2021-жылдын 28-ноябрында өтүүчү Кыргыз Республикасынын Жогорку Кеңешинин депутаттарын шайлоодо шайлоочулардын биротоло тизмеси 2021-жылдын 18-ноябрында түзүлүп шайлоочулардын “Тизме” - https://tizme.gov.kg/ мамлекеттик порталына жайгаштырылды. Ошондой эле шайлоо мыйзамдарына ылайык добуш берүү күнүнө чейин 7 календардык күн калганда (2021-жылдын 21-ноябрында) шайлоочулардын биротоло тизмеси баардык шайлоо участокторунда илинет. Баардыгы 2494 шайлоо участогу түзүлгөн, анын ичинде 59 шайлоо участогу чет өлкөлөрдө жана – 2435 шайлоо участогу өлкө аймагында.

2021-жылдын 11-апрелинде өткөн «Кыргыз Республикасынын Конституциясы жөнүндө» мыйзам долбоору боюнча референдумдун (3 606 201) катышуучуларынын санына салыштырганда шайлоочулардын жалпы саны 97 219 шайлоочуга көбөйдү.

Бирдиктүү шайлоо округу боюнча биротоло тизмедеги шайлоочулардын саны – 3 703 420 шайлоочу, алардын ичинен чет өлкөдө катталган шайлоочулардын саны 84 128 шайлоочу. Үстүбүздөгү жылы 9-сентябрда сайтка жайгаштырылган бирдиктүү шайлоо округу боюнча Кыргыз Республикасынын Жогорку Кеңешинин депутаттарын шайлоодо шайлоочулардын алдын ала тизмесиндеги шайлоочулардын санына (3 686 921) салыштырганда 16 499 шайлоочуга өстү.

Бир мандаттуу округдардагы шайлоочулардын саны - 3 621 751 шайлоочу (чет өлкөлөрдө катталган шайлоочулардын санын эсепке албаганда). 9-сентябрда сайтка жайгаштырылган Кыргыз Республикасынын Жогорку Кеңешинин депутаттарын бир мандаттуу округдардагы шайлоодо шайлоочулардын алдын ала тизмесиндеги шайлоочулардын санына (3 617 591) салыштырганда 1 701 шайлоочуга өстү (кенен маалымат “Тизме” - https://tizme.gov.kg/порталында).

Шайлоочулар өздөрүнүн шайлоочулардын тизмесине киргендиги, тиешелүү участкалык шайлоо комиссиясынын номери жана дареги тууралуу маалыматты төмөнкү жолдор менен тактап алса болот:

• 1255 же 119 номерине телефон чалуу менен;
• «tizme.gov.kg» сайтында;
• Өзүңүздүн паспортуңуздагы идентификациялык жеке номерди (ПИН) көрсөтүү менен 119 номерине СМС жөнөтүп, Сиздин шайлоо участогуңуздун номери жана дареги тууралуу жооп аласыз (СМС билдирүү жөнөтүү жана чалуулар акысыз).

БШК аппаратынын маалымат бөлүмү