкерлери киргизилген.
КМШ, ШКУ, КМШ ПАА жана ЖККУ ПАнын көп тараптуу миссияларынын курамында мониторинг жүргүзүү үчүн Кыргыз Республикасынан байкоочулар жөнөтүлдү.
Россия Федерациясынын Борбордук шайлоо комиссиясы аралыктан электрондук добуш берүү (АЭДБ) үчүн шифрлөөчү ачкычтарын жети бөлүккө бөлүү жол-жобосун жүргүздү, алар беш парламенттик партиянын өкүлдөрүнө өткөрүлүп берилди, бир бөлүгү АЭДБ АШКда калтырылды, бирөөсү Россиянын БШКсына өткөрүлүп берилди. АЭДБ уюлдук телефон, планшет, персоналдык компьютер аркылуу атайын программалык камсыз кылуунун жардамы менен кагаз түрүрндѳгү бюллетенди колдонбостон добуш берүүгө мүмкүндүк берет. Мындай жол-жобо санариптик добуш берүүнүн анонимдүүлүгүн жана коопсуздугун кепилдейт.
Россия Федерациясынын Борбордук шайлоо комиссиясынын төрагасы Е.Памфилова мындай масштабда АЭДБди биринчи жолу өткөрүүгө мүмкүн болгонун белгиледи. Потенциалдуу түрдө 38 миллионго жакын шайлоочу добуш берүүгѳ мүмкүн болсо, 5 миллион адам арыз берген.
Шайлоонун алдында Кыргыз Республикасынын Борбордук шайлоо комиссиясынын делегациясы менен Россия Федерациясынын Борбордук шайлоо комиссиясынын төрагасы Е.Памфилованын жолугушуусу болду. Жыйында шайлоого даярдык көрүү жана өткөрүү, чет өлкөлөрдө жашаган жарандардын шайлоого катышуусу, шайлоо комиссияларынын иши, эл аралык жана жергиликтүү байкоочулардын катышуусу боюнча маселелер талкууланды.
Байкоочулар добуш берүү процессине байкоо жүргүзүү иштеринин алкагында мыйзам талаптарын сактоо жана жарандардын шайлоо укуктарын ишке ашыруу үчүн зарыл шарттарды түзүү боюнча бир катар шайлоо участкаларында болушуп, добуш берүү күнүнүн алдында шайлоо участкаларын ачууга катышты.
Россия Федерациясынын Президенттин кезектеги шайлоого байкоо жүргүзүүгө Беларусь, Казакстан, Кыргызстан, Өзбекстан, Түркмөнстан, Тажикстан, Пакистан, Намибия, Конго жана Бангладештин Борбордук шайлоо комиссияларынын төрагалары катышууда. Россия Федерациясынын Борбордук шайлоо комиссиясы дүйнѳнүн 106 өлкөсүнѳн 706 эл аралык байкоочуну аккредитациялады.
Маалымат иретинде:
Россия Федерациясынын Конституциясына ылайык, Россия Федерациясынын Президенти алты жылдык мөөнөткө шайланат. Бир эле адам Россия Федерациясынын Президентинин кызмат ордун катары менен эки мөөнөттөн ашык ээлей албайт.
2023-жылдын 7-декабрында Россия Федерациясынын Федералдык Жыйынынын Федерация Кеңеши Россия Федерациясынын Президентин шайлоону 2024-жылдын 17-мартына дайындаган. Россия Федерациясынын Борбордук шайлоо комиссиясы добуш берүүнү үч күн катары менен – 2024-жылдын 15, 16 жана 17-мартында өткөрүү жѳнүндѳ чечим кабыл алган.
Россия Федерациясынын аймагындагы шайлоочулардын саны - 112 309 947, Байконур шаарында - 11 924, Россия Федерациясынан тышкары - 1 890 863 түзѳт.
Шайлоону уюштуруу жана өткөрүү Россия Федерациясынын субъекттеринин 89 шайлоо комиссиялары, 3 миңге жакын АШКлар, 94 миңден ашык УШКлар, Россия Федерациясынын аймагынан тышкары уюштурулган 300гө жакын УШКлар тарабынан жүзөгө ашырылат.
Россия Федерациясынын Президентинин кызмат ордуна талапкерлердин жалпы саны:
1. Даванков Владислав Андреевич – «ЖАҢЫ ЭЛ» саясий партиясынан талапкер;
2. Путин Владимир Владимирович – өзүн өзү көрсөткөн талапкер;
3. Слуцкий Леонид Эдуардович – “ЛДПР саясий партиясы – Россиянын либералдык-демократиялык партиясы” партиясынан талапкер;
4. Харитонов Николай Михайлович – – «Россия Федерациясынын Коммунисттик партиясы» саясий партиясынан талапкер.
