24-августта саат 18:00дө Борбордук шайлоо комиссиясы саясый партиялардын ыйгарым укуктуу өкүлдөрүнөн талапкерлердин тизмесин каттоо үчүн тиешелүү документтерди кабыл алууну аяктайт.  БШКга КР Жогорку Кеңешинин депутаттарын шайлоого катыша тургандыктарын билдирип жана 20-августка чейин сьезддерин өткөрүп анда талапкерлердин тизмесин бекиткен саясый партиялар төмөнкү документтерди көрсөтүүлөрү зарыл:

1)     саясый партиянын жетекчисинин колтамгасы, мөөрү коюлуп, талапкерлердин тизмесин көрсөткөндүгү боюнча саясый партиянын чечими;

2)     тизмеге кирген талапкердин биографиялык жана башка маалыматын көрсөтүп өз колу менен толтурулган атайын формасы, паспортунун көчүрмөсү, иштеген же окуган жеринен маалымдама, башка мамлекеттин жарандыгына ээ эместиги боюнча маалымат, персоналдуу маалыматтарды иштеп чыгууга кат түрүндөгү (анын ичинде буга чейинки жарандыктары, башка жарандуулугу) макулдугу;

3)   шайлоо күрөөсүн кошкондугун күбөлөгөн документ.

Талапкерлердин тизмеси жана алар тууралуу маалыматтар КР БШКга электрондук түрдө да, кагаз түрүндө да берилиши керек. Бул ушул жылдагы жаңылык болуп саналат. Маалыматтар “Электрондук талапкер” программасына киргизилет, ал болсо шайлоочулар үчүн электрондук маалыматтар базасын түзүүгө ылайыкташкан.

Мындан тышкары БШК ала турган электрондук маалыматтар “Түндүк” мекемелер аралык өз ара иштешүү электрондук системасы үчүн түзүлүп, анда талапкерлер тууралуу маалыматтар  байланышсыз, обьективдүү текшерилет.

Так айтканда “Түндүк” системасы  аркылуу Мамкаттоо кызматынын базасындагы паспорт тууралуу маалыматтар, ИИМ аркылуу иштешүү менен талапкерлердин соттолгондугу же соттолбогондугу тууралуу маалыматтар текшерилет.

24-августта саат 12ге карата КР БШКсына 23 саясый партия парламенттик шайлоолорго андан ары катышпай тургандыгын билдирди. Бир саясый партия көрсөтүлгөн убакытта КР мыйзамына ылайык шайлоо фондун түзүү үчүн эсеп ачкан жок. Калган 20 партия 20-августка карата, башкача айтканда Жогорку Кеңештин депутаттыгына талапкерлердин тизмесин көрсөтүү этабы аяктап бара жатканда сьезд өткөрүшүп, КР ЖК депутаттыгына талапкерлердин тизмесин бекитишти.