2023-жылдын 28-майында КР БШК мүчөсү К.Маматов Түрк мамлекеттер уюмунун Миссиясынын курамында Түркия Республикасындагы президенттик шайлоонун экинчи айлампасына байкоо жүргүзүүгө катышууда.

Буга чейин да Кыргызстандын делегациясы Түрк мамлекеттер уюмунун миссиясынын курамында Түркия Республикасындагы президенттик шайлоонун биринчи айлампасына мониторинг жүргүзүүгө катышкан https://shailoo.gov.kg/ru/news/6686/ .

Түрк мамлекеттер уюму миссиясы шайлоо участкаларын кыдырып, добуш берүүнүн жүрүшүнө көз салууда. Эл аралык байкоочулар шайлоону даярдоо жана өткөрүү, жарандардын шайлоого катышуусу, шайлоо комиссияларынын иши тууралуу да маалымат алып жатышат.

Шайлоо участкаларында шайлоочулардын активдүү катышуусу байкалууда. Эксперттердин айтымында, экинчи турда, шайлоочулардын рекорддук активдүүлүгү күтүлүүдө.

Расмий маалыматтарга караганда, буга чейин чет өлкөдө добуш берүүгө 2 миллиондон ашык шайлоочу катышты, бул чет өлкөдөгү шайлоочулардын тизмесине кирген түрк жарандарынын 55%дан ашыгын түзөт.

Добуш берүү 2023-жылдын 20-24-май күндөрү дүйнөнүн 73 өлкөсүндө 167 шайлоо участкасында өттү.

Маалымат үчүн:

Түркия Республикасында президенттик шайлоонун биринчи айлампасы 2023-жылдын 14-майында өткөн. Түркиянын Жогорку шайлоо кеңешинин маалыматына караганда, 81 провинцияда 31 миң 800 шайлоо участкасы түзүлүп, 64 миллион 190 миң 651 түрк жараны шайлоочулардын тизмесине киргизилген. Добуш берүүгө 55 833 175 шайлоочу катышкан, алар шайлоочулардын жалпы пайыздык көрсөткүчүнүн 86,98% түзгөн.

Анда Режеп Тайып Эрдоган жалпы добуштардын – 49,42%, Кемал Кылычдароглу – 44,95%, Синан Оган – 5,2%, Мухаррем Инже – 0,43% алган.

Режеп Тайып Эрдоган добуштардын көбүн Байбурт, Гүмүшан, Йозгат, Ризе, Канкири шаарларынан алган.

Талапкер Кемал Кылычдароглу Анкара, Стамбул, Анталия, Измир жана башка ири шаарларда жеңишке жеткен.

Түркиянын шайлоо мыйзамдарына ылайык, президенттикке талапкер биринчи турда жеңүү үчүн 50%дан ашык добуш алышы керек. 2023-жылдын 14-майындагы шайлоонун жыйынтыгында эч бир талапкер керектүү добуштарды ала алган эмес жана Түркиянын Жогорку шайлоо кеңеши президенттик шайлоонун экинчи айлампасын 2023-жылдын 28-майына белгилеген.