БШКнын Координациялык ыкчам чара көрүү тобу шайлоо мыйзамдарын бузуулар жөнүндө мурда түшкөн билдирүүлөрдү жана жаңы келип түшкөн арыз даттанууларды  кароо боюнча ишин улантып жатат.

2023-жылдын 29-майында №26 Ленин бир мандаттуу шайлоо округу боюнча Кыргыз Республикасынын Жогорку Кеңешинин депутаттыгына талапкер Д.Н. шайлоочулардын  добуштарын сатып алууга шектелип жаткандыгы тууралуу билдирүү түшкөн.

Аудио жазууда болжолдуу түрдө депутаттыкка талапкер Д.Н.  У.Р. аттуу бирөө менен сүйлөшүп жатып, үгүт иштерин жүргүзүү, жарандарга 1500 сомдон төлөп берүү, аларды шайлоого тартуу боюнча жарандардын тобу менен иштөө схемаларын талкуулап жатканын угууга болот.

Материалдар дароо текшерүү жана укуктук баа берүү үчүн ички иштер органдарына өткөрүлүп берилди жана тергөөгө чейинки текшерүү иштери башталды.

Жалпысынан шайлоо өнөктүгү башталгандан тарта 2023-жылдын 29-майына чейин БШКнын Координациялык ыкчам чара көрүү тобуна мыйзам бузуулар тууралуу 12 арыз даттануу келип түшкөн. Алардын 5 шайлоого даярдык көрүү мезгилинде болсо, калган 7  шайлоо күнү жана андан кийин катталган.

Келип түшкөн арыздардын, кайрылуулардын жана даттануулардын мүнөзү:

- шайлоочулардын добушун сатып алуу фактысы боюнча - 6, алардын 3 текшерилүүдө;

- шайлоо алдындагы үгүт иштеринин талаптарын бузуу боюнча - 4, алардын 2 текшерилүүдө;

- шайлоочуларды ташуу мүмкүндүгү жөнүндө - 1, ал каралды;

- фотофиксация жөнүндө - 1, ал каралды.

БШК мыйзам бузуулар боюнча укук коргоо органдарынын иликтөөсүнүн корутундусу тууралуу маалыматты шайлоонун жыйынтыгын чыгаруу учурунда карайт.

Мыйзамдын талаптарын аткаруу жана жарандардын шайлоо укуктарын коргоо максатында БШКнын Координациялык ыкчам чара көрүү тобу шайлоо мыйзамдарынын бузулушуна такай көзөмөл жүргүзүп, көрүлгөн чаралар тууралуу токтоосуз маалымат жеткирип турат.

Шайлоо учурунда кандайдыр бир мыйзам бузуу аракеттери болсо Координациялык ыкчам чара көрүү тобу - 1255, ишеним телефону - 0 (312) 66024 номерлери аркылуу кайрылууну өтүнөт.

Маалымат үчүн: шайлоо мыйзамдарын бузуулар жана көрүлгөн чаралар жөнүндө маалыматты Борбордук шайлоо комиссиясынын расмий сайтынын “Рестрлер” бөлүмүнөн таба аласыз (шилтеме: https://shailoo.gov.kg/ru/reestr)