Чет өлкөлөрдө жашаган же жүргөн жарандарга шайлоо укуктарын ишке ашырууга көмөктөшүүчү мобилдик топтор иштей баштады.
2020-жылдын 4-октябрына дайындалган Кыргыз Республикасынын Жогорку Кеңешинин депутаттарын шайлоого даярдануу жана аны өткөрүү алкагында Кыргыз Республикасынын Шайлоо жана референдум өткөрүү боюнча борбордук комиссиясы Кыргыз Республикасынын Тышкы иштер министрлиги жана Кыргыз Республикасынын Өкмөтүнө караштуу Мамлекеттик каттоо кызматы менен өз ара аркеттешип, мобилдик топторду түздү. Бул демилге БУУӨПтүн, Миграция боюнча эл аралык уюмдун, Германия Өкмөтүнүн колдоосу менен ишке ашырылууда.
Мобилдик топтор алдыдагы парламенттик шайлоону уюштуруу боюнча маалыматтык-түшүндүрүү иштерин, анын ичинде жарандарды шайлоочулардын тизмелерине киргизүү, чет өлкөлөрдө түзүлгөн шайлоо участокторунун даректерине жана санына байланыштуу маселелер, жарандарды консулдук эсепке коюу, биометрикалык каттоо боюнча иштерди жүргүзөт.
«Кыргыз Республикасынын Президентин жана Кыргыз Республикасынын Жогорку Кеңешинин депутаттарын шайлоо жөнүндө» конституциялык Мыйзамдын талаптарына ылайык шайлоо участоктору аккредитациялаган өлкөнүн тиешелүү компетенциялуу органдары менен макулдашуу боюнча Тышкы иштер министрлигинин сунушу боюнча дипломатиялык өкүлчүлүктөрдүн, консулдук мекемелердин жана мамлекеттик органдардын чет өлкөдөгү өкүлчүлүктөрүнүн аймагында түзүлөт.
Өлкөнүн чегинен тышкары жерлерде жашаган же жүргөн КР жарандарынын шайлоо мүмкүнчүлүктөрүн арттыруу үчүн чет өлкөлөрдө 44 шайлоо участогу, анын ичинде Россия Федерациясынын Иркутск, Сургут, Түштүк Сахалин, Якутск шаарларында, ошондой эле Италияда жана Францияда шайлоо участоктору биринчи жолу ачылды.
Мобилдик топтордун ишин мурдатан баштоо мерчемделген, бирок пандемия шартында авиа каттамдар жабылгандыктан, ал иш чет өлкөлөргө чыгуу рейстер ачылганына жараша уюштурулмакчы. Алгачкы жолугушуулар Түркия Республикасынын Бурса, Измир, Бодрум шаарларында өттү. Жуманын аягына чейин мобилдик топтор Антальяда, Анкарада жана Стамбулда болушат. Жакын арада мобилдик топтордун Россия Федерациясынын шаарларына баруусу мерчемделүүдө.
Биометрикалык каттоодон өткөн жана жакын жайгашкан дипломатиялык өкүлчүлүктө же консулдук мекемеде консулдук эсепке турган Кыргыз Республикасынын жараны автоматтык түрдө шайлоочулардын тизмесине киргизилери жөнүндө кыргызстандыктарга маалымдалууда. https://shailoo.gov.kg/ru/konstitucionnye-zakony-kr/konstitucionnye-zakony-kr/O_vyborah_Pr-1913/
Консулдук эсепке коюу үчүн жаран чет өлкөдөгү мекемеге жеке өзү келип же Кыргыз Республикасынын чет өлкөдөгү мекемесинин расмий электрондук дарегине же КР ТИМдин – https://mfa.gov.kg порталындагы «Консулдук эсеп» электрондук маалымат системасы аркылуу документтерди жөнөтүү менен документтердин пакетин берүүсү керек.
Консулдук эсепке коюу үчүн консулдук жыйым алынбайт.
Жарандарды шайлоочулардын тизмесине киргизүү жөнүндө маалыматты «Тизме» мамлекеттик порталында (http://www.tizme.gov.kg) же шайлоо мезгилинде Кыргыз Республикасынын дипломатиялык өкүлчүлүктөрүнүн, консулдук мекемелеринин аймагындагы шайлоо участокторунда тактоого мүмкүн.
КР БШК маалымат бөлүмү
