Кыргыз Республикасынын Шайлоо жана референдум өткөрүү боюнча борбордук комиссиясы Шайлоо тутумдарынын эл аралык фондунун (IFES) өкүлчүлүгү менен биргеликте USAIDдин колдоосу алдында Ош шаарында жалпыга маалымдоо каражаттарынын (ЖМК) өкүлдөрү үчүн тренинг өткөрдү.
Катышуучулар 2021-жылдын 28-ноябрына дайындалган Кыргыз Республикасынын Жогорку Кеңешинин депутаттарын шайлоонун өзгөчөлүктөрү менен таанышты, КР ЖКга шайлоону уюштуруунун жана өткөрүүнүн негизги этаптары, шайлоо процессинин жүрүшүндө жарандарга маалымдоо жана шайлоо алдында үгүт жүргүзүүнүн эрежелери боюнча билим алышты.
КР БШК төрагасы Н.Шайлдабекова катышуучуларга парламенттик шайлоону даярдоо, анын ичинде шайлоо процессинин катышуучуларын – укук коргоо органдарын, саясий партияларды, талапкерлерди, банк кызматкерлерин, шайлоо комиссияларынын мүчөлөрүн окутуу боюнча КР БШК, ошондой эле бүт республика боюнча шайлоо комиссияларына көмөктөшүүчү штабдар жүргүзүп жаткан иштер тууралуу маалымат берди. Дискуссиянын жүрүшүндө добуш берүүнүн жыйынтыктарын саноодо аныктыкты камсыздоочу шайлоонун Кыргыз Республикасындагы технологиялуулук белгиленди.
КР БШК төрагасынын айтуусу боюнча алдыдагы шайлоодо шайлоо процессинин маалыматтык бөлүгү катары региондордогу ЖМКлардын мааниси артууда, себеби жаңы шайлоо тутуму талапкерлерди бир мандаттуу шайлоо округдарынан көрсөтүүнү талап кылат, бул бийликтин шайланма органдарында региондордун өкүлчүлүгүн күчөтөт. Мында ЖМК салт болуп калган маалымдоо иш-милдетинен тышкары, шайлоо мыйзамдарын бузууларды аныктоо жагынан шайлоо процессине дагы байкоо жүргүзө алат.
КР БШК мүчөсү У.Жылкыбаев Шайлоочуларды жана шайлоо процессинин башка субъекттерин маалымдоо маселелери жана үгүт жүргүзүү эрежелери боюнча Жумушчу топтун иши тууралуу айтып, ЖМК жана блогерлер менен кызматташуу багыттарын белгиледи. Ал, ошондой эле, үгүт жүргүзүүнүн эрежелери жана үстүбүздөгү жылы саясий партиялар үчүн улуттук деңгээлде өтүүчү жана бир мандаттуу шайлоо округдарында талапкерлигин койгон талапкерлер үчүн региондордун деңгээлинде өтүүчү дебаттарды уюштуруу тууралуу маалымат берди.
Адил жана ачык-айкын шайлоо өткөрүүдө ЖМКнын ролу тууралуу медиа эксперт Авланбек Джумабаев өз пикирин бөлүштү. Анын пикири боюнча БШК эң жогорку айкындуулукка умтулууда, бул үчүн маалымдоо маселелери боюнча Жумушчу топтун курамына көз карандысыз медиа эксперттер тартылды, үгүт жүргүзүүнүн эрежелери боюнча бузууларга байкоо жүргүзүү алардын милдетине кирет.
Тренерлер – КР БШКнын маалымдоо маселелери боюнча Жумушчу тобунун мүчөсү, Кыргызстандын журналисттеринин көз карандысыз бирлигинин жетекчисинин орун басары Семетей Аманбеков жана Наргиза Нанакеева катышуучуларды шайлоо процессинин жүрүшүнө фактчекинг, маалыматтарга байкоо жүргүзүү, жалган маалыматтарды жана фейктерди ажырата билүү каражаттарын пайдаланууга окутушту.
КР БШК аппаратынын маалымат бөлүмү
