БШКда шайлоо мыйзамдарын өркүндөтүү боюнча ведомстволор аралык жумушчу топ түзүлдү

30 июня 2022

 

Борбордук шайлоо комиссиясы 30-июнда өткөн жыйналышында Кыргыз Республикасынын шайлоо мыйзамдарын өркүндөтүү боюнча ведомстволор аралык жумушчу топтун курамын жактырды.

Көрсөтүлгөн чечим “Кыргыз Республикасынын Шайлоо жана референдум өткөрүү боюнча борбордук комиссиясы жөнүндө” Кыргыз Республикасынын конституциялык “Мыйзамынын 4-беренесине ылайык кабыл алынды, анда минтип жазылган: “Борбордук шайлоо комиссиясы:

- шайлоону жана референдумду даярдоо жана өткөрүү маселелери боюнча мамлекеттик органдар менен жергиликтүү өз алдынча башкаруу органдарынын ишин координациялайт;

- шайлоолорду жана референдумдарды даярдоо жана өткөрүү тажрыйбаларын иликтейт жана шайлоо мыйзамдарын өркүндөтүү боюнча Жогорку Кеңешке сунуштарды берет”.

Шайлоо циклы 2025-жылы жергиликтүү кеңештерге жапырт шайлоо өткөрүүдөн башталарын, 2026-жылы – кезектеги парламенттик шайлоо мөөнөтү экендигин, 2027-жылы – президентти шайлоо өтөөрүн эске алып, шайлоолордун аралыгындагы мезгилде шайлоо мыйзамдарын өркүндөтүү боюнча чараларды көрүү абдан маанилүү.

Жумушчу топтун курамына төмөнкүлөр кирди: КР Жогорку Кеңешинин депутаттары, Борбордук шайлоо комиссиясынын мүчөлөрү, судьялар, мамлекеттик органдардын, жарандык коомдун өкүлдөрү жана шайлоо мыйзамдары тармагындагы эксперттер.

Кабыл алынган чечимге ылайык Ведомстволор аралык жумушчу топ колдонуудагы мыйзамдарды, шайлоо өткөрүү тажрыйбасын талдоонун негизинде, кеңири коомдук талкуу уюштуруу жолу менен шайлоо укугун жана процессин өркүндөтүү боюнча сунуштарды иштеп чыгуусу керек.

Ведомстволор аралык жумушчу топтун ишин уюштуруу жагынан камсыздоо Борбордук шайлоо комиссиясынын аппаратына жүктөлдү.

Ведомстволор аралык жумушчу топтун курамы