Кыргыз Республикасынын Президенти Садыр Жапаров өлкөнүн аялдарынын жергиликтүү кеңештерге катышуусун жигерлетүүнү колдоо боюнча иш-чарага катышты. “Кыргызстанды бирге өнүктүрөбүз!” деген ураан менен өткөн акцияга Кыргыз Республикасынын Шайлоо жана референдум өткөрүү боюнча борбордук комиссиясынын төрагасы Нуржан Шайлдабекова, БУУнун Башкы катчысынын Борбордук Азия боюнча Атайын өкүлү Наталья Герман, ошондой эле дипломатиялык корпустун өкүлдөрү жана эл аралык өнөктөштөр катышты.
Куттуктоо сөзүндө Н. Шайлдабекова Кыргыз Республикасы өзүнө эркин, акыйкат жана демократиялык шайлоо өткөрүү боюнча эл аралык милдеттенмелерди алгандыгын белгиледи.
“Мамлекеттин милдети – биздин жарандардын шайлоо укуктарын толук ишке ашыруусу үчүн тынч шарттарды түзүү. Бүгүнкү өнөктүк жүргүзүлүп жаткан реформаларга коомчулуктун көңүлүн бурууга, аялдардын шайлоого катышуусун күчөтүүгө жана шайлоого катышууга ниеттенген аялдарга толук колдоо көрсөтүүгө багытталган”, - деп айтты БШК төрагасы.
Алдыда 11-апрелде айылдык кеңештерге шайлануучу 7 560 депутаттын 2 943 мандаты талапкер аялдар үчүн резервге калтырылгандыгы белгиленди. Ал мандаттар үчүн 5300 талапкер аял ат салышууда. Бул аялдардын саясатка кызыккандыгынын жана ага барууга, жергиликтүү маанидеги маселелерди чечүүгө даярдыгынын абдан жакшы көрсөткүчү.
Өз сөзүндө Мамлекет башчысы өлкөнүн саясий турмушуна катышууга жарандардын бирдей мүмкүнчүлүктөрүн символдоштуруучу бул иш-чаранын маанилүүлүгүн белгиледи.
“30%дык квотаны иш жүзүндө колдонуу айылдык кеңештерде аялдардын санынын өсүшүнө алып келет, ал эми натыйжасында жер-жерлерде чечим чыгарууда гендерлик теңчиликти камсыз кылат”, - деди С. Жапаров.
КР Президенти аялдардын үй-бүлөгө эле камкордук көрбөстөн, аймактарда бакубатчылыкты тартуулоого умтулуусун колдоого даяр экендигин билдирип, облустардын социалдык-экономикалык жактан гүлдөп, өнүгүшүнө аялдар чындыгында көмөктөшө аларын кошумчалады. Бүгүн
тиккен көчөттөр аймактарыбыздын ургаалдуу өсүшүнөн артта калбай өсүп кетерине ишенерин билдирди.
Өз кезегинде БУУнун Башкы катчысынын Борбордук Азия боюнча Атайын өкүлү Наталья Герман турмуштун бардык чөйрөлөрүндө, анын ичинде саясий чөйрөдө гендерлик теңчиликти камсыздоого Кыргыз Республикасынын умтулуусун баса белгиледи.
“Бириккен Улуттар Уюмунда аялдардын укуктарын жана мүмкүнчүлүктөрүн кеңейтүүгө олуттуу мамиле жасашат жана бул тынчтык, коопсуздук жана бардык адамдардын туруктуу өнүгүшү үчүн чечүүчү мааниге ээ экендигин жакшы түшүнүшөт”, - деди Н. Герман.
БУУ гендерлик теңчиликти чыңдоо жана аялдардын саясатка катышуусун кеңейтүү үчүн Кыргызстан дайыма жумшап келаткан күч-аракеттерди кубаттайт.
Дипломатиялык корпустун атынан Германиянын Элчиси Моника Иверсен чыгып сүйлөп, бул иш-чараны уюштургандыгы үчүн Борбордук шайлоо комиссиясына ыракматын айтты.
“Аллея үчүн дарак көчөттөрүн тигүү келечекте жемишин берүүчү символдуу иш. Биз тигүүчү көчөттөр өсүп, жетилип, дүйнөнү жана бизди курчап турган айлана-чөйрөнү өзгөртөт. 30%дык гендерлик квотаны киргизүү дагы Кыргыз Республикасынын демократиялык нукта өнүгүшүнө узак мөөнөттүү таасир этерине биз ишенебиз”, - деди М. Иверсен.
Расмий бөлүк аяктагандан кийин иш-чаранын катышуучулары аялдардын жергиликтүү кеңештерге катышуусун жигерлетүүнү колдоп, борбордогу “Ынтымак” паркында көчөт тигишти.
КР БШК аппаратынын маалымат бөлүмү
