Жергиликтүү кеңештерге шайлоо өтүүчү Баткен облусунун Баткен районунун Самаркандек, Ак-Татыр жана Ак-Сай айыл аймактарынын дээрлик 600 тургуну 2 мобилдик топтун жардамы менен КТБ (ЦОН) кызмат көрсөтүүлөрүнөн пайдаланды.

Биометрикалык каттоодон өтүүдө, паспорт алмаштырууга документтерди берүүдө, туруктуу жашаган жери боюнча каттоодо, булуттук электрондук кол тамга алууда кыйынчылыкка туш болуп жатышкан жергиликтүү калктын кайрылуусу боюнча Шайлоо жана референдум өткөрүү боюнча борбордук комиссиясы менен Санариптик өнүктүрүү министрлиги тарабынан мобилдик топтор түзүлгөн.

Мобилдик топтор 4-10-март күндөрү Ак-Сай, Үч-Дөбө, Таш-Тумшук, Миң-Өрүк, Миң-Булак, Көк-Таш, Самаркандек, Орто-Сай, Паскы-Арык, Жаңы-Бак, Орто-Боз, Ак-Татыр жана Рават айылдарында болушту.

Мобилдик топтордун жардамы менен 2 адам биометрикалык каттоодон өттү, 45и – паспорт алмаштырууга документтерди тапшырды, 91и – жашаган жери боюнча катталды, 2өө – ПИН алды, республиканын 577 жараны булуттук электрондук кол тамга алды. КТБ (ЦОН) бардыгы 720 кызмат көрсөттү.

Жергиликтүү тургундарга алдыдагы шайлоо жөнүндө, айрыкча электрондук түрдө добуш берүү боюнча маалымат, кеңеш берилди.

«Кыргыз Республикасынын Нарын, Баткен, Ош, Талас жана Чүй облустарынын айрым жергиликтүү кеңештеринин депутаттарын шайлоону дайындоо жөнүндө» Кыргыз Республикасынын Президентинин 2023-жылдын 6-февралындагы №19 ПЖ Жарлыгын аткаруу үчүн БШК Баткен облусунун Баткен районунун Самаркандек, Ак-Сай жана Ак-Татыр айылдык кеңештеринин депутаттарын шайлоодо электрондук добуш берүүнү пилоттук режимде апробациялоо чечимин кабыл алганын белгилей кетели.

Маалымат үчүн:

Самаркандек айылдык кеңешинде контролдук тизмеде шайлоочулардын саны 7 549 адамды түзөт. Мандаттардын саны – 21, анын ичинде 9 мандат аялдар үчүн резервге калтырылды.

Ак-Татыр айылдык кеңешинде контролдук тизмеде шайлоочулардын саны 7 549 адамды түзөт. Мандаттардын саны – 21, анын ичинде 9 мандат аялдар үчүн резервге калтырылды.

Ак-Сай айылдык кеңешинде контролдук тизмеде шайлоочулардын саны 4 508 адамды түзөт. Мандаттардын саны – 21, анын ичинде 7 мандат аялдар үчүн резервге калтырылды.