Кыргыз Республикасынын Шайлоо жана референдум өткөрүү боюнча борбордук комиссиясы Шайлоо тутумдарынын эл аралык фондунун (IFES) өкүлчүлүгү менен биргеликте USAIDдин колдоосу алдында Талас облусунун жалпыга маалымдоо каражаттарынын (ЖМК) өкүлдөрү жана блогерлери үчүн окутууну уюштурду.
Жолугушууда катышуучуларга 2021-жылдын 28-ноябрына дайындалган Кыргыз Республикасынын Жогорку Кеңешинин депутаттарын шайлоонун өзгөчөлүктөрү, КР ЖКга шайлоо процессинин негизги этаптары, шайлоо процессинин жүрүшүндө маалымдоо жана үгүт жүргүзүүнүн эрежелери тууралуу айтылды.
КР БШК төрагасынын орун басары Тынчтык Шайназаровдун айтымында алдыдагы парламенттик шайлоону даярдоо алкагында ЖМКнын ролу өсөт, жаңы шайлоо тутумунун өзгөчөлүктөрү ар бир шайлоочуга толук негизде жеткизилиши керек. Өзүн шайлоочулардын тизмесинен кандай такташ керек, бирдиктүү шайлоо округу жана бир мандаттуу шайлоо округдары боюнча кандай добуш берүү керек экендиги тууралуу айтылды. ЖМКны жана блогерлерди шайлоо мыйзамдарын бузууларга активдүү чара көрүүгө, бузуулар тууралуу арыздарды ар бир шайлоо округунда түзүлгөн ыкчам чара көрүүчү координациялык топторго жөнөтүүгө чакырышты. Мындан тышкары, КР БШКнын сайтында даттануулардын электрондук реестри – https://shailoo.gov.kg/kg/reestr-zhalob-i-narushenij-vybory-JK-28-11-2021/ бар, андан ЖМК жана шайлоочулар маморгандардын иш-аракеттерине байкоо жүргүзө алышат.
Медиа эксперт Авланбек Джумабаевдин айтымында ЖМК жана блогерлер шайлоо процесси тууралуу керектүү кеңештерди КР БШКнын маалымдоо маселелери боюнча Жумушчу тобу аркылуу алууга мүмкүнчүлүктөрү бар.
“Жумушчу топ шайлоо өнөктүгү мезгилинде талапкерлер, саясий партиялар, жалпыга маалымдоо каражаттары, интернет-басылмалар тарабынан жол берилген шайлоо алдындагы үгүт жүргүзүү тартибин жөнгө салган колдонуудагы мыйзамдарды бузуу жөнүндө материалдарды чогултат жана тутумга салат. Кыргызстанда добуш берүүнүн жыйынтыктарын саноодо аныктык камсыздалган, силердин жана биздин милдет – сатып алуу жана администрациялык ресурсту пайдалануу сыяктуу бузууларга жол бербөө. Башталыш этабында өз убагында чара көрүү ошондой бузууларды төмөндөтүүгө мүмкүнчүлүк берет”, - деди ал.
КР БШКнын маалымдоо жана үгүт жүргүзүү боюнча Жумушчу тобунун мүчөлөрү Наргиза Нанакеева жана Кыргызстандын журналисттеринин көз карандысыз бирлигинин төрагасынын орун басары Семетей Аманбеков катышуучуларга шайлоо процессинин жүрүшүнө байкоо жүргүзүүдө фактчекинг каражаттарын кандай пайдаланса болорун, шайлоодо маалымдоонун жана үгүт жүргүзүүнүн жүрүшүндө кастык тилин пайдаланууну кантип азайтуу керектигин түшүндүрүштү.
КР БШК аппаратынын маалымат бөлүмү
