Чет өлкөлөрдө жашаган Кыргыз Республикасынын жарандарынын шайлоо укуктарын жүзѳгѳ ашырууну камсыздоо боюнча Жумушчу топ 2021-жылдын 15-мартындагы кезектеги жыйналышында Кыргыз Республикасынын чегинен тышкары референдумду даярдоо жана өткөрүү маселелерин талкуулады.

Күн тартибине чет өлкөлөрдө референдум участкаларын түзүү, референдумдун катышуучуларынын тизмелерин толук жана анык түзүүнү камсыздоо, ошондой эле керектүү жабдыктарды, документтерди жана жеке коргонуучу каражаттарды жеткирүү маселелери киргизилди.

БШК төрагасы жыйналыштын катышуучуларына КР БШКнын 2021-жылдын 14-мартындагы № 65 токтому менен БШКнын мурдагы – 2020-жылдын 20-ноябрындагы № 370 токтому менен түзүлгөн, анын ичинде Кыргыз Республикасынын чегинен тышкары түзүлгөн шайлоо участкалары Кыргыз Республикасынын референдумунун участкалары катары бекитилгендигин маамымдады. Ушуга байланыштуу ТИМ айрым мамлекеттердеги эпидемиологиялык кырдаалды жана Кыргыз Республикасынын мамлекеттик органдарынын реформаланышын эске алуу менен өз убагында сунуштарды киргизүүсү зарыл. Ошону менен бирге Жумушчу топ мурда түзүлгөн референдум участкаларынын санын сактоо зарылдыгын белгиледи.

Кыргыз Республикасынын шайлоо мыйзамдарына ылайык чет өлкөлөрдөгү референдумдун катышуучуларынын тизмеси «Консулдук каттоо» АМТ маалыматтарынын негизинде түзүлөт, ошондуктан Кыргыз Республикасынын чегинен тышкары жашаган жана жүргөн, консулдук каттоого турган, чет өлкөлөрдөгү референдумдун катышуучуларынын актуалдашкан тизмесин түзүү үчүн мыйзамдарга ылайык биометрикалык  каттоодон өткөн референдумдун катышуучулары тууралуу маалыматтарды кыска мөөнөттүн ичинде берүү ТИМге жана МККга тапшырылды.

Жыйналыштын жүрүшүндө 2021-жылдын 10-январында Кыргыз Республикасынын Президентин мөөнөтүнөн мурда шайлоону жана референдумду өткөрүүдө кошкон салымдары үчүн КР ТИМдин, МККнын (ГРС) жана ММКнын (ГСМ) өкүлдөрүнө КР БШКнын ыраазычылык каттары тапшырылды.

Маалымат үчүн: БШКнын, КР ТИМдин, МККнын ж.б. бир катар мамлекеттик органдардын жана коомдук бирикмелердин өкүлдөрү Чет өлкөлөрдө жашаган Кыргыз Республикасынын жарандарынын шайлоо укуктарын жүзѳгѳ ашырууну камсыздоо боюнча Жумушчу топтун мүчөлөрү болуп саналат. Жумушчу топ өз ишин КР БШКнын 2020-жылдын 26-июнундагы № 120 токтому менен бекитилген “Кыргыз Республикасынын аймагынан тышкары жашаган же жүргөн жарандардын шайлоо укуктарын жүзѳгѳ ашырууну камсыз кылуу жѳнүндѳ” Жобого ылайык жүргүзөт.