Кымбаттуу Улуу Ата Мекендик согуштун ардагерлери жана ооруктун эмгекчилери! Урматтуу Кыргызстан калкы!
Сиздерди 9-май УЛУУ Жеңиш күнү менен чын дилимден куттуктайм. Биз үчүн Жеңиш күнү - миллиондогон адам баласынын кайгы менен кубанычы аралаш көз жашынан бүткөн улуу майрам, улуу күн. Адамзат тарыхындагы эң кыянаттуу кыргынга акыркы чекит коюлган күнгө 68 жыл толуп отурат. Ошондон бери фашизм менен кашык каны калганча жан аябай күрөшкөн ата-бабаларыбыздын эрдигин түбөлүккө даңктоо иретинде "Жеңиш!" деген ыйык сөз баштамга менен жазылып келет. Канмайданда каза болгондордун, арабыздан көзү өтүп кеткен маркум ардагерлердин, азыр да биз менен аралашып жүргөн ата-энелердин чыныгы эрдигине таң берип, мына ошол канмайдан менен оорукта жамы журттун жабыла аракетинин аркасында гана Улуу Жеңиш жаралгандыгын туюп турабыз.
Бул күнү биз кан-жанын аябастан Ата Журтту фашизмден коргогондорго, Улуу Жеңиш үчүн оорукта күнү-түнү эмгектенгендерге, ХХ кылымдын эң кандуу согушунда аман калып, келечек муун үчүн талыкпаган эмгеги менен өз жерин кайрадан калыбына келтиргендерге таазим этебиз.
Алардын каармандыгы, кайраты жана баатырдыгы азыркы жана келечек муундар үчүн Мекенин жан-дили менен сүйүүнүн өчпөс мисалы, элдин биримдигинин жана ынтымагынын жаркын символу болуп кала бермекчи.
Согуш ардагерлерине, маркумдардын жесирлери менен бала-бакыраларына, оорук эмгекчилерине чың ден соолук, узун өмүр, бакубат жашоо каалаймын.
|
Сиздерди терең урматтоо менен, Кыргыз Республикаынын Шайлоо жана референдум өткөрүү боюнча борбордук комиссиясынын төрагасы Туйгунаалы Абдраимов. |
