2020-жылдын 27-октябрында Кыргыз Республикасынын Шайлоо жана референдум ѳткѳрүү боюнча борбордук комиссиясы (мындан ары – Борбордук шайлоо комиссиясы) Кыргыз Республикасынын Жогорку сотуна «Кыргыз Республикасынын Жогорку Кеңешинин депутаттарын кайра шайлоону дайындоо жѳнүндѳ» Борбордук шайлоо комиссиясынын 2020-жылдын 21-октябрындагы № 258 токтомун мыйзамсыз деп таануу жана жокко чыгаруу жѳнүндѳ Бишкек шаарынын Административдик сотунун чечимине кассациялык даттануу менен кайрылган. 
2020-жылдын 28-октябрында КР Жогорку сотунун административдик иштер боюнча канцеляриясы Бобордук шайлоо комиссиясынын кассациялык даттануусу боюнча 2020-жылдын 30-октябрына 15.00 саатка соттук отурум дайындалгандыгы жѳнүндѳ маалымдаган. 
Ошентип, Борбордук шайлоо комиссиясынын кассациялык даттануусу ѳндүрүшкѳ кабыл алынып, ал боюнча 2020-жылдын 30-октябрына сот отуруму дайындалган. Мында ошол учурда кассациялык даттанууну кайтарып берүү үчүн сот коллегиясы эч кандай негиздерди караган эмес. 
2020-жылдын 29-октябрында Борбордук шайлоо комиссиясынын дарегине кассациялык даттанууну кайтарып берүү тууралуу Кыргыз Республикасынын Жогорку сотунун аныктамасы келип түштү. 
Мында кассациялык даттанууну кайтарып берүү жѳнүндѳ ѳзүнүн аныктамасында сот коллегиясы кассациялык даттанууга 2020-жылдын 27-октябрында И.Т. Азимов тарабынан алуучу «Кыргыз Республикасынын Жогорку сотуна» мамлекеттик алымдын тѳлѳнгѳндүгү тууралуу 2 квитанция тиркелгендигин кѳрсѳткѳн. Бирок алуучу Кыргыз Республикасынын Жогорку соту экендиги так кѳрсѳтүлүп турса да, сот коллегиясы мамлекеттик алымды тѳлѳѳнүн далили катары аталган квитанцияны кабыл алууну укуксуз деп эсептеген жана Борбордук шайлоо комиссиясынын кассациялык даттануусун кайтарып берген. 
Мында сот коллегиясы тарабынан тѳмѳндѳгү жагдайлар эске алынган эмес:
- кассациялык даттануу Борбордук шайлоо комиссиясы тарабынан Кыргыз Республикасынын Админстрациялык-процесстик кодексинин 203-беренесинде белгиленген мѳѳнѳттѳ берлиген; 
- Борбордук шайлоо комиссиясынын штаттык кызматкери И.Т. Азимов тарабынан Кыргыз Республикасынын Жогорку сотунун эсебине жалпы 700 сом суммасындагы мамлекеттик алым тѳлѳнгѳн. Ошентип соттук жыйындарды тѳлѳѳнүн зарылдыгы жѳнүндѳ мыйзамдардын талаптары Борбордук шайлоо комиссиясы тарабынан аткарылган; 
- кассациялык даттанууну кайтаруу жѳнүндѳ аныктама чыгарылган учурда Кыргыз Республикасынын Жогорку сотунда Борбордук шайлоо комиссиясынын катышуусу менен башка иштер болгон эмес, ошондуктан мамлекеттик алымдын тѳлѳнгѳн суммасы ушул ишке тийиштүү болгон. 
Жогоруда баяндалгандарга байланыштуу, 2020-жылдын 29-октябрында Борбордук шайлоо комиссиясы зарыл кошумча документтерди тиркѳѳ менен кассациялык даттанууну ѳндүрүшкѳ кабыл алуу жѳнүндѳ негизделген арыз менен КР Жогорку сотуна кайрылды. 
Бирок, 2020-жылдын 30-октябрында Кыргыз Республикасынын Жогорку сотунун аныктамасы менен Борбордук шайлоо комиссиясынын кассациялык даттануусу Кыргыз Республикасынын Админстрациялык-процесстик кодексинин 203-беренесине ылайык сот актысына даттануу мѳѳнѳтү ѳткѳндүгүнѳ байланыштуу кайтарылып берилген.