КР БШКнын шайлоочулардын арыздары жана даттануулары боюнча жумушчу топ 10-сентябрда №26 Ленин бир мандаттуу шайлоо округу боюнча Кыргыз Республикасынын Жогорку Кеңешинин депутатын шайлоого тийиштүү келип түшкѳн арыздарды жана маалыматтарды карады.
«Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жѳнүндѳ» Кыргыз Республикасынын конституциялык Мыйзамынын 44-беренесинин 8-бѳлүгүнѳ ылайык «Шайлоонун даярдоонун жүрүшүндө келип түшкөн арыздар (даттануулар) шайлоо комиссиялары жана соттор тарабынан арыз (даттануу) келип түшкөн учурдан тартып 3 күндүк мөөнөттө, ал эми добуш берүү күнү же добуш берүү күнүнүн алдыңкы күнү - токтоосуз каралууга жатат».
1. Бишкек шаарындагы Ленин прокуратурасынан «"Facebook" социалдык түйүнүнүн бетинде кайсы бир "Tolik Erkebaev" кыясы депутаттыка талапкер Р. Тагаевди колдоп үгүт жүргүзүү токтогон күнү үгүт жүргүзүп жатат» деген маалымат келип түшкѳн (кылмыш ишин козгоодон баш тартылган, ким экендигин аныктоо боюнча чаралар кѳрүлүүдѳ – Бузуулар жѳнүндѳ кодекстин алкагында кароо үчүн материал келип түшкѳн).
Жумушчу топтун кароосунун жыйынтыгы боюнча "Tolik Erkebaev" деген пайдалануучуну шайлоо алдындагы үгүт жүргүзүү шарттарын бузгандыгы үчүн Кыргыз Республикасынын укук бузуулар жѳнүндѳ кодексинин 65-беренесинин 1-бѳлүгү боюнча жоопкерчиликке тартуу (7500 сом айып пул) сунуш кылынды.
2. Талапкер Р.Т. Тагаев тарабынан үгүт жүргүзүү токтогон күнү Whatsapp мессенджер тобунда үгүт материалдарын тараткандыгы жѳнүндѳ талапкер Ы.К. Кадыралиеванын ыйгарым укуктуу ѳкүлү А.К. Шералиевдин арызы жѳнүндѳ.
Жумушчу топтун кароосунун жыйынтыгы боюнча талапкер Р. Тагаевди шайлоо алдындагы үгүт жүргүзүү шарттарын бузгандыгы үчүн Кыргыз Республикасынын Укук бузуулар жѳнүндѳ кодексинин 65-беренесинин 1-бѳлүгү боюнча жоопкерчиликке тартуу (7500 сом айып пул) сунуш кылынды.
3. Талапкер Ы.К. Кадыралиевага карата талапкер К.К Самаковдун ыйгарым укуктуу ѳкүлү Д. Сүйүндүк уулунун арызы жѳнүндѳ (үгүт жүргүзүү жолугушуусунда пенсияны 12 миң сомго кѳтѳрүүнү убадалган).
Жумушчу топтун кароосунун жыйынтыгы боюнча арызды канаатандыруудан баш тартылган.
4. Талапкер К.К Самаковдун ыйгарым укуктуу ѳкүлү Д. Сүйүндүк уулунун анык эмес маалыматты тараткандыгы жѳнүндѳ www.aryba.kg интернет булагына ( сайтына) арызы жѳнүндѳ.
Жумушчу топтун кароосунун жыйынтыгы боюнча бул маселени укук коргоо органдарынын расмий маалыматы менен бирге кароо сунуш кылында.
КР БШК басма сѳз кызматы
