Түркмөнстандын Шайлоо жана референдум өткөрүү боюнча борбордук комиссиясынын төрагасынын чакыруусу боюнча КР БШК төрагасынын орун басары Койчукеев Н.Ч. жана КР БШК мүчөсү Дубанбаева А.С. КМШ Миссиясынын курамында, ошондой эле Кыргыз Республикасынын Түркмөнстандагы Элчилигинин өкүлү ШКУ Миссиясынын курамында 2022-жылы 12-мартта өтүп жаткан Түркмөнстандын Президентин шайлоого эл аралык байкоочу катары катышууда.
Иш сапардын жүрүшүндө Түркмөнстандын Боршайкомунун төрагасы Азербайжандын, Россиянын, Кыргызстандын, Казакстандын, Тажикстандын, Түркиянын жана Өзбекстандын шайлоо комиссияларынын өкүлдөрү менен жолугушту.
Түркмөнстандын Боршайкомунун маалыматы боюнча бардык 2577 шайлоо участогунда жарандардын эрк-ниетин билдирүү үчүн шарттар түзүлгөн. Жарандардын коопсуздугу үчүн мында санитардык-профилактикалык чаралар көрүлгөн, 300дөн ашык участок инновациялык дезинфекциялоочу түзүлмөлөр менен жабдылган.
Борбордун, велаяттардын жана этраптардын тургундары жашаган жери боюнча добуш беришет, шайлоого алдын ала чакыруу, жеке номер, ошондой эле шайлоочу үчүн добуш берүү боюнча нускама алышкан.
Мындан тышкары, чет өлкөлөрдө 41 шайлоо участогу иштейт, ал участоктор өлкөнүн элчиликтеринде жана консулдугунда ачылган.
Түркмөнстандын Шайлоо кодексинин 69-беренесине ылайык добуш берүү 2022-жылы 12-мартта жергиликтүү убакыт боюнча эртең менен саат 7:00дө башталат жана саат 19:00дө аяктайт. Эскертүү: Түркмөнстандын Президентин шайлоодо мөөнөтүнөн мурда добуш берүү 2022-жылы 2-мартта башталды жана 12-мартта жергиликтүү убакыт боюнча 18:00дө аяктады.
Шайлоо участокторунда добуш берүү санариптик таризде өтүп, Түркмөнстандын Борбордук шайлоо комиссиясынын «saylav.gov.tm» сайтында онлайн режиминде көрсөтүлүүдө. Президентти шайлоону өткөрүү жөнүндө маалыматтар улуттук теле көрсөтүүдө жана радиодо дагы берилүүдө.
Бардык шайлоо участокторунда белгилүү ырчылардын, бахши-музыканттардын жана чыгармачыл жамааттардын аткаруусунда чыгармаларын уктуруу уюштурулган.
Түркмөнстандын Президентин шайлоого Көз карандысыз Мамлекеттер Шериктештигинин, Шанхай кызматташтык уюмунун, Ислам кызматташтык уюмунун, Түрк мамлекеттеринин уюмунун парламенттик ассамблеясынын миссияларынын жана дипломатиялык корпустун өкүлдөрүнөн 118 эл аралык байкоочу байкоо жүргүзүүдө.
КМШ байкоочулар Миссиясына КМШ Аткаруу комитетинин Төрагасынын – Аткаруучу катчысынын Биринчи орун басары Анфимов Леонид Васильевич башчылык кылууда.
2022-жылдын 7-мартына карата Түркмөнстандын Борбордук шайлоо комиссиясы төмөнкү жактардан 2726 улуттук байкоочу каттады:
- 544 – Демократиялык партиядан,
- 355 – Өнөр жайчылар жана ишкерлер партиясынан,
- 390 – Агрардык партиядан,
- 520 – Кесиптик бирликтерден,
- 290 – Аялдар бирлигинен,
- 525 – Түркмөнстандын Махтумкули атындагы жаштар уюмунан,
- 84 – жарандар тобунан,
- 18 – талапкерлердин байкоочулары.
БШК белгилегендей, жергиликтүү байкоочулардын 47,76%ын аялдар түзөт.
Маалымат үчүн:
Борбордук шайлоо комиссиясы Түркмөнстандын Президенттигине тогуз талапкер каттады. Төмөнкүлөр жогорку мамлекеттик кызмат ордуна талапкер болуп саналат:
Сердар Бердымухамедов – Министрлер Кабинетинин Төрагасынын орун басары (Түркмөнстандын Демократиялык партиясынан),
Агаджан Бекмырадов – Марый велаятынын акиминин орун басары (Түркмөнстандын Агрардык партиясынан),
Перхат Бегенджов – Лебап велаятынын Финансы-экономикалык кесиптик орто лицейинин директору (Лебап велаятынын демилгечил жарандар тобунан),
Бердымаммет Гурбанов – Саламаттык сактоо жана медициналык өнөр жай министрлигинин «Аваза» санаторийинин башкы врачы, Милли Генгеш Меджлисинин депутаты (Балкан велаятынын демилгечил жарандар тобунан),
Максатмырат Овезгелдиев – Ахал велаятынын Бабадайхан этрабынын санитардык-эпидемиологиялык кызматынын начальниги (Ахал велаятынын демилгечил жарандар тобунан),
Какагелди Сарыев – Мамлекеттик энергетика институтунун «Энергиянын жаңыланган булактары» илимий-өндүрүштүк борборунун директору (Марый велаятынын демилгечил жарандар тобунан),
Бабамырат Мередов – «Вепалыгурлушик» чарба коомунун директору (Түркмөнстандын Өнөр жайчылар жана ишкерлер партиясынан),
Хыдыр Нуннаев – Түркмөн Мамлекеттик физкультура жана спорт институтунун илимий иштер брюнча проректору, педагогика илимдеринин кандидаты (Ашхабад шаарынын демилгечил жарандар тобунан),
Максат Одешов – Түркмөнстандын Сапармурат Түркмөнбашы атындагы Демократиялык партиясынан комитетинин төрагасы (Дашогуз велаятынын демилгечил жарандар тобунан).
КР БШК аппаратынын маалымат бөлүмү
