Кыргыз Республикасынын Шайлоо жана референдум өткөрүү боюнча борбордук комиссиясы Кара-Суу районунун Ноокат шаардык кеңешинин жана Ак-Таш айылдык кеңешинин депутаттарын мөөнөтүнөн мурда шайлоону өттү деп тапты жана «Ош облусунун жергиликтүү кеңештеринин депутаттарын мөөнөтүнөн мурда шайлоонун натыйжаларын аныктоо жана добуш берүүнүн жыйынтыктары жөнүндө» токтом кабыл алды. Ош облусунун Кара-Суу районунун Ноокат шаардык кеңешинин, Ак-Таш айылдык кеңешинин депутаттарын мөөнөтүнөн мурда шайлоо «Кыргыз Республикасынын жергиликтүү кеңештерин таркатуу жана Кыргыз Республикасынын жергиликтүү кеңештерине мөөнөтүнөн мурда шайлоо күнүн дайындоо жөнүндө» Кыргыз Республикасынын Президентинин Жарлыгына ылайык 2013-жылдын 26-майында өткөрүлдү.

Кыргыз Республикасынын Шайлоо жана референдум өткөрүү боюнча борбордук комиссиясына Ош облусунда мөөнөтүнөн мурда шайлоонун жыйынтыктары боюнча даттануулар жана арыздар келип түшкөн жок. Шайлоонун натыйжалары жана добуш берүүнүн жыйынтыктары жөнүндө протоколдорго ылайык Ноокат шаардык кеңешине – 21 талапкер, Ак-Таш айылдык кеңешине 21 талапкер шайланды. Шайланган депутаттарга белгиленген үлгүдөгү күбөлүк жана төш белги тапшырылат.

                            Кыргыз Республикасынын Борбордук шайлоо комиссиясынын басма сөз кызматы