Бишкек шаардык кеңешинин депутаттарын кайра шайлоонун натыйжалары аныкталды

27 июля 2021

Бишкек, Ош жана Токмок шаардык кеңештерине депутаттарды кайра шайлоону дайындоо жѳнүндѳ Кыргыз Республикасынын Президентинин 2021-жылдын 28-майындагы Жарлыгына ылайык 2021-жылдын 11-июлунда Бишкек шаардык кеңешинин депутаттарын кайра шайлоо болуп ѳттү.

Бишкек шаардык кеңешинин депутаттарын шайлоого катышуу үчүн 18 саясий партиядан талапкерлердин тизмеси катталган.

Бишкек шаарында шайлоочулардын корутунду тизмесинде 426 699 шайлоочу катталган, добуш берүүгѳ 104141 шайлоочу катышкан, бул шайлоочулардын жалпы санынын 24,41% түзѳт. Бишкек шаардык кеңешинде мандаттардын саны 45ти түзѳт. Бишкек шаардык кеңешине шайлоону ѳткѳрүү үчүн 1 бирдиктүү шайлоо округу жана 228 шайлоо участкалары түзүлгѳн.

Мурда Бишкек аймактык шайлоо комиссиясынын (мындан ары – Бишкек АШК) 2021-жылдын 14-июлундагы чечими менен Бишкек шаардык кеңешинин депутаттарын кайра шайлоодо № 1141 шайлоо участкасындагы добуш берүүнүн жыйынтыктары анык эмес деп таанылган. 227 (228тин ичинен) участкалык шайлоо комиссияларынын добуш берүүнүн жыйынтыктары жѳнүндѳ 2021-жылдын 18-июлундагы протоколдордун негизинде кайра шайлоо болуп ѳттү деп таанылды жана Бишкек шаардык кеңешинин депутаттарын кайра шайлоонун натыйжалары белгиленди.

Кайра шайлоодо 7% босогодон ѳтүү менен, катталган 18 пратиядан 6 саясий партия Бишкек шаардык кеңешине ѳтүп, мандаттарды тѳмѳнкүдѳй бѳлүштүрүштү:

 

- «Эмгек» - 18,25% (11 мандат);

- «Ата-Журт Кыргызстан» - 14,26% (9 мандат);

- «Ишеним» - 12,56% (8 мандат);

- «Ынтымак» - 10,82% (7 мандат);

- «Өнүгүү-Прогресс» - 8,16% (5 мандат);

- «Социал-демократтар» - 8,09% (5 мандат).

Кыргыз Республикасынын Шайлоо жана референдум ѳткѳрүү боюнча борбордук комиссиясына, Бишкек аймактык шайлоо комиссиясына, укук коргоо органдарына бардыгы болуп шайлоо мыйзамдарын бузган учулар тууралуу 77 билдирүү, арыз жана даттануу келип түшкѳн.

Келип түшкѳн бардык билдирүү, арыз жана даттануулар боюнча Бишкек аймактык шайлоо комиссиясы, укук коргоо органдары тарабынан тийиштүү чаралар кабыл алынган.

Борбордук шайлоо комиссиясы ѳзүнүн жыйынында Бишкек шаардык кеңешинин депутаттарын кайра шайлоонун натыйжалары жѳнүндѳ 2021-жылдын 18-июлундагы Бишкек АШКнын протоколун бекитти.