2023-жылдын 28-майындагы шайлоо күнү Координациялык ыкчам чара көрүү тобу  шайлоо мыйзамдарынын бузулушуна тынымсыз мониторинг жүргүзүп, көрүлгөн чаралар тууралуу коомчулукту токтоосуз түрдө кабардар кылып, маалыматтарды БШКнын расмий сайтындагы “Рестрлер” бөлүмүндө жарыялап турду.

2023-жылдын 28-майында Кыргыз Республикасынын Шайлоо жана референдум өткөрүү боюнча борбордук комиссиясынын жыйынында No26 Ленин бир мандаттуу шайлоо округу боюнча Кыргыз Республикасынын Жогорку Кеңешинин депутатын шайлоо күнү келип түшкөн арыз даттануулар боюнча Координациялык ыкчам чара көрүү тобунун маалыматы угулду.

Шайлоо күнү Координациялык ыкчам чара көрүү тобуна  шайлоо мыйзамдарынын бузулуусу боюнча жалпысынан 4 маалымат келип түшкөн. Алардан:

- шайлоочулардын добуштарын сатып алуу мүмкүндүгү жөнүндө – 2

 - шайлоо алдындагы үгүттүн шарттарын бузуу жөнүндө – 1

 - шайлоочуларды ташуу мүмкүндүгү жөнүндө – 1

Координациялык ыкчам чара көрүү тобунун жетекчиси, БШКнын төрагасынын орун басары – Т.У. Шайназаров билдиргендей,  бардык келип түшкөн арыз даттануулар кароого жана тиешелүү юридикалык  баа берүү үчүн дароо укук коргоо органдарына жөнөтүлгөн.

 1. Шайлоочулардын добуштарын сатып алуу фактысы боюнча (Кыргыз Республикасынын Жогорку Кеңешинин депутаттыгына талапкер Д. Ниязалиеванын пайдасына «Ак-Өргө» конушундагы «Алтынай» кафесинде болгон) тергөө башталды.

Ушундай эле арыз талапкер О.Суваналиевдин ыйгарым укуктуу өкүлү А.Туржановдон да келип, укук коргоо органдарынын кароосуна өткөрүлдү.

2. Шайлоочулардын добуштарын сатып алуу мүмкүндүгү жөнүндө (Төмөнкү Жал кичи районунда жайгашкан “Гүлнар” павильонунда КР ЖК депутаттыгына талапкерлер Айткулов М., Д. Ниязалиеванын пайдасына) тергөөгө чейинки текшерүүдө кылмыштын курамынын жоктугуна байланыштуу кылмыш ишин козгоодон жарым-жартылай баш тартуу чечими кабыл алынган.

Материалдар мыйзамдуулугун жана негиздүүлүгүн текшерүү үчүн Ленин районунун прокуратурасына жөнөтүлдү.

Ушундай эле арыз талапкер О.Суваналиевдин ыйгарым укуктуу өкүлү А.Туржановдон да келип, ал боюнча иликтөө иштери башталган.

3. Шайлоо алдындагы үгүт иштеринин шарттарынын бузулушу жөнүндө (Кыргыз Республикасынын Жогорку Кеңешинин депутаттыгына талапкер Э.Искаковдун Фейсбук баракчасына жарыялаган билдирүүсү тууралуу) тергөөгө чейинки текшерүү жүргүзүлүп, 25.05.2023-ж. № 02-828-2023-000122 тергөөгө чейинки текшерүүнүн материалдарына тиркелген.

4. Шайлоочуларды ташуу шеги менен түшкөн кайрылуу боюнча   (Арча Бешик конушунун №1062 УШКсына 01kg10*AEX мамлекеттик номурлуу сары түстөгү «Тойота» маркасындагы автоунаа менен) тергөөгө чейинки текшерүү башталды.

Жыйында укук коргоо органдарынын өкүлдөрү сөз сүйлөштү.

Бишкек шаарынын Ленин райондук ички иштер башкармалыгынын тергөө кызматынын башчысынын орун басары Токтогонов У.И. учурда жогоруда айтылган төрт арыз даттануунун үч фактысы боюнча тергөөгө чейинки текшерүү иштери жүрүп жатканын билдирди.

Бишкек шаарынын Ленин районунун прокурорунун орун басары Абдырахман Руслан прокуратура тарабынан тергөө органдары кабыл алган чечимдердин мыйзамдуулугу жана негиздүүлүгү боюнча текшерүү жүрүп, башка арыз даттануулар  боюнча жүрүп жаткан тергөө аракеттери көзөмөлгө алынып жатканын билдирди.

Маалымат үчүн: шайлоо мыйзамдарын бузуулар жана көрүлгөн чаралар жөнүндө маалыматты Борбордук шайлоо комиссиясынын расмий сайтынын “Рестрлер” бөлүмүнөн таба аласыз (шилтеме: https://shailoo.gov.kg/ru/reestr)