БШКда БШК төрагасы жана Швейцариянын КРдеги Атайын жана Ыйгарым укуктуу Элчиси Оливье Бангертер шайлоолордун аралыгындагы мезгилде мындан ары кызматташууну талкуулашты

18 июля 2022

Боршайкомдун башчысы БУУӨПтүн “Кыргызстандагы 2020-2021-жылдардагы шайлоолорду колдоо” программасынын долбоорунун алкагында КРге натыйжалуу колдоо көрсөткөндүгү үчүн Швейцария Өкмөтүнө жана өзүнө – Швейцариянын КРдеги Атайын жана Ыйгарым укуктуу Элчисине терең ыраазычылык билдирди.

Шайлоо өнөктүктөрүнүн жана референдумдардын алкагында шайлоо өнөктүктөрүнүн каржылык айкындуулугу, саясий партиялар жана талапкерлер, ЖМК, жарандык коом үчүн маалыматтык-түшүндүрүү иштерин жүргүзүү, Жарандык билим берүү борборунун ишине көмөктөшүү, шайлоо процессинин инклюзивдүүлүгү сыяктуу багыттарда, ошондой эле чет өлкөлөрдө жашаган же жүргөн шайлоочулар үчүн маалыматтык өнөктүктү жүргүзүүдө маанилүү колдоо көрсөтүлдү.

Швейцариянын КРдеги Элчиси Кыргызстан чыныгы демократиялык шайлоо өткөрүү боюнча үлгү болоорун жана Швейцария Өкмөтү Кыргызстан менен жемиштүү кызматташууга дилгир экендигин билдирди.

Шайлоону уюштурууну жакшыртуу боюнча көрүлүп жаткан чараларды, мындан ары реформалоонун милдеттерин жана принциптерин талкуулап, БШК төрагасы шайлоолордун аралыгындагы мезгилде жарандык билим берүү артыкчылыктуу милдет болуп саналат жана Боршайком республиканын аймактарында жарандык жана санариптик билим берүү түйүнүн түзүүнүн үстүндө иштөөдө.

Жарандардын шайлоо тутумуна ишенимин жана шайлоого катышуудагы жигердүүлүгүн арттыруу жарандык билим берүүнүн башкы максаты болуп саналат. Бул милдеттер ак ниет башкарууга жана өлкөнү туруктуу өнүктүрүүгө таасир этүүчү коомдогу эң маанилүү коомдук-саясий процесс катары шайлоону жарандардын түшүнүүсүн жана алар тууралуу кабардар болуусун жакшыртуу боюнча чаралар менен ишке ашырылышы мүмкүн.

Жакын арада эле өлкөнүн бардык аймактарында китепканаларынын жана жаштар борборлорунун базасында борборлорду ишке киргизүү мерчемделүүдө. Окутуу программалары Жарандык билим берүү жана шайлоо технологиялары борборунун программаларынан (онлайн, офф-лайн), ошондой эле мамлекеттик органдар, жарандык коомдун уюмдары жана бизнес-коомчулук тарабынан иштелип чыккан жана сунушталган жарандык жана санариптик билим берүү боюнча окутуу программаларынан болушу мүмкүн. Швейцариянын Элчиси жалпы максаттарга жетүү үчүн бардык кызыкдар тараптар менен өнөктөшүүгө даяр болууну кубаттады.  

Жолугушууга БШК аппаратынын жетекчиси М.К. Мамбеталиев, ЖББжШТ директору М. Сарымсаков, ЖББжШТтын жарандык билим берүү боюнча координатору А. Букамбаева, ЖББжШТтын санариптик билим берүү боюнча координатору Т. Шахин-Байло жана аппараттын бөлүм башчысы Б. Дюшенбиева катышты.

 

​​​​​​