Кыргыз Республикасынын Шайлоо жана референдум өткөрүү боюнча борбордук комиссиясынын 2023-жылдын 4-мартындагы жыйынында Ак-Сай айыл аймагынын №8063 шайлоо участогунун схемаларына жана чек араларына өзгөртүүлөр киргизилип, Баткен облусунун Баткен районундагы Ак-Сай айыл аймагынын Миң-Булак айылында жаңы шайлоо участогу түзүлдү.
Токтом Баткен аймактык шайлоо комиссиясынын чечиминин негизинде , Ак-Сай айыл өкмөтүнүн башчысынын кайрылуусунун алкагында кабыл алынды.
Ак-Сай айыл өкмөтүнүн башчысы өз кайрылуусунда Миң-Булак айылынын тургундары Ак-Сай айыл аймагынын Көк-Таш айылындагы №8063 шайлоо участогуна шайлоодо добуш берип жатканын белгиледи. Көк-Таш менен Миң-Булак айылдарынын аралыгы 12 км. Ушуга байланыштуу Миң-Булак айылынын шайлоочулары шайлоодо кээ бир кыйынчылыктарга дуушар болууда.
Ошол эле учурда Миң-Булак айылында добуш берүүнү уюштуруу үчүн тиешелүү бөлмө жана шарттар түзүлгөн.
№8063 шайлоо участогунун схемаларына жана чек араларына жана №8219 жаңы шайлоо участогунун схемаларына жана чек араларына өзгөртүүлөр Ак-Сай айыл өкмөтүнүн башчысы, Ак-Сай айылдык кеңешинин төрагасы жана «Кадастр» мамлекеттик мекемесинин Баткен филиалы менен биргеликте иштелип чыгып, КР БШКнын кароосуна жана бекитүүсүнө сунушталган.
«Жергиликтүү кеңештердин депутаттарын шайлоо жөнүндө» Кыргыз Республикасынын Мыйзамынын 10-беренесинин 1-бөлүгүнө ылайык добуш берүү жана добуштарды эсептөө үчүн шайлоочулар үчүн максималдуу ыңгайлуулуктарды түзүү максатында шайлоо участоктору жергиликтүү жана башка шарттарды эске алуу менен түзүлөт.
№8219 жаңы шайлоо участогу Миң-Булак айылында, «Миң-Булак» жалпы билим берүү мектебинин имаратында, дареги: Н.Боронбаева, 17 көчөсүндө жайгашат.
№2 Көк-Таш шайлоо округунун схемасы жана чек аралары өзгөрбөйт.
Жаңыдан түзүлгөн №8219 шайлоо участогунун шайлоочуларынын тизмеси шайлоо округунун чегинде каттосу бар жана Миң-Булак айылынын аймагында каттоосу жок жашаган адамдардын ичинен түзүлөт.
Баткен аймактык шайлоо комиссиясына Миң-Булак айылындагы №8219 участкалык шайлоо комиссиясынын курамын жана резервин түзүү, жергиликтүү өз алдынча башкаруу органдары менен биргеликте жаңыдан түзүлгөн шайлоо участкасынын дареги боюнча шайлоочулар арасында түшүндүрүү иштерин жүргүзүү тапшырылды.
КР БШКнын маалымат бөлүмү
